Melîke Aydin

 

ÎZMÎR - Kesê ke tewrê Çalakîya Nobeda Edaletî bîyî dîyar kerdî ke seba azadîya Rojhelatê Mîyanênî û dinya ganî Rayberê PKKyî Abdullah Ocalan azad bibo û vatî azadî pê nêra do têkoşîn dewam bikero. 

 

Çarçeweya kampanyaya ke bi sloganê ‘Abdullah Ocalanî rê azadî probleme kurd rê çareserî" Îzmîr de bi serkêşîya Têgêrayîşê Cinîyanê Azade (TJA) û Komeleya Hetkarî û Paştîdayîşî ya bi Keyeyê Tepişteyan û Hukmeweran Reyde ya EGEye (EGE TUHAY-DER) Temsîlkarîya Herêma Egeye ya Partîya Herêmê Demokratîke (DBP) de "Nobeda Edaletî" dîya destpêkerdiş. Cinîyê ke tewrê çalakîye bîyî dîyar kerdî ke tena şarê kurdî nê heme şarê dinya azadîya fîzîkî ya Abdullah Ocalanî wazenê û dîyar kerdî ke heta ke tecrîd nêwirzo do têkoşînê înan dewam bikero. 

 

Ganî her kes paştîdayîş bido 

 

Rayîrberîyê EGE TUHAYDERî ra Leyla Kaygisize da zanayîş ke tecrîdê Îmaliyî her ke şino giran beno û 3 serrî yo xebere Îmraliyî ra nîna girewtiş û vat: “Tecrîd sucê merdimîye yo, îşkence yo. Zîndanan de grevê vêşanîye dewam keno. Heta ke tecrîdê serê Birêz Ocalanî nêwirzo do têkoşîn dewam bikero. Her keso ke aştîye wazeno ganî tewrê Nobeda Edaletî bibo.” 

 

‘Seba heme şaran têkoşîn da’ 

 

Dadîya Aştîye Medîne Kaymaze zî ard ziwan ke seba çareserîya probleme kurdî û aştîyêke bi ercaye têkoşîn kenp û wina vat: “Abdullah Ocalan tena seba şarê kurdî nê seba heme şaranê dinya têkoşîn keno. Ma aştîye wazenê. Ma nêwazenê gonî birija. Dewleta Tirkîya beran girewte. Ma destê aştîye derg kerd la înan ber girewt. No 3 serrî yo Îmraliyî ra tu xeberêke nîna girewtiş. Tirkîya şer wazena. Coka ra zî zîndanan pirr kena. Her çîyê ke zîndanan de yo bi pere yo. Seba ke keye tutanê xo nêvînê surgunê bajarê dûrî kenê. La ma kincê serê xo zî biroşê ma do şêrê pêvînayîşê înan. Ma do seba caardişê azadîye têkoşîn bikerê." 

 

‘Wext wextê azadîya fîzîkî yo’ 

 

Dadîya Aştîye Peyruze Kurte zî ercnayîşê xo ard ziwan û vat: “Ma kişta xoverdayîşê zîndanan de yê. Wextê aştîye rew ra ameyo. Şer û qirkerdiş her cayê dinya de dewam kenê. Rojawan de sîvîlî yenê qetilkerdiş, her ca yeno bombardumankerdiş. Êdî wa zilm vindero. Wa berê zîndanan abibê. Wext wextê azadîya fîzîkî yo. Ma azadîye tena seba xo nê seba her kesî wazenê.” 

 

‘Tecrîd tesîr serê her kesî de keno’ 

 

Dadîya Aştîye Behîye Yalçine zî da zanayîş ke semedo ke tu hacetêk pawitişî çin o, tepişteyan bedenê xo dayo verê vêşanîye û wina dewam kerd: “Tecrîd merdimîye nîyo û tu hetê ci yê edaletî çin o. Tecrîd tena zirar nêdano kurdan, dano heme şaran. Tecrîd tesrîê xo serê heme hetan de keno. Her cayê dinya de şer dewam keno. Aktorê aştîye Birêz Abdullah Ocalan o. Birêz Ocalan fikre xo bivajo do heme şer vindero. Do azadîya fîzîkî pê biameyêne. Seba fikrê xo vajo ganî bi lezkî serbest bêro verdayîş û seba asayîşê komelî game bêro eştiş.”