Elfazî Toral

 

STENBOL - Sereka ÎHDyî ya Stenbolî Gulseren Yolerî dîyar kerd ke pêroyê serrî de tecrîd û şer giran bîyo, binpaykerdişê heqan zêde bîyo û vat: “Lazim o vera nê polîtîkayan de têkoşînêk xurt bêro rayîr ra berdiş. Ma do têkoşînê xo dewam bikerê. Ganî her kes nê têkoşînî de hempar bo.” 

 

Karneya îqtîdarîyê AKP-MHPyî yê serra 2023î bi tecrîd, binpaykerdiş, şer, krîzê ekonomî, qetikerdişê cinîyan, destdergê û binpaykerdişê heqan pirkerde yo. Îqtîdar sere de Îmraliyî de Kurdistan û Tirkîya de polîtîkayê tecrîdî yê giran rayîr ra berd û serê heme komelî de vila bî. Tepişteyan vera binpaykerdişan û tecrîdî de 27ê Teşrîna Peyêne de dest bi grevê vêşanîye kerdî û merdimê tepişteyan zî na Nobeda Edaletî de dewam kenê. 

 

Sereka ÎHDyî ya Stenbolî Gulseren Yolerî xebatê ke çarçeweya Hewteyê Heqanê Merdiman de rayîr ra berdî, sewbîna têkoşîno ke seba rewşa tepişteyan ame dayîş û xeta têkoşînî ya serra newîye JINNEWSî rê ercnaye. 

 

Serra 2023yî bi binpaykerdişan derbaz bî… 

 

Gulserene da zanayîş ke serra 2023yî serrêke zehmet bî û problem her ke şî giran bîyî û vat: “ÎHD 37 serrî yo têkoşînêk gird rayîr ra beno. Ma vera şîdet û binpaykerdişê heqan de têkoşîn kenê. Dimayê serra 2016 bi OHALî reyde binpaykerdiş zêde bîyî. Bi taybetî azadîya fikir ame astengkerdiş. Emserr zî bi astengkerdişan derbaz bî. Bi qanûnê dezenformasyonî heme çalakî û bernameyê paştîdayîşî ameyî astengkerdiş. Ameyî terorîzekerdiş. Nê heme sûc ameyî hesibnayîş.” 

 

Qerarê DDByî bê tesîr mend 

 

Gulserene qiseykerdişê xo wina dewam kerd: “Şîdetê serê komelî û tepişteyan zêde bî. Xeylê binpaykerdişê heqan ameyî ciwîyayîş. La tu kerdoxêk zî nêame muhakemekerdiş. Polîtîkayê bêcezawerdayîşî zêde bî. Dadîyê Şemeye 30 hewteyan pêser ameyî destbendkerdiş. Çalakîya înan ameye astengkerdiş. Nê prosesi de vera qerarê Mehkemaya Desturê Bingeyîn, qerar ame binpaykerdiş.”

 

Şer û krîz vejîya sewîyeya tewr cor 

 

Gulserene dîyar kerd ke seranserê serre de şer û pêrodayîşî dewam kerdê û wina vat: “Polîtîkayê şerî û feqîrî zaf berz bî. Komel bi endîşeyîn o û semedê komeleyan, semedê paştdayîşî muracat kenê. Semedê nê zî her raşte de cinî, tutî, kedkar û zîndanan de nêçareserî yena ferzkerdiş. Rejîmê otorîterî vera çareserî metodê pelçiqnayîşî tercîh kenê. Tepişteyan dest bi grevê vêşanîye kerd. Tepişteyî semedo ke vengê xo bidê eşnawitiş zêde îmkanê înan çin o. No semed ra zî muracatê grevê vêşanîye kenê. Ganî pawitoxê heq, huqûq û rêxistinê weşîye hîsgêr têbigêrê û vîşêrê nê polîtîkayan têkoşînêk xurt bikerê.”

 

Do têkoşînê heqî dewam bikero

 

Gulserene dîyar kerd ke îqtîdar her ke şino verê xo dano helwestêk bêhuqûqî û rejîmê nêzelalî awan keno û wina vat: “Bi qerarê DDByî peymanê mîyanneteweyî dewre ra yenê vetiş. Îqtîdar berpirsyarîyê xo yê huqûqê mîyanneteweyî peygoş keno. Ma Hewteyê Heqê Merdiman de derheqê çareserî de munaqeşe kerd. Heqê merdiman, merdimayî yo. Têkoşînê heqî ferz o, lazim o. Ma do têkoşînê xo dewam bikerê. Ez venga têkoşînê hempar pêro kesî kena. Serra neweyî her kesî rê pîroz kena.”