Mîdye Miqted

 

ŞEHBA - Vera hemverê hêrişanê dewleta tirke de cinîyê qezaya Tillrifat û Şêrewayî nêrazîbîyayîşê xo ardî ziwan û vatî: “Hemverê hêrişan de ma sere nêronenê. Ganî pêro şarê ma zî têkoşînê xo gird bikero.” 

 

Hêrişê dewleta tirke yê serê Rojawanê Kurdistanî dewam kenê. Reaksîyon û çalakîyê vera hêrişan zî dewam kenê. Hemverê hêrişanê dewleta tirke de cinîyê qezaya Tillrifat û Şêrewayî nêrazîbîyayîşê xo ardî ziwan ser û vatî: “Ma nêverdenê dewleta tirke biresa amancê xo.” 

 

'Bi hawayêkê hovîtî hêrişî dewam kenê’ 

 

Sîlvana Hesene ya qezaya Tillrifatî ra ajansê ma rê reaksîyonê xo yê hemverê hêrişan de ard ziwan û vat: "No demêk dergo ke dewleta tirke ya îşxalkere hêrişê xo yê serê herêmanê Bakur-Rojhelatê Sûrîye newe kena û hêrişan bi hawayêkê hovane serê herêman de dana dewamkerdiş. Vera hêrişan de ma zî xover danê."

 

 'Ma nêverdenê dewleta tirke biresa amancê xo' 

 

Dewamê qiseykerdişê xo de Sîlvanaye dîyar kerd ke şarê kurdî hemverê hêrişan de sere nêroneno û wina dewam kerd: “Nê hêrişan de her reye hemwelatijê sivîl benê amancê dewleta tirke la şarê ma xeylê xoverdayox o, vera nê hêrişan de yew reye zî sere çewt nêkeno. Ma zî sey hemwelatijê Efrînî ke no bî 6 serrî yo ma binê hêrişanê dewleta tirke de xover danê, timî paştîdayîşê şarê xo mîyan de yê. Ma teslîmîyet qebul nêkenê û nêverdenê ke dewleta tirke biresa amancê xo. Ma fek qezayan ra nêverdenê ke heta ma agêrê Efrînêk azad.” 

 

'No 6 serrî yo ma zî hemverê hêrişan de xover danê’ 

 

Emîne Mihemede zî ajansê ma rê qalê xo yê hemverê hêrişan kerd û wina vat: “Ma bi şîdet hêrişê dewleta tirke yê serê herêmanê ma şermezar kenê. No 6 serrî yo ke ma binê tanq û topanê dewleta tirke de xover danê û her reye hemverê hêrişanê dewleta tirke de ma benê cewab. Kesêk nêeşkeno îradeyê ma çinî bikero.”

 

 'Ma hemverê hêrişan de bibê yew dest’ 

 

Qiseykerdişê xo yê peyênan de Emîneye venga xo ya seba şarê herêmê Bakur-Rojhelatê Sûrîyeye kerd ke bi girseyî têkoşînê xo yê hemverê hêrişan berz bikerê, bi yew destî û rihî sere hemverê hêrişan de wedarnê. Çike tu kesêk nêeşkeno hemverê îradeyê şaran de vindero.”