MERKEZÊ XEBERAN - Hezar û 25 avûkatî Bakur û Rojhelatê Surîye û herêmê bînî yê Surîye de semedê  azadîya fîzîkî ya Rayberê PKKyî Abdullah Ocalanî muracatê Rêxistina Efûyî ya Mîyanneteweyî kerdî.

 

Çarçewaya hemleyê “Abdullah Ocalanî rê Azadî, Semedê Problemê Kurdî Çareserî” ke 10ê Teşrîna Verêne 74 merkezê dinya amebî destpêkerdiş de, avûkatê Bakûr û Rojhelatê Sûrîye û herêmê bînî yê Sûrîye zî kewtibî mîyanê lebate.

 

Înîsîyatîfê Avûkatanê Sûrîye, semedê pawitişê Abdullah Ocalanî, peynîya aşma Teşrîna Peyêne û destpêkê Kanûne (2023) de hezar û 25 avûkatan îmza arêdayî.

 

Îmzayê ke bi waştişê azadîya fizikî ya Rayberê PKKyî Abdullah Ocalanî ameyê arêdayîş, pêwa waştişnameyî bi rayîrê înternetî Rêxistina Efûyî ya Mîyanneteweyî rê ameyî şirawitiş.

 

Îmzayî eynî wextî de semedê Ofîsê Asrînî yê Huqûqî ke pawitişê qanûnî yê Abdullah Ocalanî kenê, ameyî şirawitiş.