Pelşîn Çetînkaya

 

AMED - Hemsereka MED TUHAD-FEDî Emîne Kayaye derheqê çalakîyê grevê vêşanîye ke bi sloganê “Seba Abdullah Ocalanî azadî problemê kurdî rê çareserî" di 27ê Teşrîna Peyêne de dîya destpêkerdiş û çalalîya Nobeta Edaletî de venga girdkerdişê têkoşînî yê vera tecrîdî da û wina vat: “Şîdetê serê şarê kurdî rê zêde beno û ma nê caardişan qebûl nêkenê, coka ra ganî ma têkoşînê xo hîna gird bikerê.” 

 

Tepişteyê sîyasî yê zîndananê Kurdistan û Tirkîya 27ê Teşrîna Peyêne de seba azadîya Rayberê PKKyî Abdullah Ocalanî ke Girava Îmraliyî de yeno tepiştiş bi sloganê "Seba Abdullah Ocalanî azadî problemê kurdî rê çareserî” dest bi girevê vêşanîye yê dore kerdî. Keyeyê tepişteyan 4ê Kanûne de bi serkêşîya dezgehê tepişteyan TUHAY-DERî dest bi Nobeta Edaletî kerdî. Hemsereka MED TUHAD-FEDî Emîne Kayaye derheqê çalakîya grevê vêşanîye ke bi sloganê "Seba Abdullah Ocalanî azadî problemê kurdî rê çareserî” 27ê Teşrîna Peyêne de dîya destpêkerdiş û çalakîya Nobeta Edaletî de venga girdkerdişê têkoşînî yê vera tecrîdî da. 

 

'Dewlete hem teber de û hem zî zerre de binpaykerdişê heqan kena' 

 

Emîneye da zanayîş ke dewlete sere de Kurdistan xeylê cayanê Tirkîya de zî vera şarê kurdî de polîtîkayê giran kena dewre û vat: “Dewlete hem teber û hem zî zerre de binpaykerdişê heqan kena. Dewlete her ke şina şîdetê xo yê serê şarê kurdî zêde kena û şarê kurdî nê çîyî qebûl nêkeno. Coka ra ganî ma têkoşînê xo hîna gird bikerê.” 

 

Polîtîkayê dewlete yê vera kurdan 

 

Emîneye dîyar kerd ke dewlete bi serran o polîtîkayê çinîkerdişî serê şarê kurdî de dana rayîr ra berdiş û wina dewam kerd: “Serra 2021î de întîxar serê Garîbe Gezere de ame ferzkerdiş. Mergê aye şikin bî. Hetêk de zî her çend ke xeylê tepişteyê nêweş ê giran bibî zî Dezgehê Tibê Edlî (ATK) vano ke eşkenê zîndan de bimanê. Semedo ke tepişteyê nêweşî serbest nînê verdayîş zîndanan ra cenaze vejîyenê. Cenaze bi qutîyan teslîmê keyeyan yenê kerdiş.” 

 

Serewedarnayîşê vera tecrîdî 

 

Emîneye dewamê qiseykerdişê xo de bale ant serê çalakîya grevê vêşanîye ya 27ê Teşrîna Peyêne ke zîndanan de dîya destpêkerdiş û wina vat: “Seba paştîdayîşê çalakîya grevê vêşanîye Nobeta Edaletî dest pêkerd. Dadî vanê kes nêeşkeno ma bêveng bikero. Dadî vanê eke netîceyêk nêgîrê do muracatê rayîrê bînan bikerê.” 

 

Vengdayîşê berzkerdişê çalakîyan 

 

Emîneye tewr peynî vat: “Seba ke ma bibê vengê keye û vengê tepişteyan ganî ma paştîdayîş bidê na çalakîye. Sewbîna zî ma wazenê ke bi na çalakîye vengê xo bi dinya rê bidê eşnawitiş. Ma her kesî ra hêvî kenê ke paştîdayîş bidê çalakîye.”