Rojda Aydin - Zelal Tunç 

 

WAN - Hemwelatijê ke ameyî paştîdayîşê çalakîya "Nobeta Edaletî" dîyar kerdî ke bi serran o tecrîdêk giran Îmraliyî de yeno rayîr ra berdiş û vengayîş kerdî: “Edene, Mêrsîn, Amed û Wan de vera tecrîdî de nobet dîyaya destpêkerdiş. Ma do paştîdayîşê înan bikerê û ma do pîya azad bibê." 

 

Rayberê PKKyî Abdullah Ocalan Zîndanê Tîpê Fyî yê Asayîşê Berzî yê Îmraliyî de binê şert û mercê giran ê tecrîdî de yeno tepiştiş, nizdîyê 3 serrî pêvînayîş bi avûkat û keyeyan reyde yeno astengkerdiş. Rayberê PKKyî tewr peynî 25ê Adara 2021î de bi birayê xo Mehmet Ocalanî reyde bi rayîrê telefonî pêvînayîş kerdbî û telefon nîme de ameybî birnayîş. Xêrcê Abdullah Ocalanî, zîndanê Îmraliyî de Hamîlî Yildirim, Veysî Aktaş û Omer Hayrî Konar zî yenê tepiştiş. Heme muracatî bi bahaneyê “cezaya dîsîplînî” yenê astengkerdiş. 

 

Tepişteyê sîyasî yê zîndanan bi waştişê “Abdullah Ocalan rê azadî û problemê kurdî rê çareserîya sîyasî” 27ê Teşrîna Peyêne de heta 15ê Sibate dest bi grevê vêşanîye yê dore kerdî û çalakîya înan dewam kena. Teber de zî semedê paştîdayîşê çalakîya tepişteyan û semedê azadîya Abdullah Ocalanî bi serkêşîya Komeleya Paştîdayîşê Bi Keyeyê Tepişteyan Reyde (TUAY -DER) Wan, Amed, Mêrsîn û Edene de çalakîya “Nobeda Edaletî” binê sloganê “Semedê edalet, semedê şikitişê tecrîdî, semedê aştîye ma bibê vengê zîndanan” dîya destpêkerdiş. 

 

Çalakîya Wanî ke roja 9ine de dewam kena, xeylê dezgehê sivîl û hemwelatijî yenê seba paştîdayîşî. Hemwelatijê ke ameyî paştîdayîşê çalakîye qisey kerdî û veng kerdî ke heme kes wayîrê îradeyê xo bivejîyo. 

 

‘Ma wayîrê îradeyê xo vejîyenê’ 

 

Ayten Salgura ke taxa Surmelî ya Rîya Armûşî ra ameya paştîdayîşê çalakîye dîyar kerd ke malumatê pêroyê komelî û şarê dinya no tecrîdo girankerde ra est o û vat ke taybet 13 serrê peyênan de tecrîdêk giran serê Abdullah Ocalanî de est o. Aytene ard ziwan ke hîrê serrê peyênan de zî na têkilî bi temamî ameya birnayîş û wina dewam kerd: “Demê verênan de ge-ge heyet, avûkat û keye eşkayêne şêrê pêvînayîş. La nê serranê peyênan de avûkatê ci qet nêeşkenê ci reyde pêvînayîş bikerê. Tecrît tena Îmraliyî de nê, tecrît pêroyê zîndanan, dezgeh û şarê ma ser de est o. Bîyayîş û nêbîyayîşê ma girêdayeyê azadîya Serekatîyê ma yo. Ma encax bi ci eşkenê xilas bibê. Aştî bi Serekatî do bêra nê welatî. Wa tu kes xo nêxapêno û nêvajo ez keyeyê xo de rehet a. Şarê kurdî ke bi serran o bi nê zilmî reyne rî bi rî yo, la reyna zî hîşyar nêbenê. La ma xeylê sist ê û xemsar ê. Ganî ma wayîrê îradeyê xo bivejê.”

 

‘Ma do pîya azad bibê' 

 

Aytene, bale ant serê çalakîya grevê vêşanîye û vat:  “Ma sey şarê kurdî wurzê serê lingan û paştdayîşê tepişteyan bikerê. Ma zî teber de çalakîyan organîze bikerê. Ê pêro tutê ma yê. Ewro her kesêk semedê vatişanê înan cezaya bi serran ameya dayîş. Tutê ma  bi îşkence reyde rî bi rî manenê. Nika Edenê, Mêrsîn, Amed û Wan de keyeyê ma yê tepişteyan hemverê tecrîdî dest bi nobete kerdê. Ma çalakîya înan pîroz kenê. Ma zî paştdayîşê înan kenê û înan û keyeyê înan bi tenê nêverdenê. Ma venga pêro dadîyan kenê ke wurzê serê lingan û nê rê bêveng memanê. Ma do paştdayîşê ciwan û tepişteyanê xo bikerê heta ke pîya azad bibê."

 

‘Ma do bi xoverdayîş tecrîd bişikinê’ 

 

Ayşe Nîllî zî ke taxa Karşiyaka ya Rêya Armûşî ra ameye paştdayîşê çalakîye û venga wayîrvejîyayîşî kerd û vat: “Me ne semedê Serekî û ne zî semedê tutanê xo yê tepişteyan çîyêk nêkerd. Ganî êdî her kes nê bêvengîye bişikino û wurzo serê lingan. Ma ne dadîyanê xo û ne zî tepişteyanê xo tenê nêverdenê. Ma do bi xoverdayîş nê tecrîdî bişikinê. Dem o demo ke şarê ma wurzo serê lingan û tecrîdî bişikino. Ma do tecrîdê serê zindanan wedarnê."