Pelşîn Çetînkaya

 

RIHA - Vera tedaya xoverdayîşê karkerê Fabrîqaya Tekstîlî ya Ozakî dewam keno, karkeran dîyar kerdî ke heta waştişê înan ca nêarê do xoverdayîşê xo dewam bikerê û vatî: "Patron zerre de û walîtî zî teber de teda keno." 

 

Karkerê Ozak Tekstîlî yê 1ine Herêma Meslegî yê Organîze (OSB) yê Riha vera teda, mobbîng, tehdîd û vetişê karî çalakîya fekverdayîşê karî dabî destpêkerdiş. Karkerî xeylê reyan verê fabrîqaya de raştê hêrişan ameybî û ameyî destbendkerdiş. Karkeran dîyar kerd ke heta ke waştişê înan nêrê caardiş do çalakîya xo dewam bikerê. Sewbîna xeylê dezgeh û rêxistinê sivîl zî bi zîyaretê xo paştîdayîş danê karkeran. 

 

Karkerê cinî ajansê ma JINNEWSî rê qisey kerdî û waştişê xo ardî ziman. 

 

'Ma karê xo wazenê’ 

 

Xebatkara Ozak Tekstîlî Şeyma Çavure dîyar kerd ke embazê înan bi bahaneyan kar ra yenê vetiş û vat: “Kar de xeylê reyan bi tedaye reyde yenê rî bi rî. Vera şîdetî de xebatkar bîyî yew û binê banê BÎRTEK-SENî de xo bi rêxistin kenê. Roja destpêkerdişê çalakîye ra heta ewro cendirme hemverê çalakîya ma de barîkat rona. Rayîro ke yenê û şinê fabrîka ameyî girewtiş û ma Herêma Meslegî Organîzeye ra dûr fînayî. Her serê sibayî bi eynî rewşe vejîyenê vernîya ma. Bê qerarê dozgerîye ameyî ma 2 şewe û 3 rojan destbend kerdî." 

 

Şeymaye da zanayîş ke embaza ke kar ra ameye vetiş pêşnîyazîyê tazmînatî ci rê ame kerdiş û vat: “Telefonê ma kerdî û vatî ‘Ma do şima kar ra bivejê û tazmînat bidê şima.’ La ganî bêro zanayîş ke do xoverdayîşê xo dewam bikerê û heta ke fabrîka waştişê înan qebul bikero. Amancê ma kar ra vetiş û tazmînat nîyo, amancê ma no yo ke tepîya agêrê serê karê xo.”

 

'Ma şert û mercê zaf xirab de xebetîyenê’ 

 

Cinîya bîn ya ke Fabrîkaya Tekstîlî ya Ozakî de xebetîyena Beyza Nure zî dîyar kerd ke ê do qet fek xoverdayîşê xo ra vera nêdê. Beyzaye ard ziwan ke wazenê vengê xo her ca de bidê eşnawitiş û wina vat: “7 aşmî yo ez kargeh de xebetîyena. Heta nika xeylê tehdît bi mi ameyî kerdiş û bi mobîngî reyde ameya rî bi rî. Wexto ke ez nêweş bîya destur nêdayî mi. Xeylê embazê ma zî şîdetê psîkolojîk reyde yenê rî bi rî. Ma tîya de şert û mercê xiraban de xebetîyenê. Sendîkabîyayîş ra embazêk ma bîla sebeb kar ra eştî. Semedo ke ma eynî sebeban vera kar ra nêrî eştiş, ma dest bi vindarnayîşê karî kerd.”

 

'Zerre de karsaz û teber de zî walîtî ma rehet nêverdeno' 

 

Beyzaye ard ziwan ke zerre de karsaz û teber de zî hetê walîtîye ra raştê tedaye yenê û wina vat: “Cedirme bi awa şidetin û cop hêrişê ma kerdî. Parlementer tewrê çalakîya ma bîyî la goş nêdayî û hêrişê ma kerdî. Xeylê embazê ma birîndar bîyî. Walî paştîya patron de bî. Ewil vernîya kargehî girewtî, dima ra kişta camîî girewtî û tewr peynî zî ma vetî teber. La ma çalakîya xo dewam kenê.” 

 

'Heta ke waştişê ma qebûl bikerê do çalakî dewam bikera’ 

 

Beyzaye dîyar kerd ke seba çalakîye peynî biba ganî waştişê înan bêrê qebûlkerdiş û nê çîyan vat: “Ma wazenê embazê ma yê kar ra ameyî vetiş newe ra bigirîyê kar, şîdet, mobîng û tedaya zerre peynî bibê û sendîkaya BÎRTEK-SENî kişta ma de ya, ma reyde bikewa zerre.”

 

'Ma sere çewt nêkenê’ 

 

Xebatkara tekstîlî Bêrîvan Karakûrte dîyar kerd ke fabrîka înan xapênaya û vat: "Her çend ke vetişê ma nêbo zî vatî ‘Vetişê şima ame kerdiş’, ‘bêrê tazmînatê xo bigîrê’. La çîyêk winasî çinîbî. Ma her çîyo ke destê ma ra yeno kenê û seba ke ma bê bedelê keda ma bişirawê keye û wazenê belgeyê ke hadre kerdî bi ma bidê îmzakerdiş.” Berîvane tewr peynî da zanayîş ke ê do qet vera tedayan de sere çewt nêkerê.