Elfazî Toral

 

STENBOL - Nuştoxe Ayşegul Devecîogluya ke îmze eşte binê deklerasyonê ‘Ma bibê vengê aştîye’ wina vat: “Nê welatî de bîyayîşê lîderêke sey Abdullah Ocalanî, hetê şarê kurdî ra qebûlkerdiş û hetê nê lîderî ra waştişê aştîye şansêke gird o. Eksê ci zî merg û kiştiş o. Ez venga heme komelî kena ke vera polîtîkayê şerî de waştişê aştîye de bibê yew.” 

 

Deklerasyonê ‘Ma bibî vengê aştîye’ 7ê Çeleyî de hetê 18 kesê ke mîyanê înan de nuştox, edebîyatkar û muzîkjenî est ê ra Otela Taksîm Hîllî de bi eşkerayîyêke çapemenîye ame deklerekerdiş. Hunermendê Merkezê Kulturê Mezopotamya (NÇM) û xeylê edebîyatkar, muzîkjen, ressam û kaybazî tewr bîyî. Deklerasyon de 570 kesî venga peynîkerdişê tecrîdî kerdî û dîyar kerdî ke Abdullah Ocalan kilîtê aştîye yo û ganî bi lezkî polîtîkayê tecrîdî bêro peynîkerdiş.

 

Kesê ke îmza eştî metnê dekleraysonî ra Ayşegul Devecîogluye derheqê venga ke kerdî de JINNEWSî rê qisey kerd. 

 

Çimeyê probleman çaresernêkerdişê problemê kurdî yo 

 

Ayşegule da zanayîş ke Tirkîya de feqîrîyêke giran xorî yena ciwîyayîş û vat: “Ma prosesêk ke merdim vêşan rakewenê, tutî vêşan şinê mekteb û feqîrîye ra derbaz benê. Dormeyo ke fikr û ewnîyayîş qedexe yê, hukm xoser nîyo, est o. Yew sebebê dormeyî çaresernêkerdişê problemê kurdî yo û talan û sermaye yenê zêdekerdiş. Seba nê çîyî bi zanayîş tutanê feqîran ver bi mergî ra benê. Bacê me şinê bombeyan rê. Bi nê çîyî wirzenê fortê xo erzenê. Ma hunermendî ma aştîye wazenê. Aştî cuye ya, şer merg o.” 

 

'Çareserî heqanê kurdan naskerdiş o' 

 

Ayşegule da zanayîş ke seba problemê kurdî bi rayîrê demokrasîyî bêro çareserkerdiş îmze eşta deklerasyonî û wina vat: “Çareserîya aştîye heqê perwerdeyî, cuya bi ziwanê dadî yê şarê kurdî ra derbaz beno. Şarê kurdî welatîbîyayîşê têduştî û demokrasîyê herêmî wazeno. Îqtîdar goreyê polîtîkayê xo têgêreno û şar ganî tepişeno. Coka ra lazimîyêke gird bi aştîye est a. Bê aştîye welat weş nêbeno demokrasî nêvirazîyeno.”

 

Vera şerî de raybazê dîyalogî 

 

Ayşegule ard ziwan ke xeylê welatê dinya de şer yeno ciwîyayîş û bi hezaran kes nê şeran de dinyaya xo bedelnenê û wina dewam kerd: “Çareserî dîyalogê bi muxataban reyde ya. Rayîrê çareserîye est o. Ganî komel nê baş bizano. Çareserî mumkun o. Aştî mumkun a û şert a. Ganî her kes nê bizano ke rolê xo kay bikero.”

 

‘Waştişê aştîye yê Abdullah Ocalanî şans o’ 

 

Ayşegule qiseykerdişê xo yê peyênan de dîyar kerd ke hunermendî aştîye wazenê û na nuqta de game eştî. Ayşegule heto bîn de vat ke ganî komel zî na nuqta de berpirsîyarîya bigêro milê xo ser û wina peynî kerd: “Nê welatî de bîyayîşê lîderêke sey Abdullah Ocalanî, hetê şarê kurdî ra qebûlkerdiş û hetê nê lîderî ra waştişê aştîye şansêke gird o. Eksê ci zî merg û kiştiş o. Ez venga heme komelî kena ke vera polîtîkayê şerî de waştişê aştîye de bibê yew.”