Elfazî Toral

 

STENBOL - Fincê Akmane da zanayîş ke vera destbendkerdişê 21 kesî yê Dadîyê Nobeda Edaletî do têkoşînê înan nêşikîyo bêro astengkerdiş û wina vat: “Her ke ma vanê aştî, dewlete şer de israr kena. Ê 10 dadîyan tepişenê ma do bibê 50 kes û bêrê herinda nê dadîyan de têkoşîn bikerê. Ma her yew herinda yewa bîn tepişenê. Ma do waştişê edaletî û taqîpkerdişê dewaya tutanê xo dewam bikerê.” 

 

16 Çeleyî de Stenbol, Amed, Edene û Dîlok zî tede 28 bajarî de polîsan eşt serê keyeyan û bi temamî 165 kesî destbend kerdî. Stenbol de zî çalakîkerê Nobeda Edaletî Kumri Akgul û Gulsum Ozturk, endamê Însîyatîfê Dadîyê Aştîye yê Stenbolî Bedia Gokguz, Birgul Muhikanci û Fatma Yilmaz, endamê Partîya Têduştî û Demokrasîyî yê Şaran (DEM Partî), aktivîstê Têgêrayîşê Cinîyê Azade (TJA), Sereka Komeleya Wextê Cinîye Dîlek Başalan û hunermendê Merkezê Kulturî yê Mezopotamyaye (NÇM) zî tede bi temamî 21 kes ameyî destbendkerdiş. Cinîyê bi îddîayê "endamtîya rêxistine" ameyî destbendkerdiş û di roje wextê înan ê destbendkerdişî ame dergkerdiş dîyar kerdî ke Mudirîya Asayîşê Stenbolî de polîsan muameleyê xirab û şîdet bi înan kerdî.

 

Nobeda çalakîkeran dewr girewtî 

 

Gonul Karamane ke ameybî destbendkerdiş avûkatê xo rê ard ziwan ke wexto ke polîsan înan keye ra berdî uca de pîyê aye derb kerdî. Sewbîna polîsan binê nameyê "mulakatî" de waştî ke tebere qeydî îfadeyê înan bigêro û polîsan destdergî bi înan kerd. Vizêr îfadeyê 21 kesî emnîyet de qedîya û do ewro Edlîyeyê Stenbolî yê Çaglayanî de bivejî dozgerî ver. Her hetî ra reaksîyonê vera destbendkerdişan berz beno. Nobeda Edaletî de zî vera destbendkerdişan vatişê têkoşînî vejîya aver. Cinîyan Nobeda Edaletî ya dadîyan dewr girewtî û zîyaretê paştîdayîşî yê seba çalakîya Nobeda Edaletî zî her ke şino zêde beno. 

 

Çalakîkera Nobeda Edaletî ra Fincê Akmane derheqê destbendkerdişan de JINNEWSî rê qisey kerd.

 

Dadîyê edaletî wazenê yene muhakemekerdiş 

 

Fincêye destpêkerdişê qiseykerdişê xo de vat ke dewlete dadîyan ra çi wazena, dadî se kerdî ke ameyî destbendkerdiş û reaksîyon mojna û vat: “Tena waştişê dadîyan edalet o. Ê tena tutanê xo wazenê. Semedo ke waştişê edaletî kerdî ameyî destbendkerdiş. Tutê nê dadîyan waştişê azadîya Serekê xo kenê. Ma dewlete ra çîyêk nêwaşt. Ma waştişê çîyê bêhuqûqî nêkerd. Ma heq, huqûq û edalet waşt. Îqtîdar cinîyanê kurdan ra terseno. Dadî semedo ke tena aştî waştî nika destbendkerde yê. Semedo ke şer nêwazenê coka ra destbendkerde yê. Derde dadîyan şer nîyo. Dewlete qey hende serê dadî û cinîyan ra polîtîkayan rayîr ra bena. Qey hende teda bi ma kena? Dadî semedo ke aştî wazenê bi nê muameleyî reyde yenê rî bi rî. Dewlete qey aştî û qanûn qebûl nêkena? Derde dewlete çi yo? 

 

'Ma yew herinda hemeyan de yê’ 

 

Fincêye da zanayîş ke îqtîdar wazeno bi destbendkerdişan ters bifîno zerrîya merdiman û wina vat: “La ma dadî qet nêtersenê. Ekse ci ma hêz nê çîyî ra gênê. Ma çalakîya Nobeda Edaletî dewam kenê û ma do dewam bikerê. Hem dadîya Kumrî hem zî dadîya Bedîa emrê xo bi têkoşînî derbaz kerdî. Şima çi dadîyan ra wazenê? No nîno qebûlkerdiş. Her ke ma vanê aştî dewlete şer de israr kena. Ê 10 dadîyan tepişenê ma do 50 dadî herinda înan de têkoşîn bikerê. Ma her yew herinda înan pirr kenê. Ma do waştişê edaletî û taqîpkerdişê dewaya tutanê xo dewam bikerê.” 

 

Ne waştişê xo û ne zî têkoşînê xo qîrenê 

 

Fincêye da zanayîş ke do dewlete ne bi tersî û ne zî bi şîdetî bieşka cinîya kurde binpay bikera û wina peynî kerd: “Ma kesî ra nêtersenê. Heta ke ma bibê do têkoşînê ma zî bibo. Ma yew reye soz da, ma do fek nê sozê xo ra nêverdê. Ma do rayîrê tutanê xo de dewam bikerê. Ma do tîya de çalakîya xo dewam bikerê. Ma do rayîrê înan taqîp bikerê. Ma seba her çîyî hadre yê. Na saete ra dima ma zî nêvindenê. Ma her tewir bedel da. Nika ra tepîya çi lazim bikero ma do bikerê.”