Elfazî Toral

 

STENBOL - Hemsereka ANYAKAY-DERî Emîne Arslane reaksîyon mojnaye hêrişê peynî yê hemverê cenazeyan û teslîmkerdişê cenazeyan ê ke qutîyan de dîyayî û dîyar kerd ke ê do vera nê caardişan de keyeyan reyde têkoşîn gird bikerê.

 

Îqtîdarê AKP-MHPyî bi polîtîkayê şerê taybetî tutanê şarê kurdî, Kurdistan û Tirkîya de qetil keno. Hêrişê cenazeyê ciwananê kurdî keno û qutîyan de dîyenê keyeyê înan. Reaksîyonê hemverê hêriş û îşkenceyê serê cenazeyan dewam keno. 

 

Komeleya Hetkarî û Paştîdayîşê bi Keyeyê ke Merdimanê Xo Vînî Kerdî ya Anatolyaye (ANYAKAY-DER) 3ine Kongreyê xo yê Asayî çend roje verê cû bi sloganê "Bi ercê xo yê bingeyîn reyde ver bi sibaroja azade ra" viraşt û rayîrberîya xo ya newe dîyar kerd. 

 

Hemsereka ANYAKAY-DERî Emîne Arslane derheqê babete de ercnayîş kerd. 

 

'Ma do bi xoverdayîşêk xurt têkoşînê xo dewam bikerê’ 

 

Emîneye ard ziwan ke ê do serra neweyî de xeta têkoşînî hîna xurt aver bifînê û dîyar kerd ke ê do her wextî ra hîna zêde xover bidê û xeta têkoşînî ya xurt û xoverdayoxî aver bifînê. Emîneye dîyar kerd ke ê hêrişê peyên ê hemverê cenazeyê kesê ke pêrodayîşan de dinyaya xo bedelnayî û cenazeyê ke qutîyan de teslîmê keyeyan ameyî kerdiş, normal nêvînenê û da zanayîş ke nê nizdîbîyayîşî qebûl nêkenê. Emîne vat: “Ma do wayîrê esteyanê xo bivejê û ma do her wextî ra hîna zêde wayîr bivejê. Hem dezgehê ma û hem zî keye do wayîrê kesê ke dinyaya xo bedelnayî, bivejê. Serranê peyênan de her tim cenazeyî qutîyan de dîyenê keyeyan. No tu hawayêk exlaqî nîyo. No teberê wijdanî yo. Ma nê caardişan qebûl nêkenê û keye zî qebûl nêkenê. Ganî tu kes nê çîyî qebûl nêkero.” 

 

'Têkoşînê mo gird beno’ 

 

Emîneye ard ziwan ke ganî dadî û komel zî nê caardişan qebûl nêkerê û wina vat: “Ez hem sey dadîyêk û hem zî sey hemsereka dezgehî nê bêexlaqîyan bi temamî qebûl nêkena. Ma kewtî prosesêk newe. Dewlete roj bi roje tedaya xo xorî kena. La têkoşîn û xoverdayîşê ma zî roj bi roje gird beno. Ma eşkenê bi têkoşînê keyeyê ke kişta ma de ca gênê, ser bikewê û seba nê zî ganî nê bêhuqûqîyan qebûl nêkerê. Ganî ma prosesêk winasî de mil bidê yewbînan û nizdîbîyayîşê dewlete yê hemverê cenazeyan qebûl nêkerê.”

 

'Ma do pîya xover bidê û pîya têkoşîn bikerê' 

 

Emîneye qiseykerdişê xo yê peyênan de dîyar kerd ke ver bi prosesêk muhîm ra yeno şîyayîş û vist vîr ke vera polîtîkayê tecrîdî ke yenê rayîr ra berdiş de do bi keyeyan reyde têkoşîn bikerê. Emîneye wina peynî ard: “Çi destê ma ra bêro ma do cehd bikerê de pê bîyarê. Binpaykerdişê heqan û polîtîkayê tecrîdî her ke şino zîndanan de xorî beno. Ma binpaykerdişê heqan şermezar kenê. Ma polîtîkayê tecrîdî şermezar kenê. Bêrê ma wayîrê cenazeyanê xo bivejê. Ma do têkoşînê xo gird bikerê. Ez zî tîya ra soz dana keyeyan ke prosesêk wina muhîm û giran de ma do înan reyde rayîr ra şêrê. Ma do pîya xover bidê. Ganî heme şar pîya bikewo têgêrayîş mîyan û têkoşîn bikero.”