Elfazî Toral

 

STENBOL - Waya Mazlum Dogano ke kadroyê serkeşî yê PKKyî bî, Serap Mutlu Dogana ke paştîdayîş da çalakîya Nobeda Edaletî wina vat: “Ganî heme demokratî, kurdî û şar nê têkoşînî de têkişt de ca bigîrê. Xelisnayîşê her kesî tîya ra yeno. Ganî tecrîd bêro peynîkerdiş. Ganî heme şarê Tirkîya paştîdayîş bido têkoşîn û xoverdayîşî.” 

 

33 aşmî yo Rayberê PKKyî Abdullah Ocalano ke binê tecrîdêk giran de Girava Îmraliyî de yeno tepiştiş ra xebere nîna girewtiş. Tirkîya, Kurdistan û her çar hetê dinya de bi waştişê azadîya fîzîkî ya Abdullah Ocalanî têkoşîn dewam keno. 27ê Teşrîna Peyêne de zîndanan de bi nê waştişî tepişteyan çalakîya grevê vêşanîye dayî destpêkerdiş û 20 rojî yo ke çalaki dewam kena. Merdimê tepişteyan seba eynî waştişî Amed, Mersîn, Wan, Edene û Stenbol de dest bi Nobeda Edaletî kerdî. 

 

Paştîdayîş dewam keno 

 

Bi serkêşîya Komeleya Keyeyê Tepişteyan a Marmaraye (MATUHAYDER) Stenbol de Nobeta Edaletî dîya destpêkerdiş û bi desan kesî seba paştîdayîşî şinê zîyaretê kesê ke nobete de yê. Nobeta Edaletî awanîya DEM Partî a Bagcilarî de dewam kena. Yew kesê ke şinê zîyaretê nobete waya Mazlum Doganî, Serap Mutlu Dogane ya. Serape derheqê Nobeda Edaletî de JNNEWSî rê qisey kerd. 

 

Xoverdayîşî silam kerd 

 

Serape dîyar kerd ke tecrîdê giran ê Îmraliyî şermezar kena û netîceyê polîtîkayê îqtîdarî de tepişteyê sîyasî kewtî grevê vêşanîye û wina vat: “Ez hem tepişteyan û hem zî keyeyê înan silam kena. No xoverdayîşê înan can û zerrî ra pîroz kena. Ma nê zilmo ke yeno rayîr ra berdiş 12ê êlule ra zanê. Ez Birêz Ocalan û hîrê tepişteyê kişta ci rê silaman şirawena.” 

 

Seba heme şaran venga têkoşînî 

 

Serape qiseykerdişê xo wina dewam kerd: “Heta ke tecrîdê Îmraliyî peynî nêbo tecrîdê serê komelî zî nêwirzeno. Tena yê tepişte nê yê teberi zî eynî probleman ciwîyenê. Ganî hem kurdî hem zî şarê bînî têkoşîn bikerê. Ganî seba heme bêhuqûqîyan têkoşîn bibo. Yê tepişte tutê ma yê, way û birayê ma yê. Ez venga têkoşînî bi heme kesî kena. Bi serran o serê şarê kurdî de teda û îşkence pê yeno. Vera na raştîye de kurdî teda qebûl nêkenê. Ganî ma nê tecrîdî bişiknê. Çareserî têkoşîn o.” 

 

Têkoşînê topyekun 

 

Serape wina peynî kerd: “Ganî heme şar seba azadîya xo têkoşîn bikero. Ganî ma dest bidê yewbînan û têkoşîn bikerê. Heta ke tecrîd nêro şikitiş xelisnayîş çin o. Ganî heme kes dest bido yewbînan û pîya têkoşîn bikero. Xelisnayîşê her kesî têkoşînî ra derbaz beno. Ganî heme şar topyekun têkoşîn bikero.”