AMED - Delegasyonê Cinîyan ê Mîyanneteweyî zîyaretê xo yê Amed û Stenbolî peynî kerdî. Julîe Warde amanc û çimdarîyanê xo yê derheqê zîyaretê de ercnaye û wina vat: “Ma wexto ke derheqê cinî û ciwanan de fikirîyenê ma vînenê ke hukmat qels û tersonek o.” 

 

Delegasyonê Cinîyan ê Mîyanneteweyî ke 7 kesî ra pê ameyêne û mîyanê ci de huqûqnas, ekolojîst, temsîlkarê dezgehanê sivîl yê welatê cîya cîya yê Ewropa estbî, mabenê tarîxanê 9-14ê Kanûne de Amed û Stenbol de zîyaret pê ardî. Amancê zîyaretî no bî ke derheqê tecrîd û binpaykerdişê heqan de raporêk bêro hadrekerdiş. Heyetî sewbîna Amed de şî zîyaretê Nobeda Edaletî. Yew kesê ke mîyanê heyete de ca girewtêne parlementere Julîe Warde bî. Julîe derheqê zîyaretê Amedî de çimdarîyanê xo ard ziwan. 

 

Julîe Warde dîyar kerd ke no zîyaretê ci yê ewil ê Amedî yo û vat ke vere cû zî Amed de bi têgêrayîşê cinîyan ê kurdan reyde xebitîyayê û vat: “Ma heme bi perspektîfê cîya vejîyayî rayîr û bi cinîyanê kurdan reyde eleqeder benê. Amancê ma yê na babete de no yo ke ma hişmendîyêke awan bikerê. Verê cû wexto ke ez endama parlamentoye bîya, bi têgêrayîşê cinîyanê kurdan reyde xebitîyaya. Nika ez parlamento de biba zî têkoşînê cinîyanê kurdan berz kena. Ez wazena nê çîyî rêxistinê cinîyan rê û bi taybetî zî prosesê demokratîke ya Rojhelatê Mîyanênî vaja.” 

 

‘Kesê ke têkoşînê azadîye rayîr ra benê senî bene tehdîd’ 

 

Julîe da zanayîş ke bi wesîleya Hewteyê Heqê Merdiman ameya Amed û vat ke heqê merdiman rêzdarî nêvîneno û dormeyê Nobeta Edaletî hetê polîsan ra girîyayo binê ablûqa. Julîe wina dewam kerd: “Bi merdime ke zilm dîyî û têkoşîn rayîr ra benê reyde ameyîşê têhetî muhîm o. Ma serra 2015î de zî ameyî tîya û ma bi cinîyan reyde problemanê xo pare kerd û ma reqs kerd. Dima ke ma otele ra vejîyayî polîsan dormeyê ma girewt. Seba Heskîfî ma tewrê çalakîyan bibî. Uca de zî ma çîyan dî. Na rewşêka normal nîya. Bi no hawa demokrasî aver nêkewena. Gelo kesê ke seba azadî û demokrasîye têkoşîn kenê do tehdîdêk senî awan bikerê?”

 

 ‘Mi waşt newera şahidîye bikera’ 

 

Julîe ard ziwan ke sey endamê Delegasyonê Cinîyan ê Mîyanneteweyî şîyî zîyaretê çalakîkeranê Nobeta Edaletî û wina dewam kerd: “No prosesêk zehmetin o. Mi waşt newe ra şahidîya têkoşînî bikera. Têkoşînê keyeyan bi heybetin o. Her kes way û birayê xo vînî kerdo. Wexto ke mi dejê înan goşdarî kerd mi xo nizdîyê înan hîs kerd.”

 

 ‘Her kes fikrê Abdullah Ocalanî qisey keno’ 

 

Julîe qiseykerdişê xo yê peyênan de da zanayîş ke şikitişê tecrîdî reyde do problemê Tirkîya û Rojhelatê Mîyanênî bêro çareserkerdiş û wina peynî ard: “Fikir û ercnayîşê Abdullah Ocalanî xeylê bi tesirîn ê û heme dinya nê çîyî qisey keno. Tecrîdê serê Abdullah Ocalanî ne huqûqî yo û ne zî demokratîk o. Amed cayê hêvîye yo. Tîya remzê têkoşînê polîtîk o. Tîya cayê hêvîye yo.”