Elfazî Toral

 

STENBOL - Meclîsê Ciwanan ê DEM Partîye vera polîtîkayê şerê taybetî de 2023yî ra dekewtişê serra newe bi çalakî û aktîvîteyan do azadîye biqîrê û bi rêxistinbîyayîş û mekanîzmayê têkoşînî dewam kenê. 

 

Îqtîdar Kurdistan û Tirkîya de bi teda, şîdet û qirkerdişan xo bîyaye keno. Bi serran o hemverê şarê kurdî de polîtîkayê şerê taybetî rayîr ra beno û şarê kurd vera nê de têkoşîn keno. Îqtîdarê AKP-MHPyî vera hêrişan de têkoşîn keno. Yew linga ke vera hêrişan de têkoşîn kena Meclîsê Ciwanan ê Partîya Têduştî û Demorkasîyî (DEM Partî) yo. Rojeva esasî ya ciwanan tecrîdê giran ê serê Rayberê PKKyî Abdullah Ocalanî yo û cinî û ciwan bi çalakîyan dîyar kene ke nê sîstemî qebûl nêkenê. 

 

Ciwanan waştişê azadîye qîrayî 

 

Ciwanê ke wayîrê hêzê dinamik ê komelî yî emser zî vera tecrîd, asîmîlasyon, ajanî, fuhuş, tîryak, tepiştiş, destbendkerdiş û her tewir polîtîkayê şerê taybetî de vindertî. Vera heme tedayan ciwanan dîyar kerd ke ganî hetê qewimîyayîşê sîyasî, ekonomî, komelkî û kulturî de wayîrê vatişî bê. Ciwanan raşteyan de vera polîtîkayê îqtîdarî de vengê azadî û demokrasîyî qîrayî. 

 

Ma çalakî û aktîvîteyanê yew serrî yê Meclîsê Ciwanan ê DEM Partîye arê da. 

 

Kampanyaya ‘Rêzila Cuye’

 

* 6ê Sibata 2022yî de erdlerzêk gird ke merkezê ci Mereş bî û tesîrêk giran 11 bajaran ser de kerd, virazîya. Meclîsê ciwanan ê DEM Partîye roja diyîne ê erdlerzî de bi kampanyaya ‘Rêzila Cuye’ kampanyaya paştîdayîşî ya mexdûranê erdlerzî reyde da destpêkerdiş. Çarçeweya kampayaye de ciwanî her cayê Tirkîya û Kurdistan ra şîyî herêma erdlerzî û paştîdayîş gird kerdî. Hatay, Semsur, Meletî û Mereş de bi tutan reyde aktîvîteyan pê ardî û parkê bi nameyê Ceylan Onkul û Ugur Kaymazî awan kerdî. 

 

Çalakî û aktîvîte 

 

* Bernameyê aşma Çele û Gulane de ciwanan xebatê weçînayîşî de ca girewtî. Ciwanan çarçeweya xebatê weçînayîşî de konferans, semîner, şolen, vîrardiş, roniştiş, seyran û xeylê aktîvîteyanê bînan pê ardî û ameyî têhet. Bernameyê 8ê Adare, 21ê Adare Newroze, 1ê Gulane û yadkerdişê şehîdê aşma Gulane pê ardî. Ciwanê unîversîte, ciwanê sosyalîstî, şoreşger û demokratî pîya çalakî pê ardî. 

 

Vera polîtîkayê şerê taybet kampanya

 

* Hezîrana 2023yî de ciwanan vera polîtîkayê şerê taybetî de kampanyaya ‘Vera şerê taybetî de têkoşînêk bi heybet’ dayî destpêkerdiş. Çarçeweya kampanyaye de kombîyayîş, seyran, pêvînayîş, turnuvayê futbol, voleybol û vilakerdişê vilawekan ameyî kerdiş. Xebatê kampanyaye hema dewam keno. 

 

Xebata kongreye

 

* Ciwanan 5ê Tebaxe de qerarê kongreye girewt û 24ê Kanûne de bi sloganê "Bîyayîşê Ciwanan" Amed de kongre pê ard. Kongre ra ver bi rojan her ca de seba kongreyî xebat ameyî rayîr ra berdiş.

 

* Kadikoyê Stenbolî de ciwanî vera tecrîdê serê Rayberê PKKyî Abdullah Ocalanî bi sloganê "Se beno wa bibo ma do xoverdayîşê Îmraliyî her ca de gird bikerê" rayîr ra şîyî.

 

* Serrgêra qetilkerdişê Jîna Emînîye de cinîyê ciwan yê DEM Partîye bi sloganê "Jin jiyan azadî" raşteyê Stenbolî de rayîr ra şîyayîş pê ard.

 

* Stenbol de vera cenazeya ciwanê kurdî yê ke dinyaya xo bedelnayî û cenazeyê ke qutîyan de şirawîyayî keyeyê înan rê bi sloganê "Şehîd nêmirenê" rayîr ra şîyayîşê protestoyî kerdî. 

 

* Vera tecrîdî de Taksîm de posterê Abdullah Ocalanî ame daliqnayîş. 

 

* Vera hêrişê Tirkîya yê hemverê Rojawanî de ciwanan xebatê daliqnayîşê pankartê "Vera kesê ke ma çinî kenê de biciwîyo xoverdayîşê Rojawanî" rayîr ra şîyayîş û mesajê do vera polîtîkayê şerî de vinderêne dayî.

 

* Hem ciwanê Ewropa, hem zî ciwanê Kurdistan û Tirkîya vera polîtîkayê dewlete de çalakîyê xo dewam kenê. Kampanyaya seba azadîya fîzîkî ya Abdullah Ocalanî ke dîyaya destpêkerdiş ya "Abdullah Ocalanî rê azadî, problemê kurdî rê çareserî" hetê ciwanan ra yeno girdkerdiş. 

 

Hemverfeka Meclîsê Ciwanan ê DEM Partîye Edanur Îbrahîmogluye derheqê têkoşîno ke rayîr ra benê de JINNEWSî rê qisey kerd. 

 

‘Şerê taybet serê heme komelî de est o’ 

 

Edanure da zanayîş ke îqtîdar bi polîtîkayê şerê taybetî verê xo dano şarê kurdî û ciwanan û cehd keno ke îdeolojîya xo pê bîyaro. Edanure wina dewam kerd: “Hedefê esasî yê nê polîtîkayan no yo ke muxalîfî bêrê pelçiqnayîş û bê tesîr bêrê verdayîş. Sebebê hende zêdebîyayîşê polîtîkayê şerê taybet, xeta têkoşînê ma vera yo. Dewlete hêrişan bena serê her kesî. Vişêrê sunî û tirkbîyayîş her kesî pelçiqneno. Dewlete senî ke vizêr yew dewlete, yew beyraqe, yew ziwan pawite ewro zî eynî çîyî kena.”

 

‘Ma hêvîye rêxistin kenê’ 

 

Edanure dewamê qiseykerdişê xo de ard ziwn ke bi polîtîkayê şerê taybet nasnameyê ciwanan hedef yeno girewtiş û cehd yeno kerdiş ke bê tesîr bêrê verdayîş. Edanure wina vat: “Ma zanê ke ciwanî têkoşînî ra dûr bikewê do komel lez bêro çinîkerdiş. Na nuqta de dewlete polîtîkayê şerê taybetî her tim dewre de verdena. Ma vera polîtîkayê şerê taybetî de hêviye rêxistin kenê. Ma vera hêrişê hemverê nasnameyê xo de têkoşîn kenê. Sîyasetê ma tîya ra yeno. Ewro ma zanê ke her ca de tîryak zaf zêde yeno şuxilnayîş. Cinî her roje ver bi feqîrî, çinîbîyayîş û întîxarî ra şinê. Ma nê çîyî her ca de vînenê. Feqîrî kronîk bîyo.”

 

‘Waştişê îqtîdarî oyo ke probleman giran bikero’ 

 

Edanure pêvînayîşê butçeyî yê meclîsî dewam kenê ard vîr û wina vat: “Bi 10 rojî yo meclîs de pêvînayîşê butçeyî est ê. Semedê feqîrî peynî bibo butçeyêk wezaretê berpirsîyar est o? Nê. Eksê ci problem giranêr kenê. Semedê butçeyê wezaretê pawitişî milyarî yenê visnayîş la semedê perwerde, spor, ciwan û cinîyan tu çîyêk çin o.” 

 

‘Têkoşînê ma dewam keno’ 

 

Edanure wina qedêna: “Ma çîyê ke ciwanan rê yeno ferzkerdiş qebûl nêkenê. Ganî ciwanî bibê kerdoxê siyasetî. Ganî unîversîte, taxan de her cayê ke ciwanî est ê, bieşkê derheqê cuya xo de qeraran bidê. Esasê sîyaseto ke ma kenê no yo. Ma rêxistinbîyayîşêk pîya eşkenê biser bikerê. Ma kampanyaya 'Hemverê şerê taybetî de têkoşînêk bi heybet’ bi amancê awankerdişê hîsî de pê ard. Kampanyaya ma dewam kena. Ma do xebatanê xo dewam bikerê.”