Pelşîn Çetînkaya 

 

ÊLIH - Aktivîsta TJAye Rûken Zeryam Işik Yildize derheqê kampanyaya ke bi sloganê “Bi jin jiyan azadîye ver bi azadîye ra” dîyabî destpêkerdiş de da zanayîş ke beşê yewine yê kampanyaye qedîyayo û derbazê beşê diyîne ya kampanyaye bîyî. 

 

Têgêrayîşê Cinîyê Azade (TJA), bi deklerasyono ke 15ê Êlule de bi sloganê “Bi jin jiyan azadiye ver bi azadîye ra” eşkera kerd da zanayîş ke do kampanya heta 8ê Adare dewam bikera. 20ê Êlule de Şirnex û Stenbol de startê kampanyaye ameybî dayîş. Na çarçewaya kampanyaye de atolyeyê derheqê tecrîd, polîtîkayê şerê taybet, qirkerdişê cinîyan, talankerdişê xoza û tedaya serê ziwanê dadîye ameyî viraştiş. 

 

Aktivîsta TJAye Rûken Zeryam Işik Yildize derheqê kampanyaye de qisey kerd. 

 

‘Xebate serê esasê rêxistinbîyayîşî de yenê rayîr ra berdiş’ 

 

Rûkene da zanayîş ke kampanyaya ke danê rayîra ra berdiş serê di beşan ra dewam kena û wina vat: “Ma beşê yewine bi kesê ke dezgehan de xebetîyenê reyde rayîr ra berd. Çarçeweya kampanyaye de atolyeyê derheqê tecrîd, polîtîkayê şerê taybet, qirkerdişê cinîyan, talankerdişê xoza û tedaya serê ziwanê dadîye de viraşt. Ma kuçe û dewan de zî na kampanyaye kerdî. Xebatî serê esasê rêxistinbîyayîşê cinîyan de yenê rayîr ra berdiş.”

 

‘Ma beşê dîyîn ê kampanyaye kenê’

 

Rûkene da zanayîş ke xeylêk bajarê Kurdistanî û Tirkîya de na kampanya yena kerdiş û beşê ci yê ewilî xelas kerdê û wina vat: "Ma do beşê diyîn de xebatê weçînayîşê herêmî zî zêde bikerê. Ma sey Têgêrayîşê Cinîyê Azade kampanyaya bîyaye vurna rêxistinbîyayîş. Ma bi temsîlkarîya têduştî benê her raşte. Do xebatê ma yê bi çarçewaya kampanyaya ke serdemê weçînayîşê herêmî de dayî destpêkerdiş bibê û no zî serê teşwîqkerdişê cinîyan de bibo.”

 

‘Xebatan de tewrbîyayîşê cinîyan zêde yo’ 

 

Rûkene dîyar kerd ke xebatê kenê de tewrbîyayîşê cinîyan zêde yo û wina qedêna: "Bi tewrbîyayîş û têkoşînê cinîyan do xeylêk çî bêrê bidestkerdiş. Bawerîya mi bi nê çî est a. Îmrali de nika tecrîdêk est o û binpaykerdişê heqan ê zêde est o. Coka zî tepişteyê sîyasî dest bi grevê vêşanîye kerdî. Coka  her kes paştdayîş bido na çalakî.”