Rabîa Onver

 

COLEMÊRG - Rayîrberê DEM Partîye yê Colemêrgî derheqê greve vêşanîye ke seba azadîya fîzîkî ya Abdullah Ocalan dîya destpêkerdiş de ercnayîşê xo ardî ziwan û vatî: "Seba çareserîya problemê kurdî û aştîyêk daîmî ganî tecrîd bêro peynîkerdiş." 

 

33 aşmî yo Rayberê PKKyî Abdullah Ocalanî ra xebere nîna girewtiş. 10ê Teşrîna Verêne de seba azadîya Rayberê PKKyî Abdullah Ocalanî bi sloganê "Abdullah Ocalanî rê azadî, probleme kurd rê çareserîya sîyasî" kampanyayêk dîya destpêkerdiş. Seba paştîdayîşê kampanyaye zî 27ê Teşrîna Peyêne de tepişteyê sîyasî yê Kurdistan û Tirkîya dest bi greve vêşanîye kerdî. Dima ra zî merdimê tepişteyan seba eynî waştişan Wan, Amed, Mêrsîn, Edene û Stenbol de dest bi çalakîya Nobeta Edaletî kerdî. 

 

Rayîrberê Partîya Têduştî û Demokrasîyî yê Şaran (DEM Partî) derheqê tecrîd, çalakîya grevê vêşanîye û Nobeta Edaletî de ajansê ma rê qisey kerdî.

 

'Ganî tecrîd bêro peynîkerdiş’ 

 

Alîye Tîmure destpêkerdişê qiseykerdişê xo de xoverdayîşê tepişteyan silam kerd û dîyar kerd ke ganî sere de tecrîdê hemverê Rayberê PKKyî Abdullah Ocalanî û zîndanan bêrê peynîkerdiş. Alîye wina ercnayîşê xo ard ziwan: “Bi serran o ma Rayberê xo ra xebere nêgînê. Pêvînayîşê keye û avûkatan yeno astengkerdiş. Ma nika rewşa ci ya peynî nêzanê. Ganî şarê kurdî seba peynîkerdişê tecrîdê pêro zîndanan bikewo têgêrayîşî mîyan. Eke tecrîdê serê Rayberê ma bêro wedaritiş do tecrîdê serê heme tepişteyan û şarê kurdî zî peynî bibo.” Alîye da zanayîş ke nika zîndanan de tepişteyî xoverdayîşêk gird rayîr ra benê û wina vat: “Ganî Şarê kurdî wayîrê xoverdayîş û têkoşînê tepişteyan bivejîyo. Ez wazena ke waştişê tepişteyan bêrê qebûlkerdiş. Wa gamêke bêro eştiş. Ez yewna reye veng kena ke her kes wa wayîrê xoverdayîşê tepişteyan bivejîyo.”

 

'Ma do waştişê tepişteyan biresnê’ 

 

Hatîce Uçare dîyar kerd ke tepişteyî mîyanê çar dêsan de dest bi xoverdayîşêk kerdî û wina ercnayîş kerd: “Bi xoverdayîşî wazenê vengê xo biresnê pêroyê dinya. Ma do zî nê vengî bieşnawê û bidê eşnawitiş. Çalakîya grevê vêşanîye huqûq de est o. Ma do vengê tepişteyan biresnê heme cayan. Tirkîya problemê kurdî û tecrîdî nêvînena. Çi heyfo ke medyaya terefgire grevê vêşanîye yê tepişteyan nêvînena. Goş nêdîyeno waştişê tepişteyan. Ganî hukm xoserîya xo ispat bikero. Seba çareserîye û aştîye game yewine peynîkerdişê tecrîdî yo û yê bîn zî çareserîya problemê kurdî yo."