Mîdye Miqted

 

HELEB - Cinîyê Taxa Şêxmeqsûdî yê Helebî ke tewrê rayîr ra şîyayîşê vera hêrişanê dewleta tirkan bîyî reaksîyon mojnayî û wina vatî: “Hêriş û îşxalkerîyî rê êdî bes o! Ewro na dewlete hêz û şarê ma kena hedefê xo. Sewbîna îstasyonê kehrebeyî û gidaye kena hedef. La seba ke no şar timî têkoşînê xo dewam keno coka ra zî do qet dewlete tirkan nêresa amancê xo.” 

 

Rayîrberîyê Xoserîya Demokratîke yê Bakur û Rojhelatê Sûrîye da zanayîş ke dewleta tirkan 25ê Kanûne de 40 reyan hêriş pê arda, 8 hemwelatijî netîceyê nê hêrişan de dinyaya xo bedelnayî û 8 hemwelatijî zî birîndar bîyî. Rayîrberî dîyar kerd ke 2 hezar û 200 dewî û bajarî tarîye de ameyî verdayîş. Hemwelatijê Taxa Şêxmeqsûdî yê Helebî ke tewrê rayîr ra şîyayîşê vera hêrişanê dewleta tirkan bîyî reaksîyonê xo ardî ziwan û nêrazîbîyayîşê xo mojnayî.

 

'Do dewleta tirkan nêresa amancê xo' 

 

Sûad Şêxoye da zanayîş ke ê do vera hêrişan de sereyê xo çewt nêkerê û do her tim xover bidê. Sûade wina vat: “Ewro ma vera hêrişê dewleta tirkan ya îşxalkere de vengê xo berz kenê û nê hêrişan şermezar kenê. Ewro dewleta tirkan wazena bîyayîşê şarê kurdî raşte ra wedarna la do dewleta tirkan nêresa amancê xo. Ma do her tim vera hêrişanê îşxalkere de rêxistinê xo xurt bikerê.” 

 

'Ma do her tim xover bidê û îşxalkerî birijnê’ 

 

Sûade ard ziwan ke dewleta tirkan amanc kena ke destkewtişanê şarê kurdî raşte ra wedarna û wina dewam kerd: “Ewro dewleta tirkan ya îşxalkere hêrişê xo yê serê herême dana dewamkerdiş. Dewleta tirkan bi hêrişê serê Rojawanî wazena meseleya xo ya krîzê ekonomîye û têmîyanîya mîyanê xo binimna. Eynî wext de amanc kena ke projeyê Xoserîya Demokratîke raşte biwirzna la se beno wa bibo ma do her tim xover bidê û îşxalkerî çinî bikerê." 

 

'Ma do vera hêrişanê dewleta tirkan de xover bidê' 

 

Sewbîna cinîya bi nameyê Emîne Esefe zî reaksîyon mojna û nêrazîbîyayîşê xo yê vera hêrişan ard ziwan û wina vat: “Hêriş û îşxalkerî rê êdî bes o! Ewro na dewlete hêz û şarê ma kena hedefê xo. Heto bîn de îstasyonê kehrebeyî û gidayî kena hedef. La semedo ke no şar her tim têkoşînê xo dewam keno coka ra zî do qet dewleta tirkan nêresa amancê xo. Ma do vera hêrişanê dewleta tirkan de xover bidê. "