Rozerîn Gultekîn

 

AMED - Taxa Sersîya ya Pîranî de yew aşmî yo hemwelatijî bê awe û ceyran ê. Hemwelatijan reaksîyon nîşanê rewşe dayî û vatî: “Ê senî xo rê rayan gêrenê, ma zî heqanê xo gêrenê.” 

 

Qezaya Pîranî ya Amedî de taxa Sersîya ya ke 70 keye ra pê yena bi bahaneyê parçeyêk trafoyî xerepîyayo, ceyran ame birnayîş û no yew aşmî yo taxe de ceyran çin o. Nê semedî ra hemwelatijê ke taxe de ciwîyenê bê awe û ceyran mendî. Hemwelatijan dîyar kerd ke lazimîya awa xo bi sîstemê dînamoyî temîn kenê û nika zî bi rojan o bê awe mendê. Hemwelatijan vatî ke malumat zî nêdîyeno înan. Taxe de xeylê nêweş û astengdar est ê û probleman ciwîyenê. 

 

Cinîyê ke taxe de ciwîyenê derheqê çîyê ke ciwîyayî de JINNEWSî rê qisey kerdî.

 

‘Qurtêk awe çin a’ 

 

Fatma Yaşare reaksîyon mojna rewşe û wina vat: “No rezîlî yo. Qurtêk awe çin a û ceyran çin o. Ma nêeşkenê werd virazê. Nêweşî est ê. Ma nêzanê çi semedî ra ameyo birnayîş. Vatî do trafo newe ra bîyarê la nêardî. Wa êdî no problem bêro çareserkerdiş. Ma nêeşkenê sereyê xo bişuyê. Sey demê verênan ma deştan de sereyê xo şuyenê. Mêrdeyê mi nêweşê mîyanê livînan o. Dewe de xeylê nêweş est ê. Erdogan, eşkeno ceyranê xo bibirno gelo? çi heqê înan est o ceyranê ma birnenê?” 

 

‘Nêweşê girêdayeyê cîhazan est ê’ 

 

Ayşe Kete zî ard ziwan ke tutê wendekarî est ê û problemê girdî ciwîyenê. Ayşeye wina dewam kerd: “No edalet o? Ez venga her kesî kena. Ma bivînê. Semedo ke ma kurdî wina kenê. Dewe de nêweş est ê û yê ke girêdayeyê cîhazanî est ê. Na dewlete seba çi est a gelo? Ê rayan bigîrê ma do zî heqanê xo bigîrê. Cuya ma bi rezîlî derbaz bena.”

 

‘Karê dewlete ma rê çin o zirarê înan est o’ 

 

 

Hacîce Yaşar zî dîyar kerd ke semedê hîn keyeyan 25 hezar-35 hezar cezaya ceyranî ameya birnayîş û ercnayîşê xo wina dewam kerd: “Ma şî merkezê Pîranî ma vat trafoyî bîyarê. La vatî semedê kaçaxtî do ci ra biewnê. La nêardî. Ma nêeşkenê cuya xo dewam bikerê. Ma çîyêk dewlete ra nêwazenê. Ma ceyranê xo wazenê. Karê dewlete ma rê çin o. Cezaya înan est a.”

 

‘Barê cinîyan giran bî’ 

 

Gurbet Yaşare zî ard ziwan ke keye de di astengdarê înan est ê û wina vat: “Semedê awe û ceyran çin ê, ma nînan danê paşta xo ro û benê cayê ke adir ameyo tavistiş. Wa êdî no problem çareser bibo. Barê cinîyan giran bîyo. Bi aşmêke yo ma na rewşe de yê.” 

 

Gulsum Yaşare zî reaksîyonê xo wina vat: “Ma nanê xo firne de viraştêne. La nika varan bo zî ganî ma şêrê tenûre. Ma binê finde de werd wenê. Ma werd serê adirî de virazenê. Awe çin a. Ma awe bîr ra ancenê.”