AMED - Parlamentera DEM Partîye Ceylan Akça Cupoloye derheqê kampanyaya ke seba azadîya fîzîkî ya Rayberê PKKyî Abdullah Ocalanî û seba çareserîya meseleya kurd dîyaya destpêkerdiş, ercnaye. Ceylane vat: "Vera bêçareserîye de ganî mûxatabêk bibo. Mûxatab Birêz Ocalan o. " 

 

Seba azadîya fîzîkî ya Rayberê PKKyî Abdullah Ocalanî û seba çareserîya meseleya kurd 10ê Teşrîna Verêne de 74 merkezanê dinya de kampanyaya “Abdullah Ocalanî rê azadî problemê kurd rê çareserîya sîyasî" kampanya dîya destpêkerdiş. Tewrbîyayîşê seba na kampanyaye dewam kena. Seba paştîdayîşê na kampanyaye 27ê Teşrîna Peyêne de grevê vêşanîye yê bidem-dorveger hetê tepişteyanê sîyasîyan ra dest pêkerd. Merdimê tepişteyan zî teber de 5 bajaran de dest bi Nobeda Edalete kerdî. 

 

Parlamentera Partîya Têduşt û Demokrasîyî (DEM Partî) ya Amedî Ceylan Akça Cupoloye derheqê prosesî de ercnayîş kerd.

 

'Sebebê xeylê probleman tecrîd o' 

 

Ceylane ard ziwan ke tecrîdê serê Rayberê PKKyî Abdullah Ocalanî xeylê probleman zî xo reyde ano û wina vat: “27ê Teşrîna Peyêne de xeylê zîndanan de çalakîya grevê vêşanîye dîya destpêkerdiş. Tena çekuyêk ke grevê vêşanîye bi hawayêkê kilm eşkera keno, est o. No zî tecrîd o. No tecrîdo ke 33 aşmî yo Îmraliyî de yeno kerdiş, xeylê çîyan eşkera keno. Sebebê xeylê probleman tecrîd o. Sey nimune, sîyasetê şer ê xorî beno... Tirkîya de 20 serrê peyênan de butçeya pawitişê neteweyî est a û îstîhdamê leşker û polîsan xo resnenê nîm mîlyonî. Çekê ke nê nîm mîlyon merdimî do bi şuxilnê virazenê. Seba fînansmanê nê çekan zî butçe û qirikê şarî ra birnenê."

 

'Mûxatab Birêz Ocalan o' 

 

Ceylane da zanayîş ke sebebê şer, krîz, şîdet û şerî tecrîd o û wina dewam kerd : "Çareserî Rayberê PKKyî Abdullah Ocalan o. Seba ke problem çareser bibî mûxatab Birêz Ocalan o. Tepişteyê sîyasî yê zîndanan zî seba ke tecrîd peynî bibo, vernîya dîyalogî abibo, seba çareserîya problemê kurd ê demokratîke, seba çareserîyêk aştîyane kewtî grevê vêşanîye.”

 

'Huqûq goreyê xo şuxilnenê' 

 

Ceylane dîyar kerd ke seba paştîdayîşê çalakîya grevê vêşanîye bi serkêşîya TUAY-DERî dest bi Nobeda Edaletî ame kerdiş û wina vat: "Huqûq goreyê xo şuxilnenê. Heqanê tepişteyan nêdanê înan. Ganî no peynî bibo. Seba ke ma nê sîyasetî serê zemînêk raşt de bidê roniştiş ma mîyanê cehdkerdiş de yê. Ma cehd kenê ke veng bidê nê çîyî.”

 

'Ma cehd kenê ke waştişê embazanê xo bidê eşnawitiş’ 

 

Ceylane qiseykerdişê xo yê peyênan de dîyar kerd ke têkoşîn bi qedexekerdişê ziwan û kulturî dest pêkerdo û wina vat: “Hîkayeya ma hemeyan serê herra Kurdistanî de dest pêkerda. Dûrîfînayîşê herra xo ra dest pêkerdo. Wexto ke serê na herre de mendî merdimê ma yan zî heskerdoxê ma ameyî kiştiş. Bi qedexekerdişê ziwan û kulturê ma her çî dest pêkerd. Eslê xo de cayo ke ma ci ra ameyî dîyar o. Cayo ke ma ci ra şêrî zî encax ma eşkenê dîyar bikerê. Ma wazenê şar bi hawayêkê aktîf tewrê sîyasetê demokratîke bibo. Ma venga her kesî kenê ke bibê parçeyêk na nobede. Ma cehd kenê ke waştişê embazanê xo bidê eşnawitiş. Ma venga her kesî kenê ke paştîdayîş bidê nê têkoşînê.”