Elfazî Toral

 

STENBOL – Cinîyan reaksîyon mojna hêrişê Tirkîya yê vera Bakur û Rojhelatê Sûrîye û vatî: “Çi karê dewlete Rojawanî de est o? Şer vera kurdan de dîyayo destpêkerdiş. Çareserî deste serekê ma de yo. Wa Abdullah Ocalan serbest biverdê û çareserî pê bêra. Ma cinîyê kurdî û şarê kurdî fek têkoşînî ra nêverdenê û tîya ra pê zî nêverdenê. Ma do aştîye awan bikerî.” 

 

Îqtîdarê AKP-MHPyî ke şerê mabenê Îsraîl-Fîlîstînî de Îsraîlî lanet keno, wexto ke babete bena şarê kurdî hêrişê xo dewam keno. Yew nimuneyê peynî 23ê Kanûna 2023yî de ame ciwîyayîş. Tirkîya hemverê Bakur û Rojhelatê Sûrîye de hêriş da destpêkerdiş û bi desan sivîlan qetil kerd, cayê ciwîyayîşî bombarduman kena. Reaksîyonê hera hêrişanê Tirkîya dewam keno. 

 

Cinîyê ke tewrê Nobeda Edaletî bîyî reaksîyon nîşanê polîtîkayê hêrişî û tecrîdî dayî û venga berzkerdişê têkoşînî bi heme komelî kerdî û vatî ke vera hêrişan de vinderê.

 

‘Çareserî bi serekatî mumkun a’ 

 

Endama Însîyatîfê Dayikê Aştîye ya Stenbolî Maytap Toprake bale ant serê grevê vêşanîye yê tepişteyan ke dayî destpêkerdiş û da zanayîş ke 34 aşmî yo Rayberê PKKyî Abdullah Ocalanî ra xeberêke nêameya girewtiş. Maytape wina vat: “Ma azadîya fîzîkî ya Abdullah Ocalanî wazenê. Seba çareserî pê bêra ganî ma serekatîyê xo ra xeber bigîrê. Çareserî bi serekatî mumkun o. Yewine waştişê ma no yo. Wa gonî nêrija û aştî pê bêra. Wa şarê kurdî û tutê înan nêrê bombardumankerdiş. Ma cuyêke asayî wazenê.” 

 

'Yewine çareserî azadîya fîzîkî ya Abdullah Ocalanî ya' 

 

Maytabe hêrişê Tirkîya yê vera Bakur û Rojhelatê Sûrîye şermezar kerd û wina dewam kerd: “Çi karê Tirkîya Rojawanî de est o? Îsraîl dano Fîlîstînî ro. Erdogan paştîdayîş qaşo dano Fîlîstînî. La Erdogan zî hêrişî şarê kurdî keno. Înan bombarduman keno. Kurdan ra çi wazeno? Kurdî tena azadîye wazenê. Kurdî teda, qetilkerdiş û rijyayîşê gonî nêwazenê. Ganî bi lezkî peynîya nê hêrişan bêro. Destê xo Rojawanî ra biancê. Yewine çareserîya probleman azadîya Abdullah Ocalanî yo. Mifteyê çareserîye Abdullah Ocalan o.”

 

‘Qey vera hêrişê hemverê Rojawanî de veng nîno vetiş’ 

 

Cinîya bi nameyê Asîye Esene zî dîyar kerd ke tu dadî hêsir nêvarna û wina dewam kerd: “Ma vera nê şerî de lêşin ê. Wexto ke Fîlîstîn de merdim mirenê her kes wirzeno payan ser. Wexto ke kurdî mirenê kes vengê xo nêkeno. Rojawan de cinî û tutî, dadî ameyî qetilkerdiş. Qey kes vengê xo nêkeno. Ma nê caardişan qebûl nêkenê. Ma heme şeran lanet kenê. Erdogan Îsraîlî lanet keno la o hêriş keno. Kam ca de Kurd bibo hêriş keno. Erdogan herinda ke Îsraîlî lanet bikero wa xo lanet bikero.”

 

‘Ez do heta peynî aştîye bipawa’ 

 

Asîyeye sewbîna da zanayîş ke hêrişê hemverê şarê kurdî roj bi roje zêde benê û wina dewam kerd: “Dewlete hêrişê her raşteyê cuye kena û weşîye giran kena. Kam ca de kurdêke bibo verê xo tadîyeno uca. Cayê nê caardişan exlaqî de çin o. Qey ma kişenê? Qey ma qirkerdişanê xo nêvînenê. Nê welatî de her roje merdim yenê qetilkerdiş. Nê qetlîaman de zî ma her tim aştîye pawit. Ma aştî qîrayî. Ma do heta peynî zî wina bikerê.” 

 

Cinîyê kurdî fek têkoşînî ra nêverdenê 

 

Cinîya bi nameye Bîrsen Çetînkayaye zî veng kerd ke ganî vera polîtîkayê îqtîdarî de heme şarê kurdî bibo yew û wina peynî kerd: “Ganî her kes vera binpaykerdişan de dest bidê yewbînan. Ganî têkoşînî de şar ma tena nêverdo. Ma şarê kurdî û cinîyê kurdî heqanê xo wazenê. Ma qet fek têkoşînê xo ra nêverdenê. Tîya ra pê zî ma nêverdenê. Ma do polîtîkayê lêşin yê dewlete bişiknê. Ma do aştîye awan bikerê û şarê xo reyde têkoşînê xo gird bikerê.”