Nazlican Nûjîn Yildiz

 

ÎZMÎR - Sîyasetmedar û Dadîyê Aştîye derheqê kampanyaya seba ke wedaritişê tecrîdê serê Rayberê PKKyî Abdullah Ocalanî bêro şikitiş dîyaya destpêkerdiş û grevê vêşanîye yê tepişteyanê sîyasî bi eynî waştişî dîyayo destpêkerdiş, qisey kerdî û dîyar kerdî ke ganî bi lezkî tecrîd bêro wedaritiş û vatî ke kilîtê aştîye Îmrali de yo. 

 

Rayberê PKKyî Abdullah Ocalano ke Îmraliyî de binê tecrîdê giran de yeno tepiştiş ra nizdîyê 3 serrî yo ke tu xeberêk nîna girewtiş. Birayê Abdullah Ocalanî, Mehmet Ocalan tewr peynî 25ê Adara 2021î de pêvînayîşêk telefonî pê ard bî. Muracatê ke seba pêvînayîşê bi Abdullah Ocalan re yenê kerdiş bi bahaneyê ‘cezaya dîsîplînî’ yenê redkerdiş. Seba azadîya fîzîkî ya Abdullah Ocalanî û çareserîya sîyasî ya problemê kurdî 10ê Teşrîna Verêne de xeylê cayanê dinya de kampanyaya ‘Abdullah Ocalanî rê azadî problemê kurdî rê çareserî’ ame destpêkerdiş. Tepişteyê sîyasî zî 27ê Teşrîna Peyêne de dîyar kerdî ke çarçeweya kampanyaye de dest bi grevê vêşanaîye yê dorveger kerdî. 

 

Cinîyê Îzmîrî derheqê tecrîdê giran ê serê Rayberê PKKyî Abdullah Ocalanî û çalakîya ke tepişteyan daya destpêkerdiş de qisey kerdî. 

 

‘Ma edalet û aştîye wazenê’ 

 

Dadîya Aştîye Nufuse Ataçe grevê vêşanîye yê tepişteyê sîyasî ke dayî destpêkerdiş pîroz kerd û vat ke tecrîdê serê Rayberê PKKyî Abdullah Ocalanî hîrê serrê xo dekeno. Nufuse wina vat: “Pêvînayîşê keye û avûkatan yeno astengkerdiş. Çalakîyê grevê vêşanîye zîndanan de destpêkerdî. Ez wazena vengê xo bi wezareta edaletî, huqûqnas, CPT û Ewropaye bida eşnawitiş. Wa vengê înan rê bibî veng. Ganî bi lezkî tecrîd bêro wedaritiş. Ma edalet û aştîye wazenê.”

 

‘Ma tecrîdî qebûl nêkenê’ 

 

Nufuse da zanayîş ke bi tecrîdî wazenê têkilîya mabenê şar û Abdullah Ocalanî yewbînan ra bibirnê û wina dewam kerd: “Heta tecrîdê serê Abdullah Ocalanî nêro wedaritiş aştî zî nîna. Kilîtê aştîye Îmrali de yo. Wexto ke tecrîd bêro wedaritiş aştî zî yena, demokrasî zî do bêra. Ganî dewlete înan bizana. Ma tecrîdî qebûl nêkenê. Tecrîd tena serê Abdullah Ocalanî de nê serê heme şar û tepişteyan de yeno rayîr ra berdiş. Ganî ma paştîdayîş bidê grevê tepişteyan. Ganî ma înan tena nêverdê. Ez venga heme kesî dena. Ganî ma nê tecrîdî birijnê.”

 

‘Tecrîdî wedarnê, êdî bes o!’ 

 

Hemsereka Partîya Têdûşt û Demokrasîye ya Şaran (HEDEP) Sebahat Ulusane ard ziwan ke aye wazena tecrîd bêro şikitiş û aştî wazena. Sebahate ercnayîşê xo wina dewam kerd: “Nê welatî de xora gonî zêde rijîyaya. Ma wazenê ke tecrîd bêro wedaritiş, aştî bêra. Waştişê heme şaran no yo. Wa tecrîd wirzo. Şertê zîndanan zaf xirab ê. Embazê cinî probleman ciwîyenê. Derheqê tecrîdî de tu malumatêk çin o. Zîndan pira tesîr benê. Şarê kurdî ser de tecrîd est o. Coka ra ganî tecrîd wedarîyo.”

 

‘Mîyanê çar dêsan de bedenê xo ronenê raşte’

 

Hemsereka HEDEPî ya Menemenî Adîle Yagane zî bale ant serê tecrîdê giran û da zanayîş ke ganî seba çareserîya problemê kurdî berê Îmraliyî bêrî akerdiş û wina dewam kerd: “Nê sebebî vera tepişteyê sîyasî 27ê Teşrîna Peyêne de kewtî grevê vêşanîye. Xora mîyanê çar dêsan de yê. Înan zî bedenê xo ronayî raşte. Teber de ganî ma keyeyê tepişteyan tena nêverdê. Seba paştîdayîşî ganî ma vengê xo berz bikerê. Ganî bi lezkî tecrîd bêro şikitiş. Xeylê tepişteyê nêweşî est ê. Cezaya înan temam bîya la taloq kenê. Tepişteyî serbest nînê verdayîş. No zî tecrîdêk cîya yo. Heyetê Ewropa, CTP yenê pêvînayîşan kenê. La CPT pêvînayîşan eşkera nêkeno. Ganî hukmat biwazo ke CPT zî nê çîyan eşkera bikero. Abdullah Ocalan dîyar kerd ke ‘wa destûr bidê ez yew hewteyêk de şer raşte ra wedarnena’. Şarê kurdî her tim hetê aştîye de bî. Şer nêwaşt. No welat ê ma hemeyan o. Heqê her kesî est o.” 

 

‘Zîndanan de xoverdayîşêk heqdar est o’

 

Hemsereka HEDEPyî ya Alîagaye Gul Ekîcîye zî ercnayîşê xo de nê çîyan ard ziwan: “Ganî tecrîd bêro wedaritiş, bi Birêz Ocalanî reyde dîyalog bêro destpêkerdiş. Zîndanan de xoverdayîşêk heqdar est o. Ma heme bar fînayo milê tepişteyan ser. No kêmanîyê ma yo. Şertê zîndanan xora giran ê. Zîndanê Şakranî de nika awa germ yena birnayîş. Problemê germbîyayîşî destpê kerdo. Embazê ma vera tecrîdî de xoverdayîşêk xurt danê. Ganî ma zî wayîrê xoverdayîşê înan bivejê. Ganî ma bibê hemkarê xoverdayîşê zîndanan.”