MERKEZÊ XEBERAN - Meclîsê Cinîyan ê Kongreya Îslamê Demokratîke yê Qamişlo dîyar kerd ke ê do hemverê hêrişê dewleta tirkan ê serê Bakur û Rojhelatê Sûrîye û hêrişê hemverê cinîyan de têkoşînê xo dewam bikerê.

 

Semedê şermezarkerdişê hêrişê dewleta tirkan ê serê herêmê Bakur û Rojhelatê Sûrîye û hêrişê hemverê cinîyanê serkêş, Meclîsê Cinîyan ê Kongreya Îslamê Demokratîke yê bajarê Qamişlo ewro merkezê xo yê Qamişloyî de eşkerayîyêke çapemenî da. Eşkerayîye hetê endama Meclîsê Cinîyan a Kongreya Îslamê Demokratîke Şêrîn Hesen Xelîl ra ameye wendiş.

 

Eşkerayîye bi nê rengî ya:

 

“Dewamê hêrişê dewleta tirkan a faşîste serê herêmê Bakur û Rojhelatê Sûrîye de bi desan tutî û cinî ameyî qetilkerdiş. Hemverê nê hêrişan ke serê herêmanê ma de yenê kerdiş, pêro dewletê mîyannetewî bêveng manenê.

 

Merkezê bajarê Kerkûkî de Firyal Silêman Xalid ke 31 serrî semedê xizmetkerdişê şarê xo kar kerda, bi guleyan ameye qetilkerdiş. Firyal Silêman, têkoşînê xo heta peynî zî dewam kerd. No reya ewil nîyo ke serkêşê cinîyê kurdî benê hedefê hêrişê bi nê rengî. Sewbîna dîyar bi ke dewleta tirkan û çeteyê aye hemverê di cinîyê Efrînî yê ke hemverê hêrîşan de xo ver dayî, cezayê dardekerdişî dayê. Zihnîyetê kehn û hêrişkar bi her hawayî wazeno îradeyê şarî bişikino, la tu wext îradeyê ma nêşikêno.

 

Ma soz danê pêro şehîdê cinî ke ma do têkoşînê xo dewam bikerê, semedo ke şehîdî rayberê ma yê exlaqî yê. Ma do rayîr hemverê pêro hêrişan de bigîrê û sozê xo bi ca bîyarê. Semedo ke ma pawitoxê aşitîye yê û şarê wayîrê heq, herre û welatê xo yê. Şehadet rayîrê ma yê bidestkerdişê azadî û komelêk azad o.”