Gulîstan Gulmuş

 

AMED - Nobeda Edaletî ke semedê paştîdayîşê temamê tepişteyê sîyasî ke dest bi grevê vêşanîye kerdbî, dîya destpêkerdiş yew aşme xo pey de verda. Kesê ke tewrê nobede bîyî roja ewil ra waştişanê xo aanî ziwan û dîyar kerdî ke ganî tecrîdê serê Rayberê PKKyî Abdullah Ocalanî bêro şikitiş û prolemê Kurd bêro çareserkerdiş. 

 

Tepişteyê sîyasî 27ê Teşrîna Peyêne de bi sloganê ‘Abdullah Ocalanî rê azadî problemê Kurd rê çareserî’ grevê vêşanîye dayî destpêkerdiş û grev roja 40î de yo. Dimayê grevî keyeyê tepişteyan bajarê cîya cîyayan de bi eynî taleban dest bi Nobeda Edaletî kerdî. Amed de 4ê Kanûne de bi serkêşîya Komeleya Keyeyê Tepişteyan (TUAY-DER) dîya destpêkerdiş û nika Wan, Mersîn, Edene, Stenbol û Îzmîr de dewam keno. 

 

Qey nobedê edaletî? 

 

Bado ke tepişteyê sîyasî dest bi grevê vêşanîye kerdî 4ê Kanûne de zî keyeyê înan dest bi Nobeda Edaletî kerdî. Tepişte û merdime tepişteyan bi çalakîya xo tewrê hemleya ‘Abdullah Ocalanî rê azadî problemê Kurd rê çareserî’ ya ke her cayê dinya de yeno rayîr ra berdiş bîyî. 

 

3 sserrî yo xebere ci ra nîna girewtiş Rayberê PKKyî Abdullah Ocalan 25 serrî yo Îmraliyî de yeno tepiştiş û 3 serrî yo ke ci ra tu xeberêk nîna girewtiş. Ne keye û ne zî avûkatî nêeşkenê pêvînayîş bikerî. Tewr peynî 25ê Adara 2021î de Mehmet Ocalan bi birayê xo Abdullah Ocalanî reyde pêvînayîşêk kilm pê ardbî. Nobeda Edaletî û grevê vêşanîye bi seba azadîya Abdullah Ocalanî dîyayî destpêkerdiş. 

 

Nobeda Edaletî ya Amedî awanîya DEM Partî ya Rezanî de yena tepiştiş. Merdime tepişteyan her roje saet mabenê 11.00 û 17.00î de arê benî û vengê xo berz kenî. Sewbîna zîyaretan qebûl kenî. Mîyanê yew aşma ke nobede dîyaya destpêkerdiş de xeylê hetan ra zîyaret ameyî kerdiş. Delegasyonê Cinîyan ê Mîyanneteweyî zî nê prosesî de şî zîyaretê Nobeda Edaletî. 

 

Cinîyan Nobeda Edaletî de her tim qerardarîya xo ya seba çalakîye ardî ziman. Bi tepişteyan reyde pêvînayîşê telefonî Cinîyan Nobeda Edaletî de bi tepişteyan reyde pêvînayîşê telefonî kerdî û pêvînayîşo ke kerdî bi cinîyê ke ewja nobede de yî pare kerdî. Cinîyan her roje deyîrê Aklîme Hanas û Meryem Soyluye goşdarî kerdî û bi deyîr û tilîlîyan têkoşînê xo dewam kenî.