Nazlican Nûjîn Yildiz

 

ÎZMÎR - Cinîyê ke Îzmîr de ciwîyenê bale antî serê muhîmîya weçînayîşê herêmî û vatî: “Rayrîberîyê herêmî de temsîlîyetê cinî muhîm o. Ganî seba şarî polîtîkayê alternatîf û somut bêrê amadekerdiş. Ma cinî do taqîpkarê nê prosesî bibê û bibê kirdeyê prosesî.” 

 

Semedê weçînayîşê herêmî ke do 31ê Adare de pê bêro rê nizdîyê 3 aşmî mend, partîyê sîyasî bi heme lezê xo xebatê xo yê weçînayîşî dewam kenê. Partîya Têduştî û Demokrasîyî yê Şaran (DEM Partî) hewteyê şîyaye de Kurdistan de verweçînayîş pê ard. Xeylê bajaran de şar sey delege şî sindoqan ser û namzede xo dîyar kerd. 

 

Bi nizdîbîyayîşê weçînayîşê herêmî reyde cinîyan derheqê temsîlkarîya cinîyan û waştişanê xo de ercnayîşê xo pare kerd. 

 

Rayîrberîyê DEM Partî ya Îzmîrî ra Ayfer Yildirime dîyar kerd ke şar bi asanî eşkeno xo biresno rayîrberîyê herêmî û wina dewam kerd: “Sîstemê bîyaye xîret keno ke cinîyan heps bikero. Nê semedî ra cinî nêeşkenê mudaxîlê sîyasetî bibê. La bi sîstemê hemserekatî û temsîlkarîya têduştî reyde cinî hîna zêde herikîyayî raşteyan. Wexto ke ma tewrê sîyasetî bibê do sîyaset zî xilas bibo. Sîstemê hemserekatîye muhîm o û no sîstem beno sebebê xo îfadekerdişê cinîyan. Cinî nê sîstemî ra cesaret gênê û tewrê prosesî benê.”

 

'Şar do yewbînan verike bikero’ 

 

Ayfere wina bale ant ser tecrîdkerdişê cinîyan û vat: "Weçînayîşê herêmî seba şarî muhîm o. Çike mîyanê şarî de xîret kenê ke probleman çareser bikerê. La sîstemê bîyaye xîret keno ke cinîyan tecrîd bikero û tecrîdî vilayê heme komelî bikero. Xora tecrîdo ke hemverê Birêz Ocalanî de pê yeno, manaya tecrîdkerdişê cinîyan de yo zî. Coka ra fikr û felsefeya Birêz Ocalanî seba azadîya cinîyan muhîm o. Coka ra yenê tecrîdkerdiş. Eşkerayo ke polîtîkayê şerî zirar dano ekonomî. Her ke şino rewşe hîna xirab bena. Pêkerdişê bajaran fikrêk mucîzevî yo. Şar do yewbînan verike bikero.”

 

'Hêzêko gird vejîyayo raşte’ 

 

Partîya Azadî ya Komelî (TOP) ra Berfîn Buyukertaşe da zanayîş ke verweçînayîşo ke Kurdistan de pê ameyo muhîm o û vat: “Sîstemê hemserekatî û polîtîkayê rayîrberîyê herêmî yê DEM Partîye seba cinîyan muhîm o. Verweçînayîş zî seba sîyasetê raşt muhîm o û şar sey objeyê weçînayîşî yeno dîyîş. Ma verweçînayîşê Kurdistanî de dî ke cinî hîna zêde vejîyena aver. Heto bîn de wexto ke qeyûm yenê tayînkerdiş ewil serekatîyê daîreya polîtîkayê cinîyan hedef yenê girewtiş. Semedo ke tîya de îdareyê cinîyan est o. Tîya de têgêrayîşê kurdî yê sîyasî hêzêko gird vejeno raşte. Ganî no hêz bêro pêroyîkerdiş. Tayînkerdişê qeyûman nê semedî ra pê yeno. Tayînkerdişê qeyûman tena nîno manaya hêrişa hemverê sîyasetê kurdî, eynî wext de yeno manaya hêrişa hemverê ma heme kesan zî. Cinî do taqîpkarê prosesî bibê û bibê objeyê prosesî. Vera polîtîkayê qeyûm û polîtîkayê şerê taybet de do polîtîkayê alternatîf aver berê û raşteyan de hemverê îqtîdarî de bivejê." 

 

'Bernameyêk alternatîf û somut ganî bibo’ 

 

Pawitoxa Heqanê Merdiman Gunselî Suna Kayaye zî da zanayîş ke weçînayîşê herêmî rê rojê tay mend û wina ercnayîşê xo ard ziwan: "Nina her kes xîret keno ke do senî AKPyî bin bifîno. Ganî ma bi waştişanê somut û bernameyê alternatîf şêrê kişta şarî. Weçînayîşê herêmî de temsîlîyetê cinî her roja ke derbaz bena hîna muhîm bena. Herême de ma zanê problem çî yo. Ganî ma cîya nizdîyê nê probleman nêbê. Semedê tutê ke şinê mekteb, semedê cinîyan ke her raşteyî de ma înan rêxistin bikerê, ganî ma bernameyê çareserîye bivejnê raşte. Weçînayîşê herêmî yeno manaya wextê hesabpersayîşî yê îqtîdarî ra. 22 serrî yo herême de problem yeno ciwîyayîş. Tebîî verê cû zî problem estbî. Nika zî eynî problem dewam keno, qey? Semedo ke problem nîno çareserkerdiş. Çareserîya probleman asan o û eke sosyalîstî û şorişgêrî bernameyêke alternatîf û somut aver bifînê û pîya têkoşîn bikerê do problemî bêrê çareserkerdiş."