Rozerîn Gultekîn

 

AMED - Amed de zî sey xeylê bajaranê bînan seba paştîdayîşê grevê vêşanîye Nobeda Edaletî dîya destpêkerdiş. Cinîyan venga tewrbîyayîşê çalakîye kerdî û vatî: “Wa waştiş bêrê caardiş.” 

 

Seba azadîya fîzîkî ya Rayberê PKKyî Abdullah Ocalanî ke 25 serrî yo Girava Îmraliyî de binê tecrîdêk giran de yo û 33 aşmî yo ci ra tu xeberêke nîna girewtiş, 27ê Teşrîna Peyêne de tepişteyan zîndanan de çarçeweya hemleya ‘Abdullah Ocalanî rê azadî problemê kurdî rê çareserîya sîyasî’ de grevê vêşanîye yê bêdem û dorveger dayî destpêkerdiş. Bi serkêşîya Komeleya Hetkarîya Keyeyê Tepişteyan (TUHAY-DER) û merdimê tepişteyan, Amed, Mêrsîn, Edene, Wan û Stenbol de seba eynî çarçeweye Nobeda Edaletî dîya destpêkerdiş. Çalakî bê meben dewam kenê.

 

'Dinya bê kurdan nêxelesîyena’ 

 

Sema Sûmbûle seba paştîdayîşî tewrê Nobeda Edaletî ya Amedî bî, venga tewrbîyayîşê her kesî kerd. Semaye vat: “Seba ke ma vengê xo berz bikerê lazim o ma paştîdayîş bidê yewbînan. Ewro wextê kurdan o, dinya bê kurdan nêxelesîyena. Ma azadîya Rayberê xo wazenê. Ma bi zerrîya xo kişta tepişteyanê zîndanan de yê. Tutê ma zî verê cû zîndan de bî. Coka ra ez rewşa dadîyan baş fehm kena. Yê ke nika zîndan de yê ferqê înan tutanê ma ra çin o.”

 

'Rayîrê azadîye azadîya kurdan ra derbaz bena'

 

Semaya ke aştîyêk bi rumet waşte bale ant serê tecrîdî. Semaye vat: “Eke tecrîd bêro wedaritiş do tena Kurdistan de nê, heme dinya de azadî biba. Çimê heme dinya Kurdistanî de yo, coka ra kurdî bi serran o xover danê. Rayîrê azadîye azadîya kurdan ra derbaz beno. Heme dinya zî baş zana. Venga mi her kesî rê na ya; şima senî sereyê xo ronenê serê başna? Ganî her kes kişta dadîyan de vindero û sere çewt nêkero. Wa cinîyê Amedî wirzî payan ser û vajê ‘ma zî şima reyde yê’. Tu kesêk nêeşkeno hemverê hêzê ma cinîyan de vindero. Têkoşînê ma heta destfînayîşê azadîye do dewam bikero.”

 

‘Wa waştiş bêrê caardiş’ 

 

Fevzîye Kolakane dadîya Ahmet Kolakanî ke Zîndanê Hûmara 2ine yê Bandirma tepişte yo û Mahsun Kolakano ke Zîndanê Sîweregî de tepişteyo ya. Fevzîye tewrê Nobeda Edaletî ya ke seba serbestverdayîşê tepişteyê nêweşan zêdeyê 300 rojan dewam kerd zî bîbî û wina vat: “Wa çalakîya ma biba sebebê aştî û azadîye. Ez heme kesê zîndanan silam kena. Nêzana tutê mi kewtî grevê vêşanîye yan nê. Zêdeyê yew serrî yo mi lajê xo nêdîyo. Ez nêweş a û semedo ke zaf dûrî yo ez nêeşkena şêra zîndan. No yew aşme yo ma nêeşkenê telefon bikerê, cezaya resnayîşî ameya dayîş, la ma nêzanê semedê çi ameya dayîş. Ganî ma keye bikewtêne grevê vêşanîye, kesê ke zîndanan de yê nê. Xora zîndan de mîyanê zehmetîyan de yê. Ma wazenê tepişte serbest bêrê verdayîş, ma wazenê waştişê înan bêrê caardiş.”