MERKEZÊ XEBERAN – Îran de rojnamegere Nilufer Hamedî û Îlahe Muhammeda ke qetilkerdişê Jîna Emînîye bi rayaumûmîye pê hesnabî, dimayê çend saetan serbestverdayîşê xo, derheqê înan dewayêke newe ameye akerdiş. 

 

Îran de rojnamegere Nilufer Hamedî û Îlahe Muhammeda ke qetilkerdişê Jîna Emînîye bi rayaumûmîye pê hesnabî, dimayê çend saetan serbestverdayîşê xo, derheqê înan dewayêke newe ameye akerdiş. 16ê Êlula 2022yî de Jîna Emînîye paytextê Îranî Tehran de bi bahaneyê goreyê qanûnê laçeke tênêgêraya, berdîya bî merkezê destbendkerdişî û netîceyê îşkenceyo ke aye rê ameybî kerdiş de dinyaya xo bedelnabî. Rojnamegere Nilufer Hamedî û Îlahe Muhammede yê ke qetilkerdişê Emînîye bi rayaumûmîye pê hesnabî, ameybî tepiştiş. Rojnamegerê cinî dimayê tepiştişê 17 aşman 14ê Çeleyî de bi 10 mîlyar tumen kefaletî serbest ameyî verdayîş. 

 

Ajansa Xeberan ê Mîzanî pê hesna ke semedo ke wirdî rojnamegerî wexto ke Zîndanê Evînê yê Tehranî ra vejîyayî goreyê qanûnê laçeke fotograf nêantî derheqê înan de dewayêke newe ameya akerdiş û da zanayîş ke derheqê Nilufer û Îlahe de qedexeyê tebervejîyayîşê welatî zî est o.