Rabîa Onver

 

COLEMÊRG - Pinar Yilmaz dîyar kerd ke pîyê aye Necmî Çaçan 31 serrî verê cû bi îşkence ameyo qetilkerdiş û vat ke seba şikdarî bêrê dîyîş û muhakemekerdiş seserrêk bîn zî derbaz bibo do têkoşîn bikerê. 

 

Necmî Çaçan 29ê Kanûna 1993yî de dewa Duzce ya Tetwanî ya Bedlîsî de netîceyê îşkenceyê giran ê leşkeran de dinyaya xo bedelnaye. Kênaya ci Pinar Yilmaze 31 serrî yo têkoşîn kena. 

 

Komeleya Heqanê Merdiman (ÎHD) û merdimê vînîbîyayeyan yê Colemêrgî her hewte roja şeme çalakîyê xo pê anê. Pinar Yilmaza ke her hewte çalakîye de ca gêna, şikdarê pîyê xo Necmî Çaçanî persa. Pinare eynî wext de rayîrberîyê ÎHDyî ya Colemêrgî de ca gêna. 

 

Pinare da zanayîş ke serra 1993yî de leşkeran eştî serê dewa înan û vat: “Her ca veşênayî, gule reşênayî. Pîyê mi cehd ked ke ma bipawo. Her kes qîrayêne. 15 deqeyan keyeyê ma ame gulevarankerdiş. Berê ma kuyayî. Ma 5 way û bira bî. O wext ez 12 serrî bîya.”

 

‘Mi vat meşo’ 

 

Pinare dîyar kerd ke senî ke dadîya aye ber akerda leşkeran dadîya aye kuyayê û wina dewam kerd: “Birayê mi verika dadîya mi ra kewt erd. Pîyê mi kuyayî. Ma 12,14,15 serrî bî. Verê çekan dayî ma. Ma ra persan persayî. Leşkeran pîyê mi berd. Dadîya mi hema erd de bî û hîşê aye şîbî. Ez pey pîyê xo ra bermaya. Mi vat ‘meşe bawo’. Pîyê mi vat meterse ez do bêra.” 

 

‘Yewine derdê pîyê mi yo’ 

 

Pinare dewamê qiseykerdişê xo de ard ziwan ke dadîya aye senî ke werişt xo ser vejîyaye teber la leşkeran her ca gulevarnayîş kerdbî û wina vat: “Ma heta serê sibayî pawayî. Heywan, keye, baxçeyan veşênabî. Yewine derde ma pîyê ma bî. Serê sibayî her kes werişt şî raşteyê dewe de arê bî. Pîyê mi çinî bî. Ma cigêrayîş da destpêkerdiş. Birayê mi ame, deste ci de sol û kefîya pîyê mi estbî. Seke aqil bierzo reqesîyayêne û ame. Ma o wext fehm kerd ke çîyêk bîyo.”

 

‘Mi bedenê parçekerde arêda’ 

 

Pinare dîyar kerd ke ver bi cayê ke birayê aye şîbî aye zî şîya û wina vat: “Binê dara goze de mi mezg dî. Mi nê fikrîya ke yê pîyê min o. Çîyêk wina xof û çimsûr nêame hişê mi. Mi mezg arêda û kerd pêşê xo. Dimayê ez hîn şîya, mi pîyê xo dî. Ez wina menda. Ne bermaya, ne qîraya. Bedenê pîyê mi amebi parçekerdiş. Bi îşkence amebi qetilkerdiş. Bedenê pîyê mi nêame şûtiş. Wecîbeyê dînî bi ca nêameyî. Bi lez û bez defin kerdî. Her cayê kefenî ra gonî herikîyayîne. Pîyê mi bi kefenê sûr ame definkerdiş. O wext bi zor bi apê pîyê mi kaxidêk ‘PKKjîyan kişto’ dabî îmzakerdiş. Xebera ma nêra çinî bî. Ma zî koçê Wanî bî.” 

 

'Têkoşînê ma do dewam bikero' 

 

Pinare qiseykerdişê xo wina qedêna: “Dimayê serran kesê bi nameyê Korkmaz Tagma yê bi nameyê Kelle Kesen ameyîne şinasnayîş, roportajêk de vatêne, ‘Ma sereştişê Bedlîsî de Necmî Çaçan kişt’. Pêwa nê îtîrafî kes nêame muhakemekerdiş. Bi taqîbkerdişî ame tepiştiş. 31 serrî yo ma têkoşîn kenê. Heta kiştoxî nêrê muhakemekerdiş, nêrê cezakerdiş do têkoşînê ma dewam bikero.”