Rojda Aydin - Rabîa Onver 

 

WAN – Endamê Meclîsê Dadîyê Aştîye yê Geverî ke paştdayîşê çalakîya Nobeta Edaletî ya Wanî kerdî, dîyar kerdî ke do xoverdayîşê xo pîl bikerê û venga dewletê mîyanneteweyî kerdî ke gamê lazimî bêrê eştiş. 

 

Nobeta Edaletî ya Wanê ya semedê paştdayîşê hamleyê “Semedê Abdullah Ocalanî azadî semedê problemê kurdî rê çareserîya sîyasî” û semedê paştdayîşê çalakîya grevê vêşanîye yê zindanan dest pêkerd, roja 36ine de dewam kena. Nobetê Edaletî her roje her ke şino pîlêr benê û her bajar de keyeyê tepişteyan dest bi çalakî kenê. Wan, Amed, Mêrsîn, Stenbol, Edene û xeylêk bajarê bînî de dadî waştişê wedaritişê tecrîdî û cuyêka azad kenê. Çalakîya Nobeta Edaletî ke Wanî bê mabên dewam kena, bi serdayîşî no paştdayîş pîlêr beno. Endamê Meclîsê Dadîyê Aştiye yê Geverê Colemêrgî paştdayîşê nobete kerdî û venga dewletê mîyanneteweyî kerdî ke gamê çareserî bierzê.

 

'Do xoverdayîş dewam bikero’ 

 

Dadîya Aştîye Emîne Engudare ard ziwan ke tecrîdê Îmraliyî tena serê Birêz Ocalanî de nîno rayîr ra berdiş eynî wext de serê heme şarê kurdî û Rojhelatê Mîyanênî de yeno rayîr ra berdiş. Emîneye tecrîdo ke bi serran o yeno rayîr ra berdiş şermezar kerd û wina vat: “No nizdîyê hîrê serrî yo ke tecrîdêke giran yeno rayîr ra berdiş û tu xeberêke Birêz Ocalanî ra nîna girewtiş û pêvînayîş nîno kerdiş. Bi no hawa tecrîdêke giran serê heme zîndanan de yeno rayîr ra berdiş. Heta ke tecrît serê zîndanan de bibo, do serê ma şaran de zî bibo. No tecrîd tena serê Birêz Ocalan û tepişteyan de nîno kerdiş. Heta ke tecrît nêro şikitiş wa tu kesêke nêvajo ke ez do binê nê tecrîdî ra wirzena. Tecrît ser ma de zî nika yeno rayîr ra berdiş. Ma xoverdayîşê tepişteyan û Birêz Ocalanî silam kenê. Destûr nêdanî ke pêvînayîş ci reyde bêro kerdiş. Zilmêke gird Îmraliyî û serê temamê zîndanan de est o. Heta ke tecrît serê Birêz Ocalanî de bibo do no xoverdayîşê ma zî dewam bikero.”

 

‘Temamê şarî binê tecrîdî de yo’

 

Emîne, bale ant serê ameyîşê xo yê serdayîşê nobete û dîyar kerd ke semedo ke nê xoverdayîşê pîl bikerê, ameyê. Emîne, ard ziwan ke dadî semedê waştişê tepişteyanê înan û tecrît wurzo dest bi na nobete kerdê û wina vat: “Ma semedê paştdayîşê dadîyê xo bikerê ameyî. Heta ke ma sax bê, ma do bi dadîyanê xo reyde bê. Ma înan bi tenê nêverdenê. Semedê tecrîdê serê Birêz Ocalanî bêro wedaritiş, ma venga pêro şarê xo kenê ke vengê xo vejê û wurzê serê lingan. Ma pêro parçeyêk ê û ganî vengê xo bikerê yew û tecrîd wurznê. Wa tu kesêk hemverê zîndanan çimanê xo û goşanê xo nêpado. Dewanê ma veşna, bajaranê ma xirap kerdî, rojnamegerî tepişte yê, Birêz Ocalan tepişte yo. Do êdî çi bi ma bikerê? Heta ewro hemverê nê zulmî ma sere nêtewêna yo û ma tîya ra tepîya zî nêtewênenê. Ma nêeşkenê kuçeyan de bi rehetî bigêrê. Ma nêeşkenê qalê tecrîdî bikerê. Semedê nê tenê ma şarê kurdî nê, temamê şarê bînî zî binê tecrîdî de yê. Wa pêro pîya wurzê.”

 

‘Sey Kobanê do no xoverdayîş gird bibo’ 

 

Dadîya Aştîye Fatma Temele zî vat ê seba paştîdayîşê dadîyê ke nobede de tepişene, ameyî û da zanayîş ke bi paştîdayîş û xoverdayîşî do biresê amancê xo. Fatmaye tecrîdo ke bi destê îqtîdarîyê AKPyî ameyo girankerdiş şermezar kerd û wina vat: “Birêz Ocalan 25 serrî yo binê tecrîdêk giran de yo. No hîrê serrî yo tu xeberêke ci ra nîna girewtiş. No merdimîye nîyo. Merdimo ke mîyanê çar dêsan de yeno tepiştiş û heme heqê ci deste ci ra bêrê girewtiş do se bikero. Heqê Birêz Ocalanî zî est o ke zindan de heqanê xo ra fêde bigêro û pêvînayîş bikero. Dewlete tecrîdêk giran kena şar ci ra dûrî bimano. La heto bîn de zî beno ke dewlete bi xo zî ci reyde pêvînayîş bikera. La heto bîn de zî bi tecrîdo girankerde destûr nêdanê ke bi avukat û keyeyê xo reyde pêvînayîş bikero. Wextê şerê Kobanê de senî ke şar werişt serê payan xover da, ma do nika zî nê xoverdayîşî gird bikerê. Venga mi heme kesê ke edalet wazenê ra no yo ke wa heme bêrê destê xo bidê destê dadîyan û nê tecrîdî biwirznê.“

 

‘Eke heqê merdiman pawenê nika kam ca de yê?’ 

 

Dadîya tepişteyo bi nameyê Mehdî Mihçi û Dadîya Aştîye Gulbeyaz Mihçiye zî dîyar kerd ke 25 serrî yo hemverê tecrîdo ke yeno rayîr ra berdiş de vengê xo berz kenê û da zanayîş ke ganî heme kes zî hemverê nê tecrîdî de wirzo serê payan û paştîdayîşê keyeyê tepişteyan bikero. Gulbeyaze vist vîr ke barêke giran serê milê tepişteyan de yo û wina dewam kerd: “Seba ke no tecrît wirzo tepişteyan dest bi çalakîya grevê vêşanîye kerdî û nê barî girewtî serê mile xo. Heqê tepişteyan û Birêz Ocalanî yeno binpaykerdiş û mîyanê çar dêsan de yeno tepiştiş. Seba ke tecrîdî bişiknê bedene xo dayî verê vêşanîye. Ma azadîya şarê kurdî wazenê. Ganî heme şarê teberîp zî wayîrê îradeyê tepişteyan û Birêz Ocalanî bivejîyo. Mifteyê azadîye destê Birêz Ocalanî de yo. Eke Birêz Ocalan azad bibo do heme şarê kurdî û şarê bîn zî azad bibê. Heqê pêvînayîşî yê Birêz Ocalanî yeno qedexekerdiş. Heqê keye û avûkatan est o ke pêvînayîş ci reyde bikerê.” 

 

‘No komplo bi destê înan ame rayîr ra berdiş’ 

 

Gulbeyaze qiseykerdişê xo yê peyênan de venga dewletê mîyanneteweyî kerd ke wezîfeyê xo bîyarê ca û wina qiseykerdişê xo peynî kerd: “No komplo bi destê înan serê Birêz Ocalanî de ame rayîr ra berdiş. Coka ra zî venga ma înan rê na ya ke hemverê nê tecrîdî de bivejê û gamê çareserîye bierzê. Heta ke no tecrît nêwirzo do grevê vêşanîye yê ke zîndanan de dest pêkerdî zî do peynî nêbê. Ma serkewtiş û azadîye wazenê. Ma rojê weş wazenê.”