MERKEZÊ XEBERAN - Şorişgêre û têkoşera wayîrê keda 31 serrî ya têkoşîn, kar û xebatê giran ke verê 2 rojî Kerkûk de ameye qetilkerdiş Firyal Silêman Xalide dewaya têkoşînê azadîya şarê xo û şaranê bindest yê herême de wayîrê kedêke zaf gird bî. 

 

Firyal Silêman Xalide 18ê Çeleyî de Kerkûk de verê mektebêke de netîceyê suîqastêke de ameye qetilkerdiş. Goreyê şahidanê qewimîyayîşî, hêriş hetê di kesan ra ame kerdiş û çeke bêvengkerde ame şuxilnayîş. Ame zanayîş ke 8 gule rijîyayo Firyale ser. Portreyê Firyale ke ajansê ROJNEWSî de ame dayîş de qala têkoşînê 31 serrî keno.

 

Şorişgêre û têkoşere Firyal Silêman Xalide Hesekê ya ke keweno başurê Rojawanê Kurdistanî de serra 1975î de çimanê xo dinya rê akena. Keyeyê Firyal Silêman Xalide wexto ke aye hema tute bî, têkoşînê azadîye nas kerd. Bi taybetî naskerdişê Rayber Abdullah Ocalan û têkoşînê azadîye herême de tesîrêk gird viraştbî o wext. Serra 1993yî de, wexto ke Firyale zî bî 15 serrî verê xo daye xebatê têkoşînê azadîye ke herême de ameyêne rayîr ra berdiş. 

 

Têkoşera azadîye 

 

Her ciwan û xortê ciwan wexto ke tewrê xebatê têkoşînê azadîye bîyêne maneyêk xo rê weçînayêne û mîyanê komelî de, mîyanê têkoşînî de bi nê nameyî ameyêne naskerdiş û zanayîş. No adet mîyanê têkoşînê azadîye de heta ewro dewam kerdo. Firyal Silêman Xalide zî wexto ke tewr bena nameyê xo kena Zelal. Dimayê 15ê Tebaxa 1995î qerarêke radîkal gêna û xo hîna zêde serê felsefe û birdozîya Rayberê PKKyî Abdullah Ocalanî xorî kena, bi taybetî zî wazena têkoşîn û azadîya cinîye de gamêke hîna gird bierza. Dimayê demêk derbazê koyanê azade bena û 15 serran uca de manena. 

 

Verê xo dana Ermenistanî 

 

Cuya têkoşer Firyal Silêman Xalide dimayê 15 serrî yê têkoşînê koyanê Kurdistanî verê xo dana raşteyê bîn yê cuye. Xora Abdullah Ocalanî ra musabî ke tena raşteyê çekdarî mird nêkeno, zaf muhîmo ke yewîtî, yewbînan tepiştiş û rêxistinbîyayîşê heme şaran pê bêro. Bê rêxistinbîyayîş têkoşînê azadîye do kêm bibayêne û nêresayêne netîceyê ewro ke yenê waştiş. Coka ra mîyanê têkoşînê azadîye de verê xo daye heta Ermenistanî zî. Ermenistan zî bîbî welatêk ke bi des hezaran kurdî qirkerdiş û zilmê Osmanîyan ra biremê uca û ancî cuyêke newe dest pêbikerê. Firyale zî bi amancê naskerdiş û rêxistinkerdişê têkoşînê azadîye verê xo da uca. 8 serrî Ermenistan de manena. 

 

Şoreşê 19ê Temmuze 

 

Wexto ke şorişê 19ê Temmuze yê serra 2012î dest pêkeno, zerrîya Firyale zaf lez piro dabî, heyecan û coşêk zaf gird zerrîya aye pirr kerdbî. Firyale reyna verê xo dana Rojawanê Kurdistanî ke çimanê xo tede dinya rê akerdbî. Tecrube û îmtîhanê ke şexsîyetê xo de arê dabî Rojawan de vist cuye. Rêxistinkerdişê sîstemê Netewê Demokratîke de, awankerdişê komîn, meclîsan de rolê xo kay kerd û yewbînan tepiştişê heme beşê kurdan, ereb û suryanan de xeylê ked û xebate rayîr ra berd. Demêke qezaya Tirbespiyê ya bajarê Qamişlo de zî kar û xebate rayîr ra berd. Firyale bi sadebîyayîş, pakbîyayîş û aqilbîyayîşê xo, xo şarî rê zaf dabî heskerdiş.

 

Xebatê mîyanê cinî û ciwanan de ca girewte 

 

Dimayê şerê çeteyê DAIŞî serra 2014ine dest pêkerd, xoverdayîşêk tarîxî vera çeteyan ameyîne mojnayîş. Şerwanê azadîye ke sîne bi sîne çeteyê DAIŞî reyde şer kerdêne û hewil dayîne vernîya înan bigîra Firyale zî mîyanê komelî de, mîyanê cinî û ciwanan de xebatê rêxistinkerde kerdêne. Bê paştîdayîşê komelî, bê xoverdayîşê komelî, hêzê şerwanan kêmî mendêne û qîm nêkerdêne. Eksê ci hêvî û pawemendişê dişminê ke çeteyê DAIŞî şirawitibî serê şarî, bi xêrê têkoşîn û keda hezaran têkoşer û şorişgêrê sey Firyale xeyalê înan zî rijya, zorê DAIŞî ame berdiş û komel ame pawitiş û rêxistinkerdiş.

 

Firyal Silêman Xalid dimayê derbazê paytextê Suriye Şamî bî. Uca de zî semedo ke têkoşînê azadîye, sîstemê Netewa Demokratîk cinîyê ereban rê zî bido nasnayîş, kar û xebate kerd û dimayê demêk verê xo da başurê Kurdistanî. 

 

Şorişgêrêke bîn ameye qetilkerdiş 

 

Firyal Silêman Xalid, Kurdistan sey 4 parçe tu wext qebul nêkerdêne, heta peynî yewbîyayîşê şarê kurdî ra bawer kerdêne. Sînorê ameyê dayîş qebul nêkerd. Zanayîne ke Kurdistan mîyanê 4 welatan de amebi parekerdiş zî yewbîyayîş û yewîye mîyanê kurdan de ganî pê bêro, semedo ke kurdî pêro yew netew ê. Bawerîyê cîya zî bê, wayîrê lehçe û fekê cîya zî bê her yew netew ê. Serê nê esasî de waşt herêma Kurdistanî de zî kar û xebatan bikera, bi hêvî û waştişê yewîye û pêgirewtiş mabêne Rojawan û Başur de zî laver şêro. Semedê nê tewr peyîn Şam ra verê xo dabî herêma Kurdistanî, bajarê Kerkûkî. Firyala ke wayîrê keda 31 serrî têkoşînî bîye, çi heyf tewr peyîn Kerkûk de hêrişêk terorî de ameye qetilkerdiş.