Oznur Deger

 

MÊRDÎN - Hemsereka MEBYA-DERî ya Mêrdînî Gurbet Tekîne derheqê polîtîkayê şerê taybetî yê hemverê cenazeyan de qisey kerd û vat: "Serranê peyênan de cenazeyan bi kargoyan teslîmê keyeyan kenê. Cuya ma, hêsirê ma, zerrîya ma, ercê ma û her çîyê ma ê qutîyan de yo. Seba înan çîyêk şenik o la ê qutîyan de dinyayêke est a. Ma do wayîrê înan cenazeyan bivejê." 

 

Kurdistan de polîtîkayê şerê taybetî yê îqtîdarî dewam keno. Bi nê polîtîkayan ercê komelî yê şarî hedef yeno girewtiş. Bi taybetî zî zilmê hemverê cenazeyan û keyeyan. Heqê definkerdişî û hurmetê hemverê cenazeyan çinî yenê hesibnayîş. Cenaze bi qutîyan kargoyî yenê şirawitiş. Goristanî yenê texrîbkerdiş. Cenazeyê ke nasnameyê înan û keyeyê înan dîyar ê bi aşman goristananê bêkesan de yenê vindarnayîş. Xeylê reyan keye bi serran nêeşkenê xo biresnê cenazeyê tutanê xo. 

 

Tewr peynî cenazeya Menfiyat Elçîçekî 29ê Teşrîna Peyêne de Stenbol de mîyanê qutîyê kartonî de teslîmê keyeyê ci ame kerdiş. Hemsereka Komeleya Kultur, Yewîtî, Paştîdayîş û Hetkarîya Keyeyê ke Merdimanê xo Dergûşa Şaristanîye de Vînî Kerdî (MEBYA-DER) ya Mêrdînî Gurbet Tekîne derheqê babete de ajansê ma JINNEWSî rê qisey kerd. 

 

Polîtîkayê îqtîdarî yê hemverê keyeyan 

 

Gurbete polîtîkayê ke hemverê cenazeyan de yenê rayîr ra berdiş şermezar kerd û vat: "Dewî ameyî wêrankerdiş û veşênayîş. Koçberî bi înan ame ferzkerdiş. Ameyî destbendkerdiş û tepiştiş. Nika zî nêeşkenê xo biresnê cenazeyanê xo. Keye bi înan reyde rî bi rî yê. Nê caardişî mird nêkenê cenazeyê tutan parçe parçe kenê û bi qutîyan keyeyan rê şirawîyenê. Sewbîna gorê înan yenê texripkerdiş." 

 

'Ma dej ancenê la ma nêtersenê’ 

 

Gurbete ard ziwan ke eynî îşkenceyê ke pê yenê reyde rî bi rî menda û wina dewam kerd: "Dimayê serran mi xo resna cenazeya lajê xo. Cenazeya lajê xo mi wareyê xo de defin kerd. La dimayê çend rojan kerraya mezelî ame şikitiş. No çî yeno manaya cezakerdişê keyeyan. Xora keye dej ancenê û no çî zî yeno manaya zilmê hemverê keyeyan. Sewbîna bi nê caardişan wazenê keyeyan bitersnê. La ganî bêro zanayîş ke raşt o ma dej ancenê la ma nêtersenê.” 

 

‘Mîyanê qutîyan de dinyayêke est a’ 

 

Gurbete dîyar kerd ke hêrişê hemverê cenaze û goristanan qebûl nêkenê, nê caardişî vera merdimîye, huqûq û edaletî de yê û wina vat: "Bi hêrişan cehd kenê ke heyf bigîrê. La no bêhurmetî yo. Cenaze ercê ma yê. Serranê peyênan de zî cenazeyan bi kargoyan teslîmê keyeyan kenê. Cenazeyê Garzanî peyarayîrê Kilyosî de ameyî definkerdiş. Cuya ma, hêsirê ma zerrîya ma, rumetê ma û her çîyê ma nê qutîyan de yê. Seba înan çîyêk şenik o la qutîyan de dinyayêke est a. Coka ra zî ganî ma wayîrê înan cenazeyan bivejê.”

 

'Ê bêkes nîyê' 

 

Gurbete qiseykerdişê xo yê peyênan de veng kerd û vat: “Ganî tena keye nê, şar bi temamî wayîrê cenazeyan bivejîyo. Ma dinyayêka wina hêvî kenê ke wa cenaze nêrê. Eke ma yewîtîya xo awan bikerê, ma do bieşkê tecrîdî bişiknê û Rayberê xo azad bikerê. Eke nê çîyî pê nêrî do o wext gonî birija. Sewbîna eke ma wayîrê cenazeyan bivejê do nêeşkê zirar bidê û goristananê bêkesan de defin bikerê. Ê bêkes nîyê.”