Mîdye Miqted

 

HELEB - Cinîyê Taxa Şêxmeqsûdî yê bajarê Helebî vera hêrişê dewleta tirkan de reaksîyon mojnayî û vatî: "Ma paştîya şarê xo û şerwananê azadîya Kurdistanî de yê." 

 

Dewleta tirkan 24 saetê peyênan de Qamişlo, Amudê û Kobanê de 22 merkezê xizmetî ke mîyanê înan de nêweşxane zî estbî bombarduman kerd. Hêrişan de 8 kes dinyaya xo bedelnayî û 13 kes zî birîndar bîyî. Derheqê hêrişan de cinîyê Taxa Şêxmeqsûdî ya Helebî reaksîyon mojnayî û nerazîbîyayîşê xo nîşan dayî û vatî: “Hemverê nê hêrişan de vengê xo berz bikerê." 

 

'Dewleta tirkan çimeyê cuye kena hedef' 

Hemverê hêrişan de cinîya bi nameyê Fatme Cermîle reaksîyonê xo wina mojna û vat: “Ewro dewleta tirkan ya îşxalkere bi heme çekê xo yê giran û qedexekerde hêrişê herêman kena. Eynî wextî de raşteyê cuye, dezgeh û komeleyî pêroyî, çimeyê gaz û petrolî kena hedefê xo. Dewleta tirkan çimeyê cuye kena hedef.” 

 

‘Hemverê nê hêrişan de vengê xo berz bikerê’ 

 

Dewamê qiseykerdişê xo de Fatma da zanayîş ke dewleta tirkan ewro hemverê şerwananê azadîya Kurdistanî de têk şina û coka ra zî hêrişê sivîlan kena û wina vat: “Dewleta tirkan her ke bi çekê kîmyewî û qedexekerde hêrişê şerwananê azadîya Kurdistanî kena, hemverê înan de her reye têk şina. Coka ra zî hêrişê xo yê herêman zêde kena û sivîlan kena hedefê xo. La ma sey cinîyê Taxa Şêxmeqsûdî timî hemverê nê hêrişan de vengê xo berz kenê û bi şarê xo reyde benê yew dest."

 

'Ma fek dewaya xo ra vera nêdanê’ 

 

Peynîya qiseykerdişê xo de Fatmaye dîyar kerd ke yeno waştiş ke sîstemê Rayîrberîyê Xoser bêro çinîkerdiş û wina dewam kerd: “Rayîrberîyê Xoserîya Demokratîke ya Bakur û Rojhelatê Sûrîye 12ê Kanûne de pêkerdişêk newe yê komelkî ke 134 nuqtayan ra pê yeno, tesdîq kerd. Bi tesdîqkerdişê pêkerdişî newe ra rêxistinkerdişê Xoserîya Demokratîke yeno amanckerdiş. La ewro dewleta tirkan seba ke nê pêkerdişan veng bivejna hêrişê xo bena serê şarê herême. Netîceyê de zî plan kena ke projeye Xoserîya Demokratîke raşte ra bêra wedaritiş la ma cinîyê Taxa Şêxmeqsûdî timî paştîya şarê xo de yê. Ma fek dewaya xo ra vera nêdanê.” 

 

'Ma do paştîya şar û şerwananê xo de bê' 

 

Sewbîna cinîyan ra cinîya bi nameyê Emîra Mihemede zî reaksîyonê xo yê hemverê hêrişan mojna û wina vat: “Dewleta tirkan timî hêrişê xo yê hemverê herêmanê ma zêde kena. Semedo ke hemverê şerwananê azadîya Kurdistanî de rijîyena heyfê xo şarê sivîlî ra gêna. La ma do timî paştîya şerwananê xo û şarê xo de bê.”