Rozerîn Gultekin

 

AMED - Komeleya Cinîyan a Rosaye 5 serrîya xo pey de verda. Endama Heyetê Rayîrberîye Ezgî Sila Demîre derheqê serrgêra awanbîyayîşê Komeleya Cinîyan a Rosaye de wina vat: “Rihê ma bi qaseyê ke hemverê negatîfbîyayîşî ra şino, ganî yo. Ma do têkoşîn dewam bikerê." 

 

Tirkîya de serra 2016î ra dima çarçeweya Rewşa Asayî (OHAL) de Qerarnameyê Hukmê Qanûnî (KHK) ameyî vetiş û bi KHKyê ke ameyî vetiş TEWRÊ Kongreyê Cinîyanê Azade (KJA) xeylê dezgehê cinîyan ameyî girewtiş. Sewbîna qeyûm tayînê şaredarîyê Partîya Herêmê Demokratîke (DBP) ameyî kerdiş û xeylê dezgehê cinîyan ê girêdayeyê şaredarîye ameyî girewtiş. Nînan ra dima cinîyê Amedî 29ê Kanûna 2018î de Komeleya Cinîyan a Rosaye akerd. Komeleya Cinîyan a Rosaye seba vernîgirewtişê şîdetê serê cinî û tutan û seba paştîdayîşê cinîyan ameye îlankerdiş. Endama Heyetê Rayîrberîye Ezgi Sila Demire derheqê serrgêra awanbîyayîşê Komeleya Cinîyan a Rosaye de û xebatê ci de qisey kerd.

 

'Embazê kedkarî Rosaye awan kerdî' 

 

Ezgîye da zanayîş ke xeylê embazê înan ê kedkar ameyî têkişt û Rosaye awan kerdî û wina vat: "Vera kede û destkewtişê cinîyan de hêrişêk cidî estbî. Vengîyêk winasî estbî coka ra zî lazimî bi awankerdişê Rosaye virazîya. Xebetêke ma yê serê esasê zerrîwazî est a. Polîtîkayê ma yê vera şîdetê serê cinîyan est o. Seba çareserîyê probleman cinîyan muracatê Rosaye kerd. Ma paştîdayîşê huqûqî dane cinîyan.” 

 

'Rosaye mîyanê raşteyê komelkî de cayê xo girewt' 

 

Ezgiye dîyar kerd ke vera astengîyan zî Rosa mîyanê 5 serrî de mîyanê raşteyê komelkî de ca girewt û bîya komel û wina vat: “Dezgehê herêmî bi asanî eşkenê bêrê manîpulekerdiş û krîmînalîzekerdiş. Coka ra karêk ke yeno kerdiş eşkenê bi rehetî bêrê îlegalîzekerdiş. Semedo ke wina yenê mojnayîş coka ra vermuhakemekerdişêk vera dezgehan zî awan beno. Bi qaseyê girseyêk ma xîtabê înan kenê, girseyo ke ma xîtabê înan nêkenê zî est ê. 5 serrî seba rêxistinê komelê sivîl demêk derg nîyo la mîyanê nê wextî de bawerîya cinîyan bi Rosaye virazîya. Wexto ke ma raşteyan de bi cinîyan reyde yenê têhet û ma înan reyde qala amancê komeleye kenê bi baldarî ma goşdarî kenê. Cinî wexto ke vînenê amancê Rosaye têkoşînê hemverê şîdetê serê cinîyan o, bawerîya înan bi Rosaye virazîyena. Rosa mîyanê raşteyê komelî de cayê xo girewt. Coka ra ma eşkenê vajê ke Rosa bî komelkî.”

 

'Têkoşînê ma meşru yo' 

 

Ezgiye vist vîr ke Rosaye Kurdistan û Tirkîya de mîyanê xeylê tor û platforman de cayê xo girewt û wina ard ziwan: “Ma bi dezgehê Rojawanî reyde zî bi asanî têkilîye ronî û ma rojava xo bi înan reyde pare kenê û munaqaşayan pê anê. Coka ra Rojawan de mesele bi hawayêkêo bîn yena munaqaşakerdiş. Rosa seba ke nizdîbîyayîş bibedelna hêzêk a. Tesîrê Rosaye na nuqta de baş o. Coka ra zî xeylê operasyon vera Rosaye de virazîyayî. Xeylê embazê ma ameyî destbendkerdiş û tepiştiş. Ma bi destdergîya hukmî reyde rî bi rî manenê. Wexto ke merdim karêk baş bikero beno hedef. Vera nê caardişand e reyna zî ma cehd kenê ke serê payan de bimanê û têkoşîn bikerê. Ma bi israr vanê ke têkoşînê ma meşru yo. Têkoşînê ma perspektîfê cuye yo. Ma raşteyê ke cinî tede şîdet vînenê de polîtîkayan aver benê. Cigêrayîşê rayîrê çareserîye hedefê ma yê bingeyîn o. Ma do têkoşînê xo dewam bikerê."

 

'Rihê me ganî yo' 

 

Ezgîye qiseykerdişê xo yê peyênan de ard ziwan ke mîyanê prosesêk zehmetin ra derbaz benê û vera heme zehmetîyan bi bawerîyêke têgêrenê û ê do nika ra tepîya zî dewam bikerê. Ezgîye da zanayîş ke ê do bi fedakarîye prosesê neweyî pêşwazî bikerê û wina vat: “Rihê ma bi qaseyê ke hemverê negatîfbîyayîşî ra şino, ganî yo. Ma do têkoşîn dewam bikerê."