Melek Avci

 

ANQARA - Endama Komîteya Taqîpkerdiş û Temsîlkara Meclîsê Parlamenter a Konseyê Ewropa Laura Castele dîyar kerd ke raporê aşma Gulane yê zîyaretê Tirkîya pêşkêşê selahîyetdaran kenê û vat: “Selahîyetdarê Tirkîya Birêz Ocalanî sey çek, Îmraliyî zî sey laboratuvarê îşkenceyî şuxilnenê. Vera tecrîdî de het girewtiş yeno manaya paştîdayîşê şikin.” 

 

Rayberê PKKyî Abdullah Ocalano ke Îmraliyî de binê şert û mercê giran de yeno tepiştiş ra 33 aşmî yo tu xeberêke nîna girewtiş û 74 merkezê dinya de seba azadîya fîzîkî ya Abdullah Ocalanî û çareserîya problemê kurdî kampanya dîya destpêkerdiş. Sewbîna zîndanan de grevê vêşanîye û teber de zî nobetê edaletî dewam kenê. CPT û dezgehê mîyanneteweyî vera îşkence û tecrîdî de bêvengîya xo dewam kenê. 

 

Temsîlkara Sereka Koma Çep a Konseyê Ewropa û Endama Komîteya Taqîpkerdiş û Temsîlkara Meclîsê Panlementer a Konseyê Ewropaye Laura Castele ke delegasyonê Aştîye ya Îmraliyî yê Mîyanneteweyî de ca gêna, qala zîyaretê aşma Gulane ke Tirkîya de kerdbî, kerd. 

 

Lauraye da zanayîş ke zîyaretê aşma Gulane ke Tirkîya de kerdbî, Îzlanda de bi kombîyayîşêk eşkera kerdî û seba ke na xebate prosesê aştîye bida destpêkerdiş, pê ardî û wina dewam kerd: “Ma sey heyetê aştîye yê Îmraliyî yê mîyanneteweyî aşma Gulane de Tirkîya de zîyaret pê ard û ma dayeyan arê da û Reyîrêk ê Îzlandaye de bi eşkerayîyêke pêşkêş kerd. Zîrveyê hetê însîyatîfê ‘Ocalanî rê Azadî, Kurdistan rê aştî’ pê ame û bi amancê prosesê aştîye pê ame. Amancê ma rewşa tepişteyanê sîyasî bî.”

 

‘Ganî birêz Ocalan serbest bêro verdayîş’ 

 

Lauraye dîyar kerd ke adresê çareserîya problemê kurdî Îmrali yo û wina dewam kerd: “Seba aştîye ganî Ocalan azad bibo. Temsîlkarê heqanê merdiman ra bigîrê heta temsîlkarê sîyasî her kes vano şertê ewil ê aştîye wedaritişê tecrîdê serê Ocalanî yo. Ganî bi lezkî tecrîd wirzo û Abdullah Ocalan serbest bêro verdayîş.” 

 

‘Heqê merdiman çin o’ 

 

Lauraye wina vat: “ Tecrîdê Îmraliyî her cayê Tirkîya de vila bîyo. Birêz Ocalan nimuneyêk muhîm o. Roja ke prosesê Îmraliyî dest pêkerdo Tirkîya de heqê merdiman û huqûq çin o. No 33 aşmî yo tu xeberêke Birêz Ocalanî ra nîna girewtiş. Tecrîd resayo sewîyeya îşkenceyî. Selahîyetdarê Tirkîya Birêz Ocalanî sey çekê sîyasî, Îmraliyî zî sey laboratuvarê îşkenceyî şuxilnenê. Nê heme caardişî pêro zîndanan de zî pê yenê. Ganî na rewşe hetê Konseyê Ewropa û Neteweyê Yewbîyaye ra bêra şermezarkerdiş.”

 

‘Paştîdayîş seba şikinan o’ 

 

Lauraye qiseykerdişê xo yê peyênan de bale ant serê sîstemê tecrîdo giran û eşkera kerd ke bêvengîya vera tecrîdî yena manaya paştîdayîşê şikinan û wina vat: “Ma venga Konseyê Ewropa û heme dezgehan kerd ke bêvengî yena manaya paştîdayîşê şikinan. Venga ma no yo ke paştîdayîş bikerê prosesê aştîye. Ma reyna vanê. Rolê Birêz Ocalanî xeylê muhîm o. Seba muzakereyan serkêşîya Birêz Ocalanî xeylê muhîm o. Ganî Birêz Ocalan serbest bêro verdayîş. Ma raporê mîsyonê newe qedêna û ma do bierşawê dezgehê Konseyê Ewropa. Ma di persan nuşt Komîteyê Wezîran ê Konseyê Ewropa rê û resna.”