Mîdye Miqted

 

ŞEHBA - Endama PYDyî ya Kantonê Efrînî Hêvîn Reşîde derheqê serrgêra 6ine yê hêrişê dewleta tirkan ya serê bajarê Efrînî de dîyar kerd ke bêvengîya dewlete mîyanneteweyî nîna qebûlkerdiş, no yeno manaya hemkarîya dewleta tirkan û wina vat: “Hêrişê serê Efrînî hêrişê vera cuyêka hempar ê azad bî. La vera abluqaya giran ya Hukmatê Şamî û hêrişê dewleta tirkan ya serê kantonê Şehbaye reyna zî hemwelatijê Efrînî têkoşînê xo ra fek nêverdenê. Vera heme pêkewtiş û astengîyan bîyayîşê xo danê îspatkerdiş û fikre ma timî xover bido.” 

 

Serê hêrişê dewleta tirkan û komê girêdayeyê ci yê 20ê Çeleyê 2018î ra 6 serrî derbaz bî. Roja ke hêrişî destpêkerdî ra heta nika sucê xeylê giran ê merdimîye herême de pê ameyî. Merdim ameyî qetilkerdiş, ameyî destbendkerdiş, tepiştiş, hêrişê înan ame kerdiş, bi desan merdim ca û wareyanê xo ra ameyî kerdiş. Bi hezaran cinî raştê tecawuzî ameyî. Tewr peynî seba di cinîyan qerarê daliqnayîşî ame dayîş. Sewbîna xeylê kesî herême de ameyî remnayîş û keyeyê înan ra fidye ame waştiş. Keyeyê ke fidye nêeşkayî bidê tutê înan ameyî qetilkerdiş. 

 

Goreyê çimeyanê herêmî prosesê 6 serrî yê îşxalkerîya Efrînî de 706 kesî ameyî qetilkerdiş, hezar û 200 cinî û 600 tutî zî mîyan de 9 hezarî ra zêde sivîl zî hetê komê girêdayeyê dewleta tirkan ra ameyî remnayîş. Bi taybetî demê peyênan de komê girêdayeyê dewleta tirke dîmenê îşkenceyê ke bi kurdan Efrînî de kenî serê keyepelê xo yê dîjîtale de pare kenî. 

 

Endama Partîya Yewîya Demokratîke (PYD) ya Kantonê Efrînî Hêvîn Reşîde derheqê 6ine serrgêra hêrişê serê Efrînî de ercnayîş kerd. Hêvîne da zanayîş ke hêriş vera sîstemê hemserekatîye, temsîlkarîya têduştî û cuya hempare ya azade de ame kerdiş û vat ke Efrîn vîr, mezg û zerrîya înan de ciwîyeno.

 

‘Semedê vînîkerdişê projeyê hemserekî û têduştî hêriş berdê serê Efrînî’

 

Hêvîn Reşîd dîyar kerd ke esasê xo de hêrişê serê Efrînî hêrişê hemverê cuyêka hempar a azad bî û wina vat: "Bi 6 serrî yo ke serê îşxalkerdişê bajarê Efrînî re derbas beno. Bajarê Efrînî ke bi tarîxê xo yeno şinasnayîş, eynî wextî de bi stratejîya xo ya ramitişî û welatijê xo yê kedkar ameyîne şinasnayîş. Eynî wextî de bi darê xo yê zeytûnî yê bi keda dadî, pî û kalan ameyîne nasnayîş. Dimayê alozîyê Sûrîye Efrîn de Îdarekarîya Xoser ame awankerdiş û uca de şarî xo bi xo îdare kerdêne. Şarî zereyê bajarî de meclis, komîn û sazgehê xo dayî awankerdiş û sîstemê hemserekî laver şî. Labelê no nêame hesabê dewleta tirkan û binê sîwanê bêvengîya dewletanê neteweyî de hêrişê Efrînî kerd. Semedê vînîkerdişê projeyê hemserekî û têduştî hêriş berdî serê Efrînî. "

 

‘Bi 72 teyareyan Efrîn ame bombavarankerdiş’

 

Hêvîne da zanayîş ke welatijê Efrînî şer de îradeyêk xurt nîşanî dewleta tirkan û komê girêdayeyê ci da û wina vat: "Bajarê Efrînî bi hawayêkê hovane ame bombavarankerdiş. Dewletê mîyanneteweyî hemverê nê de bêveng mendî. La bi xêrê îrade û îradeyê xurtî yê welatiyê Efrînî xoverdayîşêk lehengî serê ê xerîteyê qij de ame kerdiş. Dewleta tirkan bi xeylêk metod û şeklê hovî hêrişê welatijê bajarê Efrînî kerd la hemverê nê de rojane israrê ma yê semedê vînîkerdişê hovîtiya dewleta tirkan pîlêr bîne."

 

‘Darê zeytûnan bi keda dadî, pî û tutanê Efrînî ameyî ramitiş’

 

Hêvînê da zanayîş ke zeytûnê bi keda dadîyan amebî ramitiş, ameyî birnayîş û veşênayîş û wina vat: "Destpêk ke hêrîş serê Efrînî de ame dewleta tirkan şûnwar û temamê çimeyê ekonomî kerd hedefê xo. Eynî wextî de darê zeytûnê yê ke bi kedr û eraqê dadî, pî û kalê Efrînî ameyê ramitiş, ameyî birnayîş. Nika ma vînenê ke rojane ê darî yenê birnayîş û veşênayîş. No zî beno sebebê amancê çinkerdişê tarîxê Efrînî bêro pênasekerdiş. Wazenê nasnameyê kurdanê Efrînî werte ra wedarnê."

 

'Efrîn hiş, mezg û zerrîya ma de ciwîyeno'

 

Peynîya qiseykerdişê xo de Hêvîne vat, pêwa zor û zehmetîyan do xoverdayîşê xo pîl bikerê û wina qedêna: "Pêwa ablûqayê giran ê Hukmatê Şamî û hêrişê dewleta tirkan yê serê kantonê Şehbayî ancî zî welatijê Efrînî fek têkoşînê xo ra vera nêdanê. Ê pêwa pêro alozî û astengîyan bîyayîşê xo danê îsbatkerdiş û helwestê ma do tim xoverdayîş bo.