Mîdye Miqted

 

ŞEHBA - Bi seyan hemwelatijê Efrînî kantonê Şehbaye de seba serrgêra 6ine ya destpêkerdişê hêrişê serê Efrînî de vejîyayî raşteyan. Cinîyê ke vejîyayî raşteyan vatî ke heta agêrayîşê Efrînî do xoverdayîşê înan dewam bikero. 

 

6 serrî serê destpêkerdişê hêrişanê dewleta tirkan û komê girêdayeyê ci yê vera Efrînî ra derbaz bî. Bi nê wesîleyî bi des hezaran kes Şehba de rayîrşîyayîşêk girseyî ke destpêkerdişê qezaya Ehdasî de dest pêkerd û heta peynîya qezaye raşteyê ramitişî de peynî bî, ame organîzekerdiş.

 

Rayîr şîyayîş de fotografê şehîdanê Xoverdayîşê Seserrî û şaxê darê zeytûne ameyî berzkerdiş. Heto bîn ra pankartê ke serê înan de ‘Efrîn rûmetê ma yo, Efrîn bipawê’, ‘Bi rihê xoverdayîşî ma do îşxalkerdişî birijnê’ nuştebî ameyî berzkerdiş û sloganê ‘Biciwîyo xoverdayîşê seserre, na bêvengîye mîyanneteweyî’ ameyî qîrayîş. Cinîyê ke tewrê rayîr şîyayîşî bîyî dayî zanayîş ke do vera hêrişan de timî payan ser de bê.

 

'Heta agêrayîşî do xoverdayîşê ma dewam bikero'

 

Foziya Hisoye ajansê ma rê qisey kerd û dîyar kerd ke do xoverdayîşê înan heta agêrayîşê Efrînî dewam bikero û vat: "Na roje seba ma rojêka zaf bi dejin a ke na roje de hêrişê giran serê ma de ameyî kerdiş, tutê ma 58 rojan xover da. Vera nê hovîtîye ma têkoşînê xo dewam kerd."

 

'Ma do timî payan ser de bê' 

 

Qiseykerdişê xo yê peyênan de Fewziya Hisoye da zanayîş ke heta agêrayîşê Efrînî do timî serê payan de bê û raşteyan de bê û wina peynî ard: “Wa dewleta faşîst bizana ke ma şarê Efrînî hema gamêke de fek xoverdayîşê xo ra nêverdenê, gamêk tepîya nêerzenê heta ke ma agêrê ca û wareyê xo. No çî zî bi wesîleya gonîya şehîdanê ma meşru bibo."

 

'Sozo ke ma da ma xo vîr ra nêkenê' 

 

Sewbîna cinîyan ra dadîya bi nameye Soheyla Şêx Ehmed zî ajansê ma JINNEWSî rê derheqê roja 20ê Çeleyî de qisey kerd û wina vat: “Serrgêra 6ine yê hêrişanê serê bajarê Efrînî de ma ewro herikîyenê raşteyan. Ewro ma nê hêrişan bi şîdetin şermezar kenê, wa dewleta faşîst baş bizana ke ma sozo ke ma seba Efrînî dayo ra gamêke tepîya nêerzenê. Heta ke ma nêagêrê welatê xo do her tim têkoşînê ma gird bibo. Çike heqê dewlete çin a ke hende zilmî bima bikera.”