Pelşîn Çetînkaya

 

AMED - Cinîyê ke derheqê tecrîdê giran yê serê Rayberê PKKyî Abdullah Ocalanî ercnayî wina vatî: “Mifteyê aştîye Abdullah Ocalan o û eke azad bibo do heme kesî azad bibê. Ê azadîya serekatîye ra tersenê.”

 

34 aşmî yo Rayberê PKKyî Abdullah Ocalan û tepişteyê bîn yê ke Îmraliyî de manenê Omer Hayrî Konar, Hamîlî Yildirim û Veysî Aktaşî ra xebere nîna girewtiş. Vera tecrîdê giran kampanyaya "Abdullah Ocalanî rê azadî, problemê kurdî rê çareserîya sîyasî" 10ê Teşrîna Verêne de bi waştişê azadîya fîzîkî ya Rayberê PKKyî Abdullah Ocalanî ke Girawa Îmraliyî de binê tecrîdê giran de yeno tepiştiş, dîyaye destpêkerdiş. Çarçeweya kampanyaye de 27ê Teşrîna Peyêne de tepişteyê sîyasî seba ke paştîdayîş bidê kampanyaye dest bi grevê vêşanîye kerdî. Merdime tepişteyan Edene û Mêrsîn de seba paştîdayîşî bi sloganê “Seba edaletî ma tecrîdî bişiknê, seba aştîye ma bibî vengê zîndanan” dest bi çalakîya Nobeda Edaletî kerdî. Amed de zî çalakîye yew aşme xo pey de verda. Nobeda Edaletî bi paştîdayîşêke gird dewam kena. Cinîyê ke Mersîn ra şîyî Amed derheqê tecrîdî de ercnayîş kerdî.

 

‘Ma rayîrêk hempar wazenê’ 

 

Şemsî Acare ya ke Mersîn ra ameye, tecrîdê serê Rayberê PKKyî Abdullah Ocalanî şermezar kerd û wina vat: “Ma cinî heta ke bibê do tecrîd nêro qebûlkerdiş. Tepişte nika grev de yê. Ma zî nobedê edaletî de yê. Ez venga heme cinîyan kena. Ma dest bidê yewbînan û nobede bigîrê. Ma rayîrêk hempar wazenê. Heme dadî eşkenê rayîrêk hempar bivînê. Ma do heta peynîya cuya xo çi destê ma ra bêro ma do bikerê.”

 

‘Mifteyê aştîye Apo yo’ 

 

Haybet Kalkane zî reaksîyon mojna tecrîdî û wina dewam kerd: “Apo aştîye seba her kesî wazeno. Mifteyê aştîye Abdullah Ocalan o. Seba Fîlîstînî bermenê. La kurdî merdim nîyê? Bi çekê kîmyewî yenê qetilkerdiş, cinîya 70 serrî cenazeya aye raşte de ameye verdayîş. Heta Apo azad nêbo kes azad nêbeno. Ma aştîye wazenê.”

 

‘Wa aştî pê bêra’ 

 

Ayşe Înane zî wina vat: “Ma wazenê tecrîdê serê Abdullah Ocalanî bêro wedaritiş. Şarê kurdî her tim xo ver da. Ma edalet wazenê. Ma dadîyê aştîye wazenê aştî pê bêra û tecrîd bêro wedaritiş. Dadî şinê vere zîndanan û uca de teda vînenê. Her kes xo ver dano û paştîdayîş bidê yewbînan û xurt bibê.” 

 

‘Bîyayîşê ma serekatîyê ma yo’ 

 

Kadriye Oguze zî bale ant serê xoverdayîşê tepişteyan û Nobeda Edaletî û wina vat: “Bîyayîşê ma serekatîyê ma yo. O azad bibo ma do heme azad bibê. Tecrîd bêro peynîkerdiş do tecrîdê serê tutanê ma yê tepişteyan zî peynî bibo. Şarêk bê rayber beno ma? Ma bi serekatîyê xo sereberz ê. Ma bi wesîleya ci ewro tîya de yê. Ma sipasîyanê xo seba serekatîyê xo kenê. Ma silamanê xo şirawenê. Biciwîyo Rayber Apo, biciwîyo xoverdayîşê zîndanan.”