Gulistan Gulmuş

 

AMED - Îtzîar Martînez Sustatxa ya îspanyayîje ke tewrê konferansê Têgêrayîşê Cinîyanê Azadan (TJA) ya bi nameyê “Zincîra Bêvengîye: Rijnayîşê Dêsê Dora Tepişteyanê Siyasîyan” bî dîyar kerd ke polîtîkaya dewlete ya zîndanan de tepişteyan qij fînena û vat, têkoşînê hemverê nê xeylêk muhîm o.

 

Têgêrayîşê Cinîyanê Azadan (TJA) 13-14ê Çeleyî de konferansê bi nameyê “Zincîra Bêvengîye: Rijnayîşê Dêsê Dorê Tepişteyanê Sîyasîyan” pê ard û di rojan dewam kerd. Welatê cîya ra cinîyê sîyasetmedarî, huqûqnas, aktîvîst tewrî bî û sewbîna Kurdistan û Tirkîya de zî xeylêk cinî tewrê konferansî bîyî. Konferans de binpaykerdişê heqan ê serê tepişteyan ame munaqeşekerdiş û bi atolyeyê ameyî kerdiş de derheqê problemê ke tepişteyî ciwîyenê de metodê çareserî ameyî munaqeşekerdiş.

 

Yew kesê ke tewrê konferansî bibî Itziar Martinez Sustatxa bî. Itziare îspanyayîj a, 21 serrî de semedê tewrbîyayîşê çalakîyê polîtîk amebî tepiştiş û dimayê ke ameye tepiştiş zîndanê Madrid, Malaga, Coruña, Avila, Araba, Palencia û  Salamanca yê Îspanyayî 20 serran tepişte manena. Zîndan de perwerdeyê rojnamegerî dewam kena û 2012ine de serbest yena veradayîş. Îtzîare tewrê partîya Sortu ya Herêma Baskî faliyetan kena. Pêwa xebatê partîya sîyasî, semedê tepişteyanê sîyasî yê Baskî zî xebatan kena û na babete de bi rêxistina komela sivîlî SARE reyde şuxilêna.

 

Îtziar Martinez Sustatxa konferans de tecrubeyê xo pare kerd û eynî wextî de JINNEWSî rê zî ercnayîş kerd.

 

‘Dewlete zîndanan de hewl dana merdiman bipelçiqna'

 

Îtzîare vat, dewlete bi esîrgirewtişê merdiman hewl dana têkoşînê înan bipelçiqna û wina vat: "Wazena zîndanan de merdiman çin bikera. Ewropa semedê tewrê têgêrayîşê netewperest û sosyalîst bîya û mi heqê welatê xo pawit û ez 21 serrîya xo de ameya tepiştiş. Çîyê ke ameyî kerdiş zî zilm bî. Hema zî heqî yenê binpaykerdiş. Sîstem wazeno ma wina çinî bikero. Ganî ma hemverê nê sîstemî de têkoşîn bikerê. Bi serran o ma na rewşe ra para xo gênê. Dewlete zîndanan de wazena merdiman bipelçiqna. No îşkence yo. No tehdîd o. Wazena merdiman çin bikera."

 

‘Goreyê dewlete metodê cezakerdişî yo'

 

Îtzîare bale ant serê binpaykerdişê heqan ê demê tepiştişê xo û wina vat: "Ez eşkena serê nameyê xo de hîn çîyan vajî. Demê ez Îspanya de bîya, nê rewşan reyde ameya rî bi rî. 20 serrî de ameya tepiştiş û her çî vuryayîne. Semedê tepiştişê merdiman lazimî bikerdêne, huqûq zî vurnayîne. La ganî dewlete goreyê huqûqî têbigêra. Verîya her çî ganî heqê tepişteyan bipawa. Ganî heqê merdiman her ca de bibo. Komelê demokratîk de no ferz o. Demo ke ma derheqê heqê xo de qisey kenê, dewlete tenê tepişteyan qij fînena. Amancê înan ne caardişê edaletî yo. Goreyê dewlete no metodê cezakerdişî yo."

 

Îtzîare tewr peyîn vat ganî hemverê teda têkoşîn bêro kerdiş û wina qedêna: "Her ca de vurnayîş beno. Demêk Îspanya de zî no wina bîne. Huqûq bi ca nêameyîne la nika goreyê verê tay bo zî huqûq est o. Her cayê dinya de zîndanan de problemî yenê ciwîyayîş. Ma hemverê nê de têkoşîn kenê. Ganî nêzdîbîyayîşê hemverê tepişteyan bêro başkerdiş."