MERKEZÊ XEBERAN - Hemsereka Îdarekrîya Xoserî Bêrîvan Xalid, dîyar kerd ke bi taybetî hêrişê stasyonê elekrîk, awe û petrolî kenê  çî tesîr serê cuye de keno û : "Ma do bi cinî û şarê azad reyde xoverdayîşê xo gird bikerê."

 

Hemsereka Îdarekarîya Xoserî ya Demokratîke ya Bakur û Rojhelatê Sûrîye Bêrîvan Xalid bale ant serê texrîbatê ke netîceyê hêrişê dewleta tirkan a îşxalkere herême de kerdê û wina vat: “Bi taybetî stasyonê elektrîk, awe û petrolî sero vindertê. Dewleta tirkan ya îşxalkere, hêrişê firin, depoyê genim û cew kena. Lazimîyê ke xizmetê şarî de yê kena. Eke ma zirarê madî verê çiman de bigîrê, do xeylêk sazgehî mecbûr bimanê ke xizmet vindarnê."

 

Semedê hêrişê dewleta tirkan şarê  Bakur û Rojhelatê Sûrîye hemverê problemê elektrîk û awe têkoşîn kenê. Goreyê agahîyê berpirsyarê awe û elektrîkî yê Kantona Cizîr û Firatî ra ameyo girewtiş, aşma Kanûne û nata stasyonê Petrolê Ewda yê bakurê Tirbêspiyî zirarêk pîl dîyo û netîceyê nê de 5 bîrê awe xizmet ra vejîyayî. Nê 5 bîrê awe lazimîyê elektrîk û awe yê merkezê bajarê Tirbêspiyê kûr kenê, lazimîyê elektrîkî ya bajarokê Hîlwa û Maşûkî kenê. Netîceyê hêrişan de merdimê ke 20 dewê girêdayeyê bajarokê Maşûk û 12 dewê girêdayeyê bajarokê Hîlwayî ciwîyenê, awe û elektrîk ra bêpar ameyî verdayîş. Encax rojê 3-4 saete elektrîk yeno dayîş.

 

Netîceyê hedefgirewtişê stasyonê elektrîkê Swêdîkî de 18 dewê Herêma Koçeratî yê girêdayeyê Dêrikî bê awe û bê elektrîk mendî. 20 dewê girêdayeyê bajarokê Abre ya Çilaxayî û 24 dewê girêdayeyê bajarokê Mistefawî yê Til Koçerî zî bê awe û bê elektrîk mendî.

 

Semedo ke santralê elektrîkî yê serê rayîrê Helebî yê başûrê Kobanî de di rey tê dima ame bombavarankerdiş, bajarê Kobanî û 300 dewî bê elektrîk mendî. Santralî de 800 hezar dolar zirarê madî virazîya û zêdeyê 10 bîrê awe zî xizmet ra vejîyayî.

 

89 hezar keyeyê Kantona Firatî de ciwîyenê, bi problemê awe û elektrîkî reyde rî bi rî yê û 660 dewî  û dewikî bê awe û bê elektrîk ê. Semedê dewamkerdişê hêrişê serê herême, texrîbatê ke binesazgehê herême virazîyayî, her deqe yenê vurnayîş.

 

Hemsereka Îdarekarîya Xoser ya Demokratîke ya Bakur û Rojhelatê Sûrîye Bêrîvan Xalid derheqê texrîbatê ke netîceyê hêrişê dewleta trikan yê serê herême de virazîyayê, ANFyî rê qisey kerd.

 

Bêrîvane, vat binesazgehê herême de texrîbatê cidî est ê û wina vat: " Amancê destpêkê yê Îdarekarîya  Xoser o yo ke xizmet şarî rê bikero, şert û mercê cuyêke baş şarî awan bikero. La semedê hêrişê dewleta tirkan, binesazgehê herêmî de texrîbatê cidî virazîyayî. Hetê madî de zirarêk pîl virazîya û xeylêk sazgeh û awanîyê ma yê binê xizmetê şarî de, mecbûr mendî ke  xizmetê xo vindarnê. Bi taybetî stasyonê elektrîk, awe û petrolî vindarîyayî. Sazgeh û awanîyê bînî zî mecbûr manenê xizmetê xo vindarnê. Hêrişê firin, depoyê genim û cewî yeno kerdiş. Awanîyê ke xizmetê şarî de yenê hedefgirewtiş û do xeylêk sazgeh û awanî xizmetî ra vejîyê."

 

'4 rey hêrişê herême kerdî'

 

Bêrîvane vat, dewleta tirkan  2023ine ra nata 4ine yo hêriş kena û vat: "Bi serran o ma hêrişî reyde rî bi rî yê. Sewbîna ambargoyêk xidar serê herême de kenê. Wazenê projeyê Îdarekarîya Xoserî îmha bikerê. Seke Îdarekarîya Xoser ma waşt ke timî lazimîyê şarê xo pêşwazî bikerê. Îmkanê destê Îdarekarîya Xoser de xeylêk sînordar ê, la pêwa nê zî ma reyna semedê başkerdişê şert û mercê cuya şarê xo seferber bî. Bi hêrişan reyde îmkanê ma hîna kêmî bîyî û çi heyf şert û mercê cuye yê şarî zî do zehmet bibo. Nê zehmetî zî do zêde bibê, la heta destê ma ra bêro ma do xizmetê şarê xo de bibê.”

 

'Helwestê şarî dîyar o'

 

Bêrîvane,  bale ant serê helwestê şarê Bakur û Rojhelatê Sûrîye û vat: "Şarê herême Şorişê Rojawanî ra nata hemverê hêrişan de helwestêk xeylêk xurt mojnayî û timî raşteyan de bî û hemverê nê hêrişê ke nê rojan de zî yenê kerdiş, ancî helwestê şarî zelal o. Îdarekarîya Xoserî zî hêz û moralê xo şarî ra gêna. Şar derûdorê Îdarekarîya Xoserî de kom bîyî, Îdarekarîya Xoserî zî semedê pawitişê destkewtişî seferber bî. Ancî cinîyan serkêşî kerd. Cinî her roje raşteyan de bî û cewabê lazim dayî dewleta tirkan. Şarê ma ganî xoverdayîşê xo hîna xurtir bikero. Ma zanê do hêrişî bêmabêne dewam bikerê û şarê ma zî nê esasî ser de do xoverdayîşê xo zêde bikero û paradîgmaya Netewa Demokratîke bipawo. Ma do bi cinî û şarê azadî reyde Şorişê Rojawanî serkewte bikerê."