ÎZMÎR – Zîndanê Cinîyan ê Şakranî de dimayê grevê vêşanîye teda zêde bî. Ama zanayîş ke sereştişê qawişan zî zêde bîyo û çîyê şexsî yê tepişteyan zî yenê desteserkerdiş. Cinîyê zîndanî vera tedaye de xoverdayîşê xo dewam kenê.

 

Bi destpêkerdişê çalakîya grevê vêşanîye ya seba azadîya fîzîkî ya Rayberê PKKyî Abdullah Ocalanî, tedaya serê tepişteyanê ke Zîndanê Cinîyan ê Şakranî yê Îzmîrî de yenê tepiştiş zî zêde bî. Cigêrayîşê qawişan ke aşme de reyêk ameyêne kerdiş, dimayê grevê vêşanîye zêde bî û ame zanayîş ke sereştişan de çîyê taybet ê tepişteyan zî yenê desteserkerdiş. La zîndanan de têkoşînê vera tedayan zî dewam kenê. 

 

Tepişteyan ra Kubra Fîlîze serê telefonî ra bi waya xo Elîf Fîlîze reyde qisey kerd û tedaya ke yena kerdiş Ajansê Mezopotamya rê vat. 

 

Elîf Fîlîze da zanayîş ke waya aye vata ke sereştişanê qawîşan ke heta nika aşme de reyêk ameyêne kerdiş zaf bîyî û nê malumatan da: “Waya mi tewrê çalakîya grevê vêşanîye ya dorveger bîya. Nê prosesî de tedaya serê înan zêde bîya. Bi tedaya psîkolojîk xîret kenê ke înan aciz bikerê. Waya mi seba embaza xo çenteyêk viraştbî û dest ronayî çente sero zî.”

 

'Wa tedaya serê tepişteyan peynî bikerê’ 

 

Elîfe dîyar kerd ke rewşa bîyaye ra fikarê înan est ê û qiseykerdişê xo wina qedêna: “Tepişteyî xora azadîya xo ra dûrî ameyî verdayîş. Qey wina teda kenê? Bêedaletî est o û nêverdenê heqê xo dest bifînê. Rewşê winasî de fikarê ma zêde benê. Wa tedaya serê tepişteyan peynî bibo û wazenê înan qebûl bikerê.”