STENBOL - Rojnamegere Elfazî Toral şîdetê polîsan ê wextê taqîbkerdişê xeberan de ci rê ame kerdiş wina vat: “Xeylêk reyan kulme dayî mi ro. Hem şîdetê fîzîkî hem zî yê psîkolojî mi rê kerdî. Pêwa ke mi vat, problemê min ê weşîye est ê zî nêvindertî. Ma do fek nuştişê heqîqetî ra vera nêdê.”

 

Komeleya Rojnamegerê Cinîyan ê Mezopotamyaye (MKG) û Komeleya Rojnamegeran ê Dîcle Firatî (DFG) derheqê muxabîra JINNEWSî Elfazî Toral û xebatkara Demokratîk Modernîte Sema Korkmaz ke demê Stenbol de xeberan taqîb kerdêne, hetê polîsan ra derb werdî  û ameyî destbendkerdiş, eşkerayîye dayî. Eşkerayîye, awanîya Komeleya Heqê Merdiman (ÎHD) ê Beyoglûyê ame dayîş û xeylêk rojnamegerî tewr bîyî.

 

‘Ma do xoverdayîşê semedê heqîqetî dewam bikerê’

 

Muxabîra JINNEWSî Elfazî Toral dîyar kerd ke polîsan ra vata rojnameger a la reyna zî rastê şîdetî ameya û wina vat: “Xeylêk reyan kulme dayî sîneyê mi ro. 5 saetan wesayîtê destbendkerdişî de ameya vindartiş. Hem şîdetê psîkolojî hem zî yê fîzîkî mi rê kerdî. Wesayît de pêhn dayî mi ro. Mi ci ra vat ke problemê min ê weşîye est ê la reyna nêvindertî. Emnîyet de polîsan vato ke ez hemverê înan de vejîyaya. Şîdetê hemverê mi emnîyetî zî dewam kerd.  Ma kesê adetê Çapemenîya Azad ra yenê, ma do xoverdayîşê semedê heqîqetî dewam bikerê. Pêwa hêrişê înan zî do israrê ma dewam bikero.”

 

Sema Korkmaz zî çîyê ke ameyî sereyê aye qal kerd. Sema, ard ziwan ke amancê hêrişan oyo ke komelî bêveng bikerê û wina vat: “Pêwa nê hêrişan zî do xebatê ma dewam bikerê. Çapemenîya Azade nîna bêvengkerdiş.”

 

Do prosesê huqûqî bêro destpêkerdiş

 

Endama Komeleya Huqûqnasê semedê Azadîye (OHD) Elîf Taşdogan zî dîyar kerd ke polîsî huqûqê xo çin hesibnenê û vat: “Polîsî, polîtîkaya nêcezakerdişî ra cesaret gênê. Tîya ma dewleta huqûqî zêdeyêr, dewleta polîsan vînenê. Ma do nê prosesî taqîb bikerê. Ma derheqê derbkerdişê raporî girewtî û dê prosesê huqûqî heta peynî dewam bikerê.”

 

Muxabîra JINNEWSî û endama MKGyî Marta Somek zî eşkerayîye de wina vat: “Ma do mîyanê hewteyî de bi Weqfê Heqê Merdiman ê Tirkîya (TÎHV) û ÎHDyî dozgerî rê gerre bikerê. Do xebatê ma yê hemverê nê hêrişan dewam bikerê û fek nuştişê heqîqetî ra vera nêdê.