Melek Avci

 

ANQARA - Raşteyê mîyanneteweyî dosyayê Epsteînî ke tora îstîsmar û bazirganîya tutan de yo, qisey keno. Bêcezaverdayîşê nameyê kesê ke dosya de ca gênê zî yenê nimitiş. Avûkate Hedîye Gokçe Baykale nameyê hemwelatijê Tirkîya ke dosya de derbaz benê û tutê vînîbîyaye, têkilîya bi cemaetan reyde vist vîr û vat: “Welat de problemê asayîşê tutan est o.”

 

Bi hewteyan o dinya belgeyeê newe yê ke dosyayê karsaz Jeffrey Epsteînîke serra 2020î de DYAye de îstîsmarê hemverê tutanê kênayan vera ame tepiştiş û zindan de merde ame dîyîş, qisey keno. O wext mehkema tena serê şexso ke suc kerdo de vindert û hewteyo şîyaye de 19 dosya rayaumûmî rê eşkera kerdî. Netîceyê cigêrayîşê rojnamegeran de vejîya raşte ke mîyanê rêxistina sucî yê organîzekerdiş avûkat, karsaz, dozger û xeylê kesê bînî est ê. Derheqê nê kesan de tehqîqat nêdîyayo destpêkerdiş û belgeyê 950 rîpelî de fotografê tutê kênayî dîmenî est ê û kişta înan de nameyê 200 kesî dosya de derbaz beno. Mîyanê nê nameyan de nameyê hemwelatija Tirkîya N.B.K zî derbaz beno û îdîayê Tirkîya ra tutî ameyî remnayîş û tewrê na tora bazirganîya merdiman ameyî kerdiş, est o. 

 

Avûkata Komeleya Ewil Cinî û Tutî avûkate Hedîye Gokçe Baykale derheqê tutê vînîbîyayeyan yê erdlerzî û kesa tirkîyayije N.B.K ya ke dosyayê Epsteînî de ca gêna de qisey kerd.

 

‘Na têkilî dimayê erdlerzê 99an mojnena’ 

 

Hedîye da zanayîş ke belgeye ke demê peyênan de vejîyayî raşte ser de cigêrayîş kenê û tora sucî tesîrêk gird xeylê welatan de kerda û wina vat: “Hetêk ci reseno Tirkîya. Çike belgeyan de zî nameyê kesa tirkîyayij zî est a. Dima ra na merdime rewşe zurî kerd. Vat ke na merdime aye nîya. La şik zêde yê. Dimayê erdlerzê 99an bi Tirkîya reyde têkilî yenê ronayîş. Dimayê 99an aqubetê tutanê bê refakat vejîyeno raşte û dimayê erdlerzê peynî yê 6ê Sibate şima zî zanê ke na babete ameye rojev. Tay vatî dîyayî cemaetan û tay zî vatî ameyî remnayîş. Ma muracat û gerre kerd. La tu netîceyêk nêvejîya. Derheqê tutê dîyayê cemaetan de ma muracatê Serdozgerîya Komare ya Sakarya û Stenbolî û tutê ke hetê Tarîkatê Menzîlî ra ameyî girewtiş de ma muracat kerd la netîce nêvejîya.”

 

‘Fikarê ma ca de yê’ 

 

Hedîye dîyar kerd ke qewimîyayîş ra dima muracatê sucî kerdî û wina vat: “Ma wazenê derheqê şexsa ke belge de nameye aye derbaz beno û şexsê bînî yê ke hetê serdozgerîye ra yenê tespîtkerdiş de tehqîqat bidîyo destpêkerdiş. Çike babete muhîm a. Fikarê ma timî estbî ke tutî tena hetê cemaetan ra nê hetê tora bazirganîya merdiman ra zî yenê şuxilnayîş û înan vejenê teberê welatî. Fikarê ma ca de yê. Coka ra ma muracat kerd. Her çend ke muhakemekerdiş Amerîka de bibo zî ma wazenê kesa ke nameyê aye derbaz beno bîyarê Tirkîya û bêra muhakemekerdiş. Tîya de wezîfe keweno milê ma ser. Ganî aqubetê tutan bêro cigêrayîş.” 

 

‘Cayê bi asayîş’ cemaet ê? 

 

Hedîye ard ziwan ke derheqê tutê vînîbîyayeyan de tu rey cewab nêgirewtî û wina dewam kerd: “Demêk nizdî de wezaretê xizmetê komelî û keyeyî eşkerayîyêke da. Vat ke beşêk pîl ê tutê bê refakat teslîmê keyeyan ameyî kerdiş la ma hûmare ra ewnîyenê rewşe qet baş nîya. Coka ra ma wazenê dozgerî tehqîqat bido destpêkerdiş û rewşe bivejîya raşte. Muracatê ke ma kerdî de ma vat ke sucê fuhuş, îstîsmar, bazirganîya merdiman çarçeweya TCKyî de bigêrê mîyanê ci. Ma wazenê nê babetan de cigêrayîş bêro kerdiş. 6ê Sibate ser de ma vindenê, ma persenê. Hûmare dîyar a, la çîyêk zelal çin o ke raştî de zî tutî teslîmê keyeyan ameyî kerdiş, dîyayî yurdan ya zî cemaetan. Wezarîya Perwerdeyê Milî rojê verênan de eşkerayîyêke da û vat ke ê bi ‘cemaetan reyde mîyanê hemkarîye de yî’ û vatbî ke na rewşe normal a.” 

 

Bi perwerdeyî nê, bi îstîsmar yenê zanayîş 

 

Hedîye qiseykerdişê xo yê peyênan de wina vat: “Cemaetê Tirkîya zafane bi îstîsmarî yenê rojeve. Bi qursê kuranî, cemaet, tarîkat û xeylê nimuneyan vejîyenê vernîya ma. Weqfa Hîranurî de tuta 6 serrî binê nameyê zewacî de ameye îstîsmarkerdiş. Weqfê Ensarî de tutê lajî ameyî îstîsmarkerdiş. Xêrcê nê nimuneyan qursê Kuranî yê Erziromî est o. Tîya her çend ke asayîş biasîyo zî, şikdar o. Seba perwerdeyî tutan şirawenê tîya la yenê îstîsmarkerdiş. Yurdan de tutî întîxar kenê. Coka ra ma nê cayan asayî nêvînenê. Tena tutî mexdurê erdlerzî û koçberî nê, bi temamî nê welatî de asayîşê tutan problem o. Nê welatî de probleme asayîşê tutan est o.”