Rozerîn Gultekîn

 

AMED – Kaybaza Tîyatroyê Bajarî ya Amedî Berfîn Emektare derheqê xebata serra 2024î ke do rayîr ra berê û rojeva înan de çi est o de qisey kerd û ard ziwan ke ê rojeva şarî ra xoser tênêgêrenê. 

 

Yew raşteyo ke tewr zêde raştê hêrişê îqtîdarî yeno raşteyê kulturî yo. Vera heme tedayan xebata înan dewam kena. Nê raşteyan ra yew zî tîyatroyê Bajarî yê Amedî yo û bê maben xebatan rayîr ra beno. Tîyatroyê Bajarî yê Amedî bernameyê xo yê aşma ewil ê serra 2024î dekerde derbaz kerd. 

 

Kaybaza Tîyatroyê Bajarî ya Amedî Berfîn Emektare derheqê xebatanê xo de qisey kerd.

 

‘Ma berardişêk gird kerd’

 

Berfîne da zanayîş ke serra 2023yî de hunerê kurdî berardişêk gird kerdo la vera tedayan de ameyo kerdiş. Berfîne qedexeyê bernameyan vist vîr û wina vat: “Tewr peynî bernameyê serrgêra Merkezê Kulturê Mezopotamya yê Stenbolî nisîbê xo nê ra girewt. Ma xebatanê xo nêdanê vindarnayîş û rayîr ra benê. Sey Tîyatroyê Bajarî yê Amedî ma bernameyê aşma Çeleyî vet. Bername bi ‘Mirina Jeanne D’arce Ya Din’ dest pêkerd. No hewte ‘Çînur’ yê kayê Teatra Va bî estbî. Hewteyê bîn ma do bi ‘Dek û Dolabê Scapen’ bivejê vernîya temaşevanan. Kayê koma tîyatroyê Êlihî ‘Qral û Travis’ estbî. Bernameyê komê herêmî yê Amedî do bibê. Keyê tîrkî yê ‘Doktorê zerrîwaştox yê bê zerrî’ do bibo. Kayê ‘Morî’ yê Tîyatroyê Maskî do bibo. Bernameyêke pirr û dekerde vernîya ma de yo.”

 

‘Ma paştîdayîşê xo şarî ra gênê’ 

 

Berfîne wina dewam kerd: “Emserr ma do hem Tirkîya û hem zî Kurdistan de xeylê xebatan bikerê. Amed de her tim temaşevanê tîyatroyî est ê. Ma hêzê xo şarî ra gênê. Ma turneyê Ewropaye pê anê. Ma 3 welat û 8 bajaran gêrayî û ma kayê ‘Mirina Jeanne D’arce Ya Din’ kay kerd. Eleqeyêk gird estbî. Ma 12-13,14î de Wan de bî. Aşma Sibate de bernameyê Şirnex û Xarpêtî est o. Aşma Adare de turneyê ma yê Ewropa est o. Aşma Çeleyî de kayê zazakî yê ‘Wewremerdim’ do bêro kaykerdiş. Heskerdişê tîyatroyî tutîye ra dest pêkeno. Coka ra zî xeylê ercaye yo ke tutî bi ziwanê xo tîyatro temaşe bikerê.”

 

‘Ma rojeva şarî ra xoser nîyê’ 

 

Berfîne qiseykerdişê xo yê peyênan de vat: “Ma tutê nê şarî yê. Ma rojeva şarî ra xoser nîyê. Rojeva şarî çi bibo, aye rojeva ma de ya zî û ma rojeve ra berardiş kenê. Çend roj verê cû deklerasyonê ‘venga aştîye’ ame weşanayîş. No veng nuştox û roşvîran ra ame û xeylê ercaye bî. Ma do paştîdayîşê xo dewam bikerê. Ma tutê nê şarî yê.”