Pelşîn Çetînkaya

 

AMED - Endama PMî ya DBPî Elîf Turan, a ke derheqê modelê hemserekîya DEM Partî û bi temsîlkarîya têduştî tewrbîyayîşê ci yê weçînayîşî ercna û dîyar kerd ke sîstemê hemserekî netîceyê têkoşînê hemverê zîhnîyetê camêrdî yo. 

 

Modelê hemserekî ke reya ewil hetê Partiya Komelê Demokratîk (DTP) ê serra 2005ine de ame awankerdiş û reya yewin serra 2014ine de hetê Partîya Demokratîke ya Şaran (HDP) ra îdarekarîyê herêmî de ame bicakerdiş, weçînayîşê herêmî yê 2024ine de zî esas yeno girewtiş. Pêwa ke sîstemê hemserekî dinya de reya ewil îdarekarîyê herêmî de yeno bicakerdiş, semedê rêxistinê sivîlî zî modelêk o. Eynî wextî de bi hîrakerdişê xeta azadîya cinî qerarê cinîyan de vurnayîşê komelî zî yeno amanckerdiş.  Endama Meclîsê Partîye ya Partîya Herêmê Demokratîk (DBP) Elîf Turan derheqê muhîmîyê hemserekî de îdarekarîyê herêmî de qisey kerd.

 

'Sîstemê hemserekî bi DEM Partî reyde kewt cuye’

 

Elîfê da zanayîş ke hemserekî sîstemêk demokratîk o û vat, "Yewin metodê îdarekarîya xoserîya demokratîke yo û bi rastî zî hemverê zîhniyetê awankerde yê serdest o." Elîfe, bale ant serê qeyûmên ke serra 2016ine ra ameyê tayînkerdiş û wina vat: “Heta cinîyêke bimano ma do sîstemê hemserekî bi ca bîyarê. Ma reyke bîn dîyar kenê ke hem paştdayîşê têkoşînê embazanê xo yê zîndanî û hem zî sey cinîyê nika raşteyan, semedê hemserekî, temsîlkarîya têduşt û xo îdarekerdişî bidê ciwîyayîş û çi destê ma ra bêro ma do bikerê."

 

'DEM Partî dewamê paradîgmayek o'

 

Elîfe vat, DEM Partî dewamê paradîgmaya bîyaye yo û dîyar kerd ke DEM Partî bi perspektîfêk demokratîk, ekolojîk, azadîya cinî yeno îdarekerdiş. Elîfe vat, “Sîstemê hemserekî hemverê sîstemê ke zîhniyetê camêrdan yeno rayîr ra berdiş o. No tenê rewşêke ke cinî hetê fîzîkî û biyolojîk ra ci de yê. Aqilê cinî herikbar o. Coka ma muhîmî danê tewrbîyayîşê cinîyan ê sîstemê hemserekî de.”

 

‘Hemserekî bi ‘Jin jiyan azadî’ ciwîya’

 

Elîfe da zanayîş ke sloganê "Jin jiyan azadî" felsefe yo û vat, "Girêdayîşê cuye û azadî de hembendîyê cinî û cuye est o. Semedê nê zî şerto yewin famkerdişê muhîmîyê sîstemê hemserekîye yo. Temsîlkarîya têduşt û ganekerdişê sloganê 'Jin jiyan azadî' rastî de sebebê bingehîn ke cinî mekanîzmayêk de ca gênê yê. Ma vanê 'heta cinî azad nêba, komel zî azad nêbeno'. Bi rastî, na rewşe tam hewce ya ke ma tîya bivînê. Cinî azad nêbo, komel azad nêbeno, eke bê cinî azad bibo, cuye nîna vînayîş û xoza bi tu hawayî cuyayene nêbena.”

 

'Ma weçînayîş bi Demokrasî tacîdar kerd'

 

Elîfe dîyar kerd ke DEM Partî vernîya weçînayîşê herêmî de kombîyayîş kerdê û qerar da ke şaredarîyanê xo wa şar biweçîno. Elîfe wina vat: "Belê, şert û mercê bîyaye de xora şar hemserekanê xo weçîneno. Şaredarî weçînayîşê fermî de la partîya ma amanc kerd ke na rewşe bi weçînayîşî keyeyê  tepişteyan, rêxistinê sivîlî û îdarekarê demokratîkî yê bajar bi bajar de bi ca bîyaro. Şar bixo do şêro serê sindoqan û hemşaredar û endamê xo yê meclîsî weçîno. Na rewşêke zaf ercîyaye û muhîm a. Çîyo ke  ma ci ra vanê demokrasî û şefafiyet tam o yo ke ma tîya ci reyde eleqedar benê. Ma wazenê bi rayîrî demokratîk laver şêrê.