STENBOL - Temsîlkarê rêxistinê cinîyan da zanayîş ke do vindertişê xo yê bi qerardar ê raşteyê têkoşînî serra 2024 de zî dewam bikerê û wina vat: “Ma sey cinî serra 2023yî bi têkoşîn qedêna. Ma bi nê têkoşînî şinê serra newe. Vera şîdetê camêrd dewlete de, vera teda û îşkenceyî de ma tena nîyê û ma do têkoşînê xo dewam bikerê.” 

 

Cinîyan vera şîdetê camêrd dewlete, îşkence û tedaye de serra 2023yî de zî xover da. Cinî serewedarnayîş û têkoşînê xo raşteyan de gird kerd û paştîdayîşê pîya gird kerdî. Cinî vera polîtîkayê qirkerdişî de raşteyan de, verê edlîyeyan de, kuçeyan de xover da. 

 

Rêxistinê cinîyan derheqê xetê têkoşînî yê serra 2024î de JINNEWSî rê ercnayîş kerd. 

 

Vera şîdetî de do bi têkoşînî bibê cewab 

 

Endama Taxa Pawitişî ya Cinîyan Gokçe Kormaze da zanayîş ke cinîyan 25ê Teşrîna Peyêne de raşteyan de vera şîdetê camêrd dewlete de waştişê xo ardî ziwan û wina vat: “Îqtîdar serê cinîyan ra wazeno bîyayîşê xo awan bikero. Wazeno seke şîdetê camêrd dewlete normal bo bimojno. Ma têgêrayîşê femînîstî nê çîyî xerepna. Ma sey probleme komelkî reyna ard rojeve. AKP şîdetê camêrdî bê ceza verdeno. Wazeno bi no hawa komelî bixerepno." 

 

'Cinî vejîyayîşê raşteyan de bi israr ê’ 

 

Gokçeye dîyar kerd ke deme peyênan de hîna zêde vejîyenê raşteyan û vat: “Ma vera îqtîdarê faşîst de serewedarnayîşê xo gird kenê. Ma do her tim kuçeyan de têkoşînê xo dewam bikerê. Ma do têkoşînê vera şîdetê camêrd dewlete dewam bikerê. No îqtîdar o faşîst dişmenê cinîyan o. Heme rojnamegerê kurd fînîyayî zîndanan. Wexto ke nê çîyî kenî zî qala keye kenê û dima ra pê anê. Têkoşînê cinîyan ê vera nê çîyî xeylê muhîm o. Do cinî her tim vera sîstemê yewcamêrdî de vinderê.”

 

'Ma do bi têkoşînêke newe serra newe pêşwazî bikerê' 

 

Endama Paştîdayîşê More Seda Yanmişe ard ziwan ke serra newe hem seba cinîyan û hem zî seba şarî zehmet derbaz bî û wina vat: "Ma hişmendîya paştîdayîşî bi cinîyan reyde aver berd. Dimayê erdlerzê 6ê Sibate ke merkezê ci Mereş bî ma cinî ameyî têhet û ma têkoşînê xo gird kerd. Nika zî têkilîya ma ya herêma erdlerzî dewam kena. Ma weçînayîşêk xo pey de verda. Nê prosesê weçînayîşî de zî derheqê cinîyan de ma xebate da rayîr ra berdiş. Ma bajarê ke tedeyî de bi cinîyan reyde yenê têhet. Ma atolyeyan pê anê. Ma zanê ke ma bi rêxistinbîyayîşî eşkenê dewlete rê vajê vindere.”

 

'Ma do hêzê cinîyan zêde bikerê' 

 

Sereka Komeleya Wextê Cinîyan Dîlek Başalane da zanayîş ke şîdetê serê cinîyan her ke şino zêde beno û wina vat: “Şîdet her ke şino zêde beno. Ma kewenê serra 2024î la ma bi xeylê hêrişan reyde rî bi rî manenê. La têkoşînêk ma yo ke hêz dano ma est o. Ma stratejîyê ke ma do senî bi hîna bi hêz bibê munaqaşa kerd. Ma do bi hawayêkê hêz derbazê serra newe bibê. Ma do têkoşînê cinîyan raşteyê mîyanneteweyîye de vila bikerê. Ma bi israr ê.” 

 

Venga girdkerdişê rêxistinbîyayîşê cinîyan 

 

Dîleke dîyar kerd ke ê do rêxistinbîyayîşî gird bikerê û venga paştîdayîşê seba xurtkerdişê rêxistinbîyayîşê cinîyan kerd û wina vat: “Ma bawer kenê ke na serre biba seserra cinîyan. Dînamîkê têkoşînî ma yê. Yê ke her raşteyî de yî zî ma yê. Wexto ke ma yenê têhet û ma yewbînan vînenê ma zanê ke ma çend bi hêz ê. Coka ra têkoşîn û rêxistibîyayîşê ma pîya hîna gird beno. Ez venga heme cinîyan kena ke nê têkoşînî bi rêxistinkerde nas bikerê."