Melek Avci - Dîlan Babat

 

ANQARA - Hemverfeka Komîsyonê Karê Weçînayîşî ya DEM Partîye Îlknur Bîrole bale ant serê weçînayîşê herêmî û vat: “Ma talîbê rayîrberîyê bajaran ê, ma qet xo nêdanê kîşte. La seba ma sere de hemkarî nê, akerdişê rayîro ke pêroyê komelî tîfaqê keno û resneno pê yo.” 

 

Seba weçînayîşê herêmî yê aşma adare xebatê partîyan dewam kena. Partîya Têduştî û Demokrasîyî yê Şaran (Dem Partî) bi pêkerdişê bajaran ê ke heme dînamîkê bajarî tewrê ci benê do namzedanê xo dîyar bikerê û eşkera kerd ke do her bajarî ra namzedan bivejnê. Hemverfeka Komîsyonê Karê Weçînayîşî ya DEM Partîye û endama Heyetê Rayîrberîyê Merkezî (MYK) Îlknur Bîrole derheqê xebatê weçînayîşî de malumatanê peyênan pare kerd û derheqê xerîtaya rayîrî ke taqîp kenê de ercnayîş kerd. 

 

‘No weçînayîş raşteyê hesabpersayîşî yo’ 

 

Îlknure dîyar kerd ke kewtî prosesêk muhîm û sey her weçînayşî binê tedayanê hukm û îqtîdarî de xebatan rayîr ra benê û vat: “Ma bi hawayêkê cidî xo amade kenê. Ma bi nameyê newe DEM Partîye yê. Her kes xebetîyeno. Hukm îtîrazê nameyê HEDEPî kerd û netîceyê ci de name ame bedilnayîş. Weçînayîşê 31ê Adare do netîceyê muhîm bivejno raşte. No weçînayîş seba ma xeylê muhîm o. Seke yeno zanayîş îqtîdar qeyûm tayînê şaredarîyê ma kerdbî. Sîstemê qeyûmî kerd sey rejîm. No rejîmo ke komel qebûl nêkeno yo. Coka ra no weçînayîş raşteyê hesabpersayîşî yê rejîmê qeyûman ra yo.”

 

‘Di hetî ra nizdîbîyayîşê ma yê hemverê nê weçînayîşî est o’ 

 

Îlknure wina dewam kerd: “Ma di hetan ra nizdîyê weçînayîşî benê. Partîya îqtîdarî rayîrberîyê herêmî sey dewamkerdişê hukmatê merkezî vînena. Sey organîzasyonê şenik ê dewlete yeno dîyîş. La welatan de rayîrberîyê herêmî bi tewrbîyayîşê şarî pê yeno û bi hawayêkê kolektîf goreyê lazimîyê komelî yenê rayîr ra berdiş. Nê yewîyê demokrasîye û yê tewr muhîm ê. Rayîrberîyê merkezî ra hîna muhîm o. Coka ra zî di nizdîbîyayîşê ma est ê; wedaritişê rejîmê qeyûman û dima ra girewtişê şaredarîyan. Seba ke nê cayî bibî cayê ke şar xo rayîr ra beno, ma do stratejîyê xo dîyar bikerê.” 

 

Muracatê vernamzedîye ameyî girewtiş 

 

Îlknure dewamê qiseykerdişê xo de bale ant serê muracatê seba vernamzedîye û vat: “Nuqtaya ke ma partîyê bînan ra cîya kena, zîhnîyetê têduştîya cinîye ya. Ma do şaredarîyê xo bi hemserekatî û temsîlkarîya têduştî rayîr ra berê. Ma do bi modelêk hîna baş rayîr ra berê. Ma amadekarîyê weçînayîşî kenê. Bi hezaran muracatî est ê. Hema muracatî nêameyî girewtiş. 20ê aşme de do muracatî bêrê girewtiş. Hem Kurdistan û hem zî bajarê rojawanê Tirkîya de bi coşêk gird cinîyan muracat kerdî. Ma wazenê ke bi temsîlkarîya têduştî muracat bêrê kerdiş. Ma wazenê hîna zêde cinî muracat bikerê. Coka ra zî ez vaja, wa cinî qet xo nêdê kiştêk. Şima keye de xo rayîr ra benê, raşteyan de rayîr benê, zaf zî baş rayîr ra benê. Şima eşkenê şaredarîyan zî welat de rayîr ra berê.” 

 

Xerîtaya rayîrî her ca de serkewtiş a 

 

Îlknure qiseykerdişê xo yê peyênan de dîyar kerd ke sey partîya tîfaqan tena bi sindoqê weçînayîşan sînor nêvînenê û wina qiseykerdişê xo peynî kerd: “Sey partî stratejîya ma serra 2019î ra cîyayêr wina ya. Bi hedefo ke ma Kurdistan û bajarê rojawanê Tirkîya de serkewtiş bîyarê, ma xerîtaya rayîrî amade kerd û ma amadekarîyan goreyê nê kenê. Bernameyê ma newera awankerdişê komelêk demokratîk o û demokratîkbîyayîşê komelî yo. Ma nê çîyî ra bawer kenê. Pêkerdişê bajaran gamêk muhîm o. Hêrişê vera partîya ma her kes zano. Her ca de xîretkerdişê krîmînalîzekerdişî û manîpulasyonî est o. Ma talîbê rayîrberîyê bajaran ê, ma qet xo nêdanê kîşte. La seba ma sere de hemkarî nê, akerdişê rayîro ke pêroyê komelî tîfaqê keno û resneno pê yo.”