MUGLA - Hemsereka HDPyî ya Bodrumî Zuhal Macîte dîyar kerd ke rayîrberê merkezî bi serê rayîrberîyê herêmî ra şinê û vat ke vera înan mekanîzma û kontrolo ke zêde beno de çareserî xorayîrraberdişê xoserî yo û vat: “Seba demokrasî zî temsîlkarîya têduştî ferz o.” 

 

Seba weçînayîşê herêmî yê aşma Adare rê amadekarîyê partiye dewam keno. Partîya Têduştî û Demokrasîyî yê Şaran (DEM Partî) seba namzedê xo dîyar bikero çîyê yewine pê ard û bi perspektîfê temsîlkarîya têduştî, rayîrberîya xoser-rayîrberîyê herêmî kena cuye. Hemsereka Partîya Demokratîke ya Şaran (HDP) ya Bodrumî Zuhal Mucîte derheqê rayîrberîyê xoser, hemserekatî û temsîlkarîya têduştî de qisey kerd. 

 

Zuhale dîyar kerd ke rayîrberîyê herêmî yê demokratîke, bi mekanîzmayê ke şar eşkeno derheqê xo de qerar bido, eşkenê pê bîyarê û wina vat: “Rayîrberîyê herêmî derheqê ke şarê herêmî bi reng, fikr û ewnîyayîşê xo çareserîyan berardiş o. Bi kanalê meclîsan, bi meclîsê taxan yan zî meclîsê raşteyan, raşteyanê binan de rêxistinbîyayîşê xo kerdiş, nê mekanîzmayan de ca girewtiş o. Werarê ke merkezan de yene girewtiş, ganî bi qerarê şarê herêmî reyde hempar bê. Çîyo ke ma vanê tena demokratîkbîyayîşê mekanîzmayanê dewlete nîyo, demokratîkbîyayîşê rayîrberîyê herêmî yo. Destpêkerdişê demokratîkbîyayîşî no yo.” 

 

‘Rayîrberîyê xoser seba bajaranê Tirkîya zî derbazdar o’ 

 

Zuhale ard ziwan ke çekuya rayîrberîyê xoser ke Kurdistan de kewto cuye çekuyêka global a û vat: “Na çekuye Tirkîya de sey ewnîyayîşêke parçebîyayîşî, tedaye yena dîyîş. La eksê ci na çekuye yena na mana ke welat bi demokrasî bêro rayîr ra berdiş. Rayîrberîyê xoser seba bajaranê Tirkîya zî derbazdar o.”

 

‘Nameyê çareseriye rayîrberîyê xoser o’ 

 

Zuhale dewamê qiseykerdişê xo de bale ant serê talankerdişê xozaye û vat ke her kesê wayîrê hişmendî Akbelenî ra heta Cudîye têkoşîn kenê û wina vat: “Her cayo ke rant kerdî dewre de cuya karkeran kewena zorî. Nimune Bodrum de kira zêde benê, feqîr erzîyenê teber. Merdim nêeşkeno kîra bido. Her cayê dinya de babeta cinîye û ekolojîye est a. Coka ra ganî ma çîyêk bîn bikerê herinda sîstemê xorayîraberdişê bîyaye. Ganî ma bi rayîrberîyê xoser, bi îradeyê xoser, bi hişmendîya xo derheqê bajarê xo de qeraran bigîrê. No rayîrberîyêk xoser, xoserîya herêmî ya.” 

 

‘Temsîlkarîya têduştî bedilîyeno’ 

 

Zuhale qiseykerdişê xo yê peyênan de wina vat: “Cinî rayîrberîyê herêmî de nîna temsîlkerdiş. Namzede cinî tena çend heb ê. Sîstemê hemserekatî çin o. Bajarê Tirkîya de seke yeno vatiş demokratîkbîyayîş çin o. Cinî qet nêeşkena bikewa nê mekanîzmayan. Ganî babeta azadîya cinîye tesîr heme rayîrberîyê herêmî ser de bikera. Azadbîyayîş bi têduştî dest pêkeno. Temsîlkarîya têduştî zî bedilîyena. Ma şaredarîya cinîye pawenê. Ma şaredarîyê ke hemserekatî tede est o, şaredarîyê ke mekanîzmayê qerarî tede est o wazenê. Ma şaredarîyê dostê cinîyan, ma şaredarîyê cinîyan wazenê.”