Pelşin Çetinkaya

 

RIHA - Muracatê vernamzetî yê seba weçînayîşê herêmî dewam kenê. Hemsereka DEM Partîye ya Rihaye Garip Yeşile da zanayîş ke bi hawayêkê xo ra bawer ver bi weçînayîşî ra şinê û vat ke ê do bajaran newera awan bikerê. 

 

Xebatê weçînayîşê herêmî yê Partîya Têduştî û Demokrasîyî yê Şaran (DEM Partî) ke do 31ê Adara 2024î de bêro viraştiş Kurdistan û Tirkîya de dewam kenê. Na çarçewa de muracatê vernamzetî zî dewam kenê. Do muracat heta 20ê Kanûne dewam bikerê. Hemsereka DEM Partîye ya Rihaye Garip Yeşil û Hemverfeka Komîsyonê Muracatan Gulfehime Biniciye derheqê muracatan de qisey kerdî.

 

'Ma do qet şarî da dûrî nêbê’ 

 

Garibe qiseykerdişê xo de da zanayîş ke bi hawayêkê xo ra bawer ver bi weçînayîşî ra şinê û wina vat: “Ma do şaredarîyê ke serra 2019î de îqtîdar qeyûm tayînê înan kerd û îradeyê şarî ame xespkerdiş, newera bigîrê. Do şaredarî bibê keyeyê şarî. Ma do şaredarîyan goreyê îrade û waştişê şarî rayîr ra berê. Ma do qet mîyanê şarî ra dûrî nêkewê. Do raybaz û perspektîfê ma goreyê şarî bibê.”

 

'Vera înan polîtîkayanê çareserîye de DEM Partî ya’ 

 

Garibe dewamê qiseykerdişê xo de dîyar kerd ke îqtîdar 25 serrî yo polîtîkayê bêusûlî, talan, qirkerdiş, şîdetê serê cinîyan, tepiştişê cinîyan ê keyeyî de rayîr ra beno û wina vat: “Vera înan polîtîkayanê çareserîye de DEM Partî ya. Riha de kurdî, ereb û tirkî yew ê. Seba ke nê şarî pîya biciwîyî û pîya bajarê xo rayîr ra berê ganî ma cehd bikerê. Ganî şarê ma na babete de paştîdayîş bida ma." 

 

'Şaredarî keyeyê ma yê’ 

 

Garibe qiseykerdişê xo yê peyênan de venga wayîrvejîyayîşê şaredarîyan kerd û wina dewam kerd: "Bêrêne ma wayîrê şaredarîyanê xo bivejê. Ma şaredarîyê xo bajarê xo bi xo rayîr ra berê. Şaredarî keyeyê ma ya. Raşteyê pêvînayîşê cinîyan a. Vera çinîhesibnayîşê cinîyan de ma binê banê DEM Partîye de yenê têkişt. Do cinî pîya ser bikewê.”

 

'Şarê ma qerardaro ke wayîrê îradeyê xo bivejîyo’ 

 

Hemverfeka Komîsyonê Muracatan Gulfehime Biniciye zî ard ziwan ke muracatê vernamzetî heta 20ê Kanûne dewam keno. Muracatê vernamzetîye her roje zêde beno. Şarê ma qerardaro ke wayîrê îradeyê bivejîyo. Şarê ma qeyûman nêwazeno. Vera texrîbatê qeyûman şarê ma do weçînayîş de bi hawayêkê xurt cayê xo bigêro." 

 

Gulfehimeye tewr peynî da zanayîş ke wa her kes wayîrê îradeyê xo bivejîyo û vat: “Ma hêvî kenê ke her kes bi coşêk gird muracatê vernamzetîye bikero.”