ANQARA – Rewşa tepişteyo nêweş Ekîm Polatî her ke şina giran bena. Dadîya tepişteyî Songul Îlkere da zanayîş ke dermankerdişê lajê aye yeno astengkerdiş û wina vat: “Ganî nê bêvengîyî bêrê şikitiş. Zîndanê Tîpê Syî û Yyî yenê viraştiş. Nê atmosferê sîyasî de beno ke siba her kes uca de bibo.” 

 

Tepişteyê nêweş ê giran ke seba dermankerdişî tehlîyeyê înan nîno kerdiş, dermankerdişê înan bi hawayêkê kêfî yeno astengkerdiş û dermankerdişê bi kelemce înan ser de yeno ferzkerdiş. Nê tepişteyê nêweşan ra yew zî Ekîm Polat o. Ekîm, serra 2016î de Stenbol de yeno destbendkerdiş û tepiştiş. 24 serrî ceza ci rê yena birnayîş. Ekîmo ke yew serrî û nîme Zîndanê Tîpê Lyî yê Hûmara 5ine yê Sîlîvrîyî de mend, dima ra surgunê Zîndanê Bandirma, Tîpê Tyî yê Akhîsar ê Manîsa û Zîndanê Tîpê Tyî yê Denîzlîyî ame kerdiş. 7 aşmî verê cû zî surgunê Zîndanê Tîpê F yî yê Asayîşo Berz ê Tekîrdagî ame kerdiş. 

 

Ekîmî zîndan de xirabîyayîşê rîtmê zerrî vera di reyan krîzê zerrî derbaz kerd û sewbîna nêweşê KOAH, tuberkuloz, gurçik û dîyabetî yo. Hîpofîzî vera zî laşê ci gird beno û hesteyê ci helîyenê.

 

‘Seba dermankerdişî derzîyê ferz nînê pirodayîş’ 

 

Songul Îlkere da zanayîş ke Ekîm 7 aşmî verê cû surgunê Zîndanê Tîpê Fyî yê Tekîrdagî ameyo kerdiş û vat ke nêweşîyê ci her ke şinê giran benê. Songule wina vat: “Seba dermankerdişê Ekîmî hîrê aşman derzin piro dayî. La dimayê hîrê aşman bi hawayêkê kêfî no ame birnayîş. Nika nêeşkeno derzîyê xo bido xo ra. Seba vernîgirewtişê dergbîyayîşê bejnê ci dermankerdiş nêameyo destpêkerdiş. Nivîno taybet yê ortopedîk nêameyo dayîş. Dermanê ferz di hewteyo nînê dayîş. Bidîyo zî kêm dîyenê. "

 

‘ATK xîret keno serê nêweşîye bîgêro’ 

 

Songule da zanayîş ke nêweşî bi tena sereyê xo kewenê herinda raporî û wina dewam kerd: “Dezgehê Tipê Edlî (ATK) ra raporê ferz nîyo. Merdimêk ke aqlibalixîya xo temam kerdo her tim pîl beno, linge ci pîl benê û qalê ci derg beno. No tena sereyê xo keweno herinda raporî. ATK nêweşîyan zano û vîneno. La seba nêweşîyan manîpule bikero nimneno. Na nêweşî mîlyonêke de yew kesî de yeno dîyîş. Ganî Ekîm bi lezkî serbest bêro verdayîş. Ekîmî nêweşxane de weşîya xo vînî kerd û bi na nêweşîye kewt. La ne serbest yeno verdayîş û ne zî yeno dermankerdiş.” 

 

'Dermankerdişê bi îşkence red keno’ 

 

Songule qiseykerdişê xo yê peyênan de vat ke fehmo ke Ekîmî dermankerdiş red kerdo zur a û vat ke Ekîm şertê merdimîye de dermankerdiş wazeno, Ekîm dermankerdiş nê, dermankerdişo bi îşkence red keno. Songule wina peynî kerd: “Dermankerdiş heqê heme tepişteyan o. La bi hawayêkê keyfî yeno redkerdiş, îşkence bi tepişteyan yeno kerdiş. Ekîm bêvengîya teberî ra aciz o. Wazeno na bêvengî peynî biba. Ganî na bêvengî bêra şikitiş. Zîndanê Tîpê Syî û Yyî yenê viraştiş. Nê atmosferê sîyasî de beno ke siba her kes uca de bibo.”