Elfazî Toral

 

STENBOL - Cinîyê ke Nobeda Edaletî de mîyanê paştîdayîşî de yê wina vatî: “Têkoşînê tepişteyan û dadîyan yê ma yo. Ganî her kes paştîdayîş bido çalakîye, hîsin bibo û wayîrê waştişê azadîye bivejîyo.” 

 

34 aşmî yo Rayberê PKKyî Abdullah Ocalanî ra xebere nîna girewtiş. Vera heme muracatê pêvînayîşî yê avûkatan bi bahaneyê ‘dîsîplînî’ ameyî redkerdiş, tepişteyê sîyasî yê zîndananê Kurdistan û Tirkî ya zî 27ê Teşrîna Peyêne de seba tewrbîyayîşê hemleya “Abdullah Ocalanî rê azadî, probleme kurdî rê çareserîya sîyasî" dest bi grevê vêşanîye kerdî. Bi eynî waştişî merdime tepişteyan zî dest bi çalakîya Nobeda Edaletî kerdî. Stenbol de bi serkêşîya Komeleyanê Paştdayîşê bi Keyeyê Tepişteyan Reyde yê Marmarayî (MATUHAYDER) 13yê Kanûne de çalakîya Nobeda Edaletî da destpêkerdiş û bi eleqeyêk gird dewam keno. 

 

Kesê ke seba paştîdayîşî şîyî zîyaretê Nobeda Edaletî JINNEWSî rê qisey kerdî. 

 

Heta ke netîce bigirîyo do paştîdayîş dewam bikero 

 

Yildiz Erene da zanayîş ke ê kîşta keye û tepişteyan de yê û wina vat: “Bi hemleyî reyde ma kîşta tepişte û merdimanê tepişteyan de yê. Ma do her tim kîşta nê dadîyan de ca bigîrê. Ma her tim bi înan reyde têkoşîn kenê. Seba nê zî ewro ma tîya de reyna bi înan reyde mîyanê paştîdayîşî de yê û bi înan reyde nobete tepişenê. Keye û tepişteyê ma tena nîyê. Ma do têkoşînê xo berz bikerê.”

 

‘Ma tepîya game nêerzenê’ 

 

Yildize dewamê qiseykerdişê xo de dîyar kerd ke polîtîkayê şerî yê îqtîdarî dewam kenê û wina dewam kerd: “Ma vera polîtîkayê tecrîdî yê serê kurdan têkoşîn kenê. Ma aştî û demokrasî pawenê. Waştişê ma nê yê. Bi hezaran embazê ma tepişte yê. Nika 36 zîndanan de grevê vêşanîye est o. Ma kişta dadîyan de yê. Serkewtiş û xoverdayîş do yê ma hemeyan bo. Ma qet têkoşîn û xoverdayîşê xo ra gamêke tepîya nêerzenê.” 

 

Venga hîsgêrîye 

 

Elîf Gule zî eşkera kerd ke çalakîya nobete her ke şina gird bena û qiseykerdişê xo wina dewam kerd: “Ma do bi dadîyan reyde nobede de bê. Seba paştîdayîşî ma her roje tîya de yê. Ma ewro bi embazanê xo reyde ameyî. Tecrîd tesîr serê heme komelî de kerdo. Coka ra heme şar binê tecrîdî de yo. Ganî tecrîd bêro şikitiş. Seba heqê merdiman muhîm o. Ma heta peynî kişta dadîyan de yê. Ma do pîya nê prosesî rayîr ra berê. Heta netîce bêro girewtiş ma do têkoşîn bikerê. Ez venga hîsgerîye bi heme komelî kena ke seba rijnayîşê tecrîdî cehd bikerê.”

 

‘Wexto ke tecrîd birijîyo ma do netîce bigîrê’ 

 

Elîfe qiseykerdişê xo yê peyênan de venga wayîrvejîyayîşê çalakîya nobede kerd û wina qiseykerdişê xo peynî kerd: “Wayîrvejîyayîşêk baş do prosesî netîce bikero. Ma her kesî dawetê wayîrvejîyayîşê Nobeta Edaletî kenê. Ganî ma her yew berpirsîyarîya xo bîyarî ca. Ma bibê yew do kurdî û heme şarî azad bibê. Ma kişta têkoşînê dadîyanê xo de yê. Ma bi têkoşînî netîce bigîrê. Ganî ma hîna zêde wayîr bivejê.”