RIHA - Dadîya Aştîye Bedriye Demîr ke semedê problemê weşîye par dinyaya xo bedelnabî, serrgêra wefatê xo de serê gorê xo de ameye yadkerdiş.

 

Dadîya Aştîye Bedrîye Demîr ke wextê nêweşxaneyêk Rihayî de ameyîne tedawîkerdiş 6ê çeleyê 2023ine de dinyaya xo bedelnabî, bi wesîleya serrgêra wefatê xo de serê gorê xo yê Goristanê Bedîûzzaman de ameye yadkerdiş. Meclîsê Dadîyê Aştîye yê Riha, Têgêrayîşê Cinîyanê Azadan (TJA) û Parlamentera Partîya Têduştî û Demokrasî yê Şaran (DEM Partî) yê Rihayî Dîlan Kunt Ayan tewrê yadkerdişî bîyî.

 

Merasîm de ewil deqeyêk rêze ame girewtiş û dima ra zî Dadîya Aştîye Meyaser Korkmaze qisey kerd û vat: “Dadîya ma Bedrîye Demîr bi hesretê aştîye wefat kerd. Lajêk aye sirgun de bî û ey nêdî. Dadîya ma aştî waştêne, ma zî wazenê coka ma şaxê zeytûne danê serê gorê aye. Bi hêvîya ke êdî tu dadî bi hesretê aştîye dinyaya xo nêbeldenê.” 

 

Parlamentere Dîlan Kunt Ayan zî wina vat: “Ma dadîya xo Bedrîye par vînî kerd. Dadîya Bedrîye û bi hezaran dadî semedê aştî têkoşîn kerdî û dinyaya xo bedelnayî. Ma şexsê dadîya Bedrîye ma soz danê pêro dadîyan; heta peynî ma do semedê aştî têkoşîn bikerê.” 

 

Dimayê qiseykerdişan, beşdaran şaxanê zeytûnan û çîçegan dayî serê gorê Bedriye û dua kerdî.