MERKEZÊ XEBERAN - Leyla Şaylemeza ke Parîs de ameye qetilkerdiş, ewil bî Leyla Qasim dima ra zî bî Ronahî. Leylaya ke sey nameyê xo têkoşînêke gird verda, seba neslê pey xo bena hêz. 

 

Ronayoxanê PKKyî ra Sakînê Cansiz (Sara), Temsîlkara Kongreyê Netewê Kurdistanî (KNK) ya Parisî Fîdan Dogan (Rojbîn) û Endamê Têgêrayîşê Ciwanan Leyla Şaylemez (Ronahî) yê ke Qirkerdişê Parisî yê 9ê Çeleyê 2013î de ameyî qetilkerdiş, serrgêra 11ine yê şehadetê xo de pey de verdayî. Qirkerdiş dimayê pêvînayîşê 3ê Çeleyê 2023yî yê bi Rayberê PKKyî Abdullah Ocalanî pê ame. Cinîyê ke qirkerdiş de ameyî qetilkerdiş ra yew zî Leyla Şaylemeze bî. Leyla serra 1988î de 1ê Çeleyî de bajarê Mersînî de yena dinya. Nameyê Leyla Qasim ya ke yew serkêşa têkoşînê cinîya kurde bî bi aye danê. Pîyê aye dimayê serran vat ‘kênaya mi heqê nameyê xo da’. Dima ra Leyla bi waştişê xo nameyê Ronahîye girewt. 

 

Polîtîkaya tedaye vera koç kerdî 

 

Hîri cinîyê ke Parîs de ameyî qetilkerdiş ra yew zî Leylaye bî. Keyeyê aye ke Licê de ciwîyayêne tedaye dewlete vera koçê Mersînî keno. Leylaye uca de yena dinya. 1ê çeleyê 1988î de Mersîn de yena dinya û tutîya aye uca de derbaz bena. Tedaya dewlete uca de zî dewam kena. Di serrîya Leylaye de pîyê aye Cumalî Şaylemez şino Almanya. Serra 1994î de Leyla bi 5 wayê û birayê xo reyde şina Almanya. Di serrî ra dima zî dadîya aye û wayê û birayê aye şinê verê înan. 

 

Tewrê xebatê ciwanan bî 

 

Leyla û keyeyê aye ke bê yew hacetêk xo şinê Almanya bajarê Halle yê eyaletê Saksonya-Anhaltî de ca benê. Bi serran têkoşînê cuye da. Keye mektebê Alman de tutanê xo kulturê xo ra dûrî nêkerd û berd Komeleya Kurdî. Leylaye uca de koma reqsî de ca gêna. 

 

Hêrsê Leylaye vera tedaya dewlete de gird bî û sey Sakîneye qerar gêna ke hêrsê xo açarna pêrodayîşî. Leylaye serra 2008î de bi hawayêkê aktîf tewrê xebatê ciwanan bena û 2 serrî ra tepîya serra 2010î de tewrê PKKyî bena. 

 

Leylaye dimayê demêk probleme weşîye vera agêrena Ewropa û xebatê ciwanan rayîr ra bena. Leylaye bado ke agêrena Ewropa hîna aktîf xebetîyena. Leylaye Hannover de hetê polîsê Alman ra yena taqîpkerdiş. Teda û tacîzan vera Leyla seba rayîr ra berdişê falîyetan şina Parîs.

 

‘Amancê aye şîyayîşê koyan bî’ 

 

Leylaye serra 2008î de pîyê xo rê mektubêke nusena û vana: “Amancê mi şîyayîşê koyanê azade bî, ez resaya amancê xo.” 

 

Cinîya datê aye Nursel Şaylemeze derheqê Leylaye de wina vana: “Leyla tutêka zaf bi aktif bî. Nêeşkayêne cayê xo de ronişa." Nursele dîyar kena ke hîsê tewr gird ê Leylaye no bî ke şêra Amed, tewrê Newroza Amedî biba. 

 

Mîraso ke nê hîrê xoverdayoxê kurdî verdayî, cinîyê kurdî teslîm girewtî. Her aşma çeleyî de yadkerdiş ra wetêr bîyê sembolê xoverdayîşî.